Sokr a 2: Bõe n be kũum poore?

A ROMAN yãadmẽ, a zoa la mobill fão n kʋ. Ad a sẽn yeele: “Mam zoa wã kũum sãama m sũur wʋsgo. Maana yʋʋm tɩ m da ket n sokd m meng bũmb ning sẽn be kũum poorã.”

Bõe yĩng tɩ sokrã zemse? Ned kae n dat n ki ye. Baa d yʋʋm sẽn zem to-to, d pa rat n ki ye. Neb wʋsg yɛɛsda bũmb ning sẽn be kũum poorã.

Wãn to la kẽer leokda? Wʋsg tẽedame tɩ ninsaal sã n ki, bũmb n yit a yĩngẽ wã n ket n vɩ. B tagsdame tɩ nin-sõma wã paamda keoor saasẽ, tɩ nin-wẽnsã kẽnd bug-tẽnga. Kẽer me tagsdame tɩ ned sã n ki, saame, la tɩ b wat n yĩma a yell fasɩ.

B leoorã wilgda bõe? Ninsaal kũum poore, bũmb sã n yit a yĩngẽ wã n ket n vɩya, rẽnd a pa ki ye. La kũum poore, sã n saame, rẽnd vɩɩmã pa tar yõod ye. Sẽn tagsd-b woto wã tõe n yãka yam n vɩ yaare, n yet b mens woto: “Bɩ d rɩ la d yũ, tɩ bõe, beoogo, tõnd na n kiime.”—1 Korẽnt dãmba 15:32.

Bõe la Biiblã yeta? Biiblã pa wilg tɩ ninsaal kũum poore, bũmb n yit a yĩngẽ wã n ket n vɩ ye. Wẽnnaam vẽnega rĩm a Salomo t’a yeel woto: “Nin-vɩɩs miime tɩ b na n kiime. La kũum ka mi bũmb ye.” (Koɛɛg Soaba 9:5) Ned sã n ki, a “ka mi bũmb” ning sẽn maand-a, a pa tõe n tags wall maan bũmb ye. Dẽnd sẽn ki-bã pa tõe n sõng sẽn vɩ-bã wall maan-b wẽng ye.

Hal sɩngrẽ wã, Wẽnnaam da pa rat tɩ ninsaalbã kiidẽ wa wʋsg sẽn tẽedã ye. A naana d yaab a Ãdem t’a ra na n vɩɩmd wakat sẽn kõn sa tẽngã zugu. Yɩɩ Wẽnnaam sẽn wa n wilgd a Ãdem kɩɩsg sẽn wat ne sɩbgr ningã la a gom kũum yell pipi. Tɩɩg a ye biis la a yeel a Ãdem t’a ra rɩ, la t’a sã n kɩɩs n dɩ, a “na n kiime.” (Sɩngre 2:17) A Ãdem ne a Hawa sã n da kell n sak Wẽnnaam, bãmb ne b kambã la b yagensã fãa sẽn da na n yɩ sakdbã na n vɩɩmda tẽngã zug wakat sẽn kõn sa.

La a Ãdem pa kelg Wẽnnaam ye. A sẽn kɩɩs Wẽnnaamã, a maana yel-wẽnde. Rẽ la a sẽn ki wã. (Rom dãmba 6:23) Bũmb pa yi a Ãdem yĩngẽ wã n kell n vɩɩmd ye. A kũumã poore, a ra pa le be ye. Wẽnnaam da yeel-a-la woto: “Yaa ne fo neng tʋʋlg la f na n paam dɩɩb n dɩ n wa tãag f sẽn na n lebg tẽngã tom fo sẽn yi a pʋgẽ wã. Tɩ bõe, fo yaa tẽng tom, la fo na n le lebga tẽng tom yɛsa.” (Sɩngre 3:19) D fãa sẽn yaa a Ãdem yagensã, d rogda ne yel-wẽndã, tɩ rẽ kɩt tɩ d kiidẽ.—Rom dãmba 5:12.

Baa a Ãdem sẽn kɩɩsã, Wẽnnaam sẽn sɩng n dat t’a Ãdem kamb la a yagens sẽn zems zãng vɩɩmd tẽngã zugã na n pidame. (Sɩngre 1:28; Ezai 55:11) Ka la bilfu, a Zeova na n vʋʋga neb wʋsg sẽn ki. Tʋm-tʋmd a Poll goma rẽ yelle, n yeel woto: “Nin-tɩrsã la sẽn pa-b tɩrsã me vʋʋgr na n zĩndame.”—Tʋʋma 24:15, MN.

Y sã n dat kibay n paas bũmb ning sẽn be kũum poorã wɛɛngẽ bɩ y ges Biiblã sɩd yetame tɩ bõe? sebrã sak a 6. A Zeova Kaset rãmbã n yiis seb-kãnga.

Bõe la a Zezi yeel kũumã wɛɛngẽ?

A Zezi ra pa yet tɩ kũum pa na n vʋʋge, wa a wakatẽ tũudum taoor dãmb kẽer sẽn da yetã ye. (Luk 20:27) A ra pa yet me tɩ ninsaal kũum poore, bũmb n yit a yĩngẽ wã n ket n vɩ ye. Ad a sẽn da yet bũmb ninga:

Kũum yaa wa gõeem. A Zezi zoa a Lazaar sẽn wa n ki wã, a yeela woto: “Tõnd zoa a Lazaar gõeeme, la mam na n kẽng n tɩ neka yẽnda.” A karen-biisã sẽn pa wʋm a gomdã võorã yeelame: “Zusoaba, yẽ sã n gõe, a na n yikame.” Kibarã paasa woto: “A Zezi gomda a kũum yelle, la bãmb tagsame tɩ b gomda a gõeem yelle. Dẽ, a Zezi yeela bãmb vẽenega: ‘A Lazaar kiime.’”—Zã 11:11-14.

Kũum na n vʋʋgame. A Zezi sẽn ta a Lazaar ba-yirã, a belsa a Lazaar tão a Mart n yeele: “Fo tãoã na n vʋʋgame.” A paasa woto: “Mam yaa vʋʋgr la vɩɩm. Ned ning sẽn tẽed maam, baa yẽ sã n ki, a na paam vɩɩm.” A Zezi ra pa gomd gom-vɩɩd ye. Baa a Lazaar sẽn da ki tɩ rab-naasẽ wã, a vʋʋg-a lame, tɩ neb wʋsg yã.—Zã 11:23, 25, 38-45.

A Zezi goma kũum vʋʋgrã yell ne tʋm-tʋmd a Zã me. Wilgr sebrã pʋgẽ, a pʋlmame tɩ wakat n wat tɩ sẽn ki-bã fãa na n vʋʋge.—Wilgri 20:13.