Baa neb wʋsg sẽn daad taab yamã d tõe n yɩɩ pʋ-peelem dãmba

‘Tõnd dat n maana bũmb fãa tɩ zemse.’—HEBRE DÃMBA 13:18.

YAA sɩd tɩ d roga ne yel-wẽndã. Sẽn paase, neb wʋsg maanda wẽnga, t’a Sʋɩtãan maood n dat tɩ tõnd me maan wẽnga. La d tõe n kell n yɩɩ pʋ-peelem dãmba. Wãn to? Yaa d sẽn na n bao Wẽnnaam zood la d tũud Biiblã sẽn yaa a Gomdã saglsã. Ad makr a yiib sẽn wilgd rẽ.

BIIBLÃ SAGLGA: “Da yɩ-y wa dũni-kãngã nebã ye.”—Rom dãmba 12:2, Kãab-paalgã Koe-noogo.

Ned sẽn tũ saglgã: A Guilherme yaa tʋʋmd taoor soab sẽn yit Berzilli. A wilgame tɩ yɩl n tõog n yɩ pʋ-peelem soab pa nana, n yeel woto: “Yõodã raab yĩng wall wags-taabã yĩng tõe n kɩtame tɩ tʋʋmd taoor soab sɩng pʋ-lik tʋʋma. Neb wʋsg tagsdame tɩ f sã n kõ ned ligd sẽn na yɩl n paam bũmb f sẽn pa segd ne, wall f sã n deeg ned ligd n sõng-a t’a paam bũmb a sẽn pa segd ne, pa wẽng ye. F sã n yaa tʋʋmd taoor soab tɩ f tʋʋmdã pa kẽnd wa f sẽn datã, yɩl n tõog n yɩ pʋ-peelem soab pa nana ye.”

Baasgo, a Guilherme yaa pʋ-peelem soaba. A yeela woto: “Baa baoodb wʋsg sẽn pa pʋ-peelem dãmbã, y tõe n yɩɩ pʋ-peelem soaba. Bee ne yãmb mengã yam-yãkre. Biiblã sõnga maam tɩ m bãng tɩ pʋ-peelem soab nafdame. Pʋ-peelem soab tara sũur-kaset sẽn yaa sõma, t’a yamã gãe bãane. Sẽn paase, a nanda a menga.”

BIIBLÃ SAGLGA: “Neb nins sẽn dat n yɩ arzɛgs rãmbã kẽeda makr la kũusr pʋgẽ, la ratem wʋsg sẽn yaa yalemdo, sẽn sãamd bãmba n kẽesd bãmb toog ne sãoong pʋgẽ. Tɩ bõe, ligd datem yaa bõn-wẽns fãa yẽgre. La ligd datem sẽn so kẽerã, b basa tẽebo, n kẽes b mens to-kãseng pʋgẽ.”—1 Tɩmote 6:9, 10.

Ned sẽn tũ saglgã: A André ne a tʋm-tʋmdbã ningda kamera-rãmb la alarm-dãmba. A mi n tʋmda ne bal-tãoodb ekip a ye. Daar a ye, a kẽnga ekipã taoor soab nengẽ n na n tɩ reeg a ligdi. A ta n mika neb a taab sẽn gũud b ligdi. Ra yaa ball sẽn tão n sa, tɩ b zĩ n sõt ligd ning nebã sẽn yao n kẽ wã. Zĩigã sẽn da zʋʋgã, taoor soabã yɩɩ tao-tao n sõd a André ne neb a taabã ligdã n kõ-ba.

Ad a André sẽn yeele: “Mam sẽn ta sorẽ, m mikame tɩ taoor soabã yaoa maam tɩ zʋʋge. Mam da miime t’a pa tõe n bãng ned ning a sẽn yao tɩ zʋʋgã, la tɩ yaa tɩlae t’a bao ligd ning sẽn menemã n lebse. Rẽ n so tɩ mam yãk yam n na n tɩ lebs ligdã. Baa sorã sẽn da pid ne nebã, mam wẽdgame n ta taoor soabã nengẽ. Ling-a-la wʋsgo, t’a yeel tɩ ned zɩ n lebs yẽ ligd ye.”

A André paasa woto: “Mam sẽn maan pʋ-peelmã kɩtame tɩ taoor soabã nand-ma. Rẽ sẽn maanã kaoosame masã. La neb nins sẽn da tʋmd be wakat kãngã sʋka, maam m ye bal la b ket n boondẽ. Biiblã saglsã tũub sẽn sõng maam tɩ m tar yʋ-noogã, noom-m lame.”

D sẽn mi tɩ ne Wẽnnaam sõngre, d tõe n kell n yɩɩ pʋ-peelem dãmbã kengda raoodo. La ned pa tõe tɩ ninsaal yam daabã sa zãng ye. Bũmb ning sẽn kɩt tɩ ninsaal yam daabã beẽ wã yɩɩda ninsaal pãnga. La rẽ yĩnga woto rat n yeelame tɩ ninsaal yam daabã pa na n tol n sa bɩ? Sõsg ning sẽn pʋgdã wilgda Biiblã sẽn leokd sok-kãngã to-to.