Armagedõ: Nebã sẽn yet rẽ zugu

“La bãmb tigma bãmb zĩig sẽn boond ne hebre goamã tɩ Armagedõ.”—WILGRI 16:16.

YÃMB sã n wʋm gom-bil ning sẽn yaa “Armagedõ” wã, bõe n wat y yamẽ? Tõe tɩ y tags sabaab wẽnem sẽn loog noor yelle. Yaa zĩig a ye bal la d yãt gom-bilã Biiblã pʋgẽ. La baasgo, kiba-kɩtb la tũudum taoor dãmb nong n gomda a yell wʋsgo.

Nebã tagsg Armagedõ zugã zemsa ne Biiblã sẽn yetã bɩ? Tara yõod tɩ y bãng rẽ. Bõe yĩnga? Bala y sã n bãng bũmb ning Biiblã sẽn yet Armagedõ zugã, pa na n le kẽesd-y rabeem ye. Pʋd n na n kɩtame tɩ y kɩs sɩd tɩ beoog daarã na n yɩɩ neere. Leb n na n sõng-y lame tɩ y ra tall tagsg sẽn yaa kɛgr Wẽnnaam zug ye.

D na n goma nebã tagsg sẽn yaa to-to Armagedõ zugu, la d wilg Biiblã me sẽn yete.

1. ARMAGEDÕ YAA SABAAB SẼN NA N TŨ NE NINSAALBÃ NUG BƖ?

Sabaab sẽn tũ ne ninsaalb nug sã n maane, kiba-kɩtbã la bãngdbã nong n boonda rẽ tɩ “Armagedõ.” Wala makre, b boola dũni gill pipi zabrã la a yiib-n-soabã fãa tɩ Armagedõ. Zab-kãensã poore, nebã ra yɛɛsda Etazĩni ne Iniyõ Sovietik na n wa tall zab-te-toos n zab taaba. Kiba-kɩtbã ra zoe n boonda rẽ tɩ “zab-te-toos Armagedõ.” Rũndã-rũndã, bãngdb nins sẽn tagsd tɩ tẽn-gãongã, koomã la pemsmã rẽgengã na n waa ne yell dũniyã gill zugã keoogda nebã, n yetẽ tɩ rẽ me na n yɩɩ “Armagedõ.”

Nebã sẽn yet woto wã, yaa wa b sẽn tagsd tɩ tẽngã la bũmb nins fãa sẽn be a zugã sẽn na n wa yɩ to-to wã bee ninsaalbã nugẽ. La tɩ tẽnsã taoor dãmb sã n pa tall yam, tẽngã na n wa sãamame, hal tɩ sẽn maand kae ye.

Biiblã sẽn yete: Wẽnnaam pa na n bas tɩ tẽngã sãam fasɩ ye. Biiblã wilgdame t’a Zeovaa pa naan tẽngã “zaalem” yĩng ye. A naan-a lame “tɩ neb zĩnd a zugu.” (Ezai 45:18) Sɩd-sɩda, Wẽnnaam pa na n bas tɩ ninsaalbã sãam tẽngã fasɩ ye. A na n “sãama neb nins sẽn sãamd dũniyã” bɩ tẽngã.—Wilgri 11:18.

2. ARMAGEDÕ YAA SABAAB-WẼNG BAL BƖ?

Sabaab-wẽng sã n maane, kiba-kɩtbã nong n yetame tɩ yaa “Armagedõ.” Wala makre, tẽngã sẽn digimd Haiti yʋʋmd 2010, kibar a yembr pʋgẽ, b boola rẽ tɩ “Haiti ‘Armagedõ.’” Yaa kibar sẽn da gomd sãoongã, namsgã, nebã sẽn ki wã, la yɛl nins fãa tẽn-digimdgã sẽn wa ne tẽn-kãng pʋgẽ wã. Kiba-kɩtbã la filim-maandbã mi n wilgda yɛl sẽn zoe n maane, la yɛl b sẽn yɛɛsd tɩ watame, n boond rẽ tɩ Armagedõ. Wala makre, b mamsa wa ãd-kẽeng sẽn na n yi yĩngr n wa zãb tẽngã tɩ yɩ to-to wã, n boond rẽ tɩ “Armagedõ.”

Nebã sẽn yet woto wã, yaa wa b sẽn tagsd tɩ Armagedõ yaa yel-lingdem sẽn kʋʋd baa sẽn pa tar-b toorẽ yellã, la tɩ bũmb kae ned sẽn tõe n maan n paam n põs ye.

Biiblã sẽn yete: Armagedõ pa yel-lingdem sẽn kʋʋd neb yaar ye. Armagedõ sasa, yaa nin-wẽnsã bal la b na n menese. Biiblã yeta woto: “Keta bilf bala, tɩ nin-wẽng kõn tol n zĩnd ye. Yãmb na bao tɩ bãng a zĩiga, la a ka be ye.”—Yɩɩl Sõamyã 37:10.

3. ARMAGEDÕ SASA, WẼNNAAM NA N SÃAMA TẼNGÃ BƖ?

Neb kẽer sẽn tẽed Wẽnnaam tagsdame tɩ wakat n wate, tɩ sõma wã ne wẽngã na n zab taaba, la tɩ rẽ na n waa ne tẽngã gill sãoongo. Etazĩni, b (Princeton Survey Research Associates) soka neb n ges b sã n tẽedame tɩ tẽngã na n sãama “Armagedõ zabr sasa.” La neb 100 zugu, neb 40 n wilg tɩ b sɩd tẽeda woto.

Nebã sẽn yet woto wã, yaa wa b sẽn tagsd tɩ Wẽnnaam pa naan ninsaalbã tɩ b vɩɩmd tẽngã zug wakat sẽn ka sate, la t’a pa naan tẽngã me t’a na n kell n pa wakat fãa ye. Wilgdame me tɩ b tagsdame tɩ Wẽnnaam naana ninsaalbã tɩ b vɩɩmd yʋʋm a wãn bal la b ki.

Biiblã sẽn yete: Biiblã yeta vẽeneg woto: Wẽnnaam “yẽbga dũniyã a yẽbgr zugu; a kõn tol n dĩms abada.” (Yɩɩl Sõamyã 104:5) A paasame tɩ “nin-tɩrs na n sooga dũniyã, la bãmb na n zĩnda a zug wakat sẽn ka sɛta.”—Yɩɩl Sõamyã 37:29.

Dẽnd yaa vẽeneg tɩ nebã tagsg Armagedõ zugã pa zems ne Biiblã sẽn yetã ye. Yaa nebã sẽn yetã la sɩd bɩ, bɩ yaa Biiblã sẽn yetã?

[Tẽngr note]