Wẽnnaam Gomdã Sẽn Yete
Bõe n na n paam tũudum toor-toorã tɩ yaa koe-noogo?
Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.
1. Tũudum fãa yaa sõma bɩ?
Yaa vẽeneg tɩ neb sẽn baood Wẽnnaam ne pʋ-peelem bee tũudum toor-toorã pʋsẽ. Wẽnnaam nee nin-kãensã, la b yell pak-a lame me. La bʋko, tʋʋm-beed wʋsg la neb kẽer tʋmd tũudmã yʋʋr yĩnga. Pĩnd wẽndẽ, tũudmã taoor dãmb pʋd n namsa neb nins sẽn da kɩɩsd-bã ne wẽnem wʋsgo. (2 Korẽnt dãmba 4:3, 4; 11:13-15) Rũndã-rũndã, kiba-kɩtbã wilgdame tɩ tũudum kẽer taoor dãmb kẽesda b toog teerorismã wall zabã pʋgẽ. Sãnda tara taal kom-bõonegã namsgã la b yõgbã pʋgẽ.—Karm-y Matɩe 24:3-5, 11, 12.
Biiblã wilgame tɩ tũudum bugs a yiib n be: Tũudum hakɩka, la ziri tũudum. Ziri tũudmã pa togsd sɩd Wẽnnaam zug ye. La Wẽnnaam a Zeova yaool n datame tɩ nebã bãng sɩdã.—Karm-y 1 Tɩmote 2:3-5.
2. Bõe n na n paam tũudum toor-toorã tɩ yaa koe-noogo?
Tũudum wʋsg taoor dãmb sẽn yet tɩ b nonga Wẽnnaam, la b yaool n zãmsd nebã yɛl sẽn yaa ziri wã, pa noom Wẽnnaam ye. Tũudum kãens nebã pʋd n nonga dũni-kãngã sẽn be a Sʋɩtãan nugẽ wã zoodo. (Zak 4:4; 1 Zã 5:19) Biiblã goma tũudum nins fãa sẽn bas Wẽnnaam daabã maaneg n teend ãdem-biisã goosneema-rãmbã yelle, n mak-b ne pʋg-yoodre. Biiblã boola pʋg-yood-kãng tɩ “Babilon kãsenga,” bala, a Nowe wakatẽ sa-kãsengã poore, yaa Babilon la ziri tũudmã sɩng-yã. Ka la bilfu, Wẽnnaam na n sãama tũudum nins fãa sẽn zãmsd nebã ziri la b namsd-bã.—Karm-y Wilgr 17:1, 2, 5, 17; 18:8, 23, 24.
3. Wãn to la Wẽnnaam na n kɩt tɩ sũ-noog zĩnd dũniyã gill zugu?
Wẽnnaam sẽn na n sãam ziri tũudum toor-toorã ka la bilfã yaa koe-noogo. Na n kɩtame tɩ nebã paam b mens ne weoogrã. Ziri tũudum kõn le zĩnd n belg neb la a welg-b ye. Sẽn na n vɩɩmd-b wakat kãngã fãa na n waoogda Wẽnnaam sɩd-sɩdã zems-n-taar pʋgẽ.—Karm-y Ezai 11:9; Wilgr 18:20, 21; 21:3, 4.
4. Sẽn baood-b Wẽnnaam ne pʋ-peelmã segd n maana bõe?
A Zeova pa yĩm pʋ-peelem dãmb nins sẽn be ziri tũudum toor-toorã pʋsẽ wã yell ye. A zãmsda nin-kãensã sɩdã, tɩ rẽ kɩt tɩ b wat n naagd tũudum hakɩkã nebã.—Karm-y Miise 4:2, 5.
A Zeova reegda ned ning fãa sẽn dat n maan a raabã a nin-buiidã sʋka. Baa d sã n sɩng a tũub tɩ d zo-rãmb la d roagdb sũur pa noom ne-do, d pa bõn ye. D paama Wẽnnaam zoodo, tẽed-n-taas sẽn nong-do, la d na n wa paam vɩɩm sẽn kõn sa me.—Karm-y Mark 10:29, 30; 2 Korẽnt dãmb 6:17, 18.
[Foto seb-neng 27]
Y sã n dat vẽnegr n paase, bɩ y ges Biiblã sɩd yetame tɩ bõe? sebrã sak 15 la 16. A Zeova Kaset rãmbã n yiis-a.
[Foto soaadba 26]
The Complete Encyclopedia of Illustration/J. G. Heck