Sokr a 3: Bõe yĩng tɩ ninsaalbã namsdẽ?

A IAN ba wã ra yaa rã-yũud-kãaga. Baa bũmb sẽn pa paoog a Ian a yãadmẽ wã, a ra getame t’a ba wã pa nong-a ye. A yeela woto: “Mam da pa nong m ba wã sõma ye. Sẽn yɩɩd fãa, yaa a rã-yũurã n paas a sẽn da namsd m ma wã yĩnga.” A Ian bɩʋʋng zugẽ, a wa n sokda a meng Wẽnnaam sã n sɩd beeme, la t’a sã n beẽ, bõe yĩng t’a bas tɩ ninsaalbã namsdẽ?

Bõe yĩng tɩ sokrã zemse? Baa y zu-loeesã pa waooge, y sẽn nong tɩrlmã yĩnga, y sã n yã b sẽn namsd bʋʋm soaba, zabd-y lame. La sã n yaa yãmb mengã n namsd wa a Ian, pa rẽ bɩ y ned n ka laafɩ wall y ned n maan kaalem, sãamda y sũur n yɩɩda.

Wãn to la kẽer leokda? Kẽer tẽedame tɩ Wẽnnaam basa tõnd tɩ d namsdẽ, sẽn na yɩl tɩ d lebg sik-m-mens rãmb la nimbãan-zoɛtba. La sãnda tagsdame tɩ ninsaal fãa reng n vɩɩmda pĩnda, la tɩ sẽn namsd-bã yaooda yel-wẽn b sẽn maan b pĩnd vɩɩmã sasa.

B leoorã wilgda bõe? Wilgdame tɩ ninsaalbã sẽn namsdã pa sãamd Wẽnnaam sũuri, tɩ kɩt tɩ yaa toog tɩ d nong-a. Sẽn paase, wilgdame t’a yaa toaaga.

Bõe la Biiblã yeta? Biiblã wilga vẽeneg tɩ pa Wẽnnaam n kɩtd tɩ ninsaalbã namsdẽ, n yeel woto: “Ned sã n paam makre, bɩ a ra yeel tɩ yaa Wẽnnaam n makd yẽ ye. Tɩ bõe, bũmb ka tõe n mak Wẽnnaam tɩ b maan wẽng ye, la Wẽnnaam mengã ka makd ned ba a ye t’a maan wẽng ye.” (Zak 1:13) Biiblã sẽn wilgd a Zeova sẽn yaa Wẽnnaam ning buudã sõngdame me tɩ d bãng tɩ pa yẽ n kɩtd tɩ ninsaalbã namsdẽ ye. Bõe yĩng tɩ d yet woto?

Pipi, Wẽnnaam yaa nonglem. (1 Zã 4:8) Biiblã rɩka makr sẽn na yɩl tɩ d wʋm rẽ võore. A maka Wẽnnaam sẽn nong tõnd to-to wã ne bi-pɛɛlg ma sẽn nong-a to-to wã. Wẽnnaam sokame: “Pag tõe n yĩma biig ning yẽ sẽn yẽsemdã yell bɩ? A tõeeme n ka zoe biig ning yẽ sẽn dogã nimbãaneg bɩ?” La a paase: “Baa yẽ sã n yĩmi, mam ka na n tol n yĩm fo yell ye.” (Ezai 49:15) Pag sẽn nong a biig tõe n maan-a-la wẽng sɩda? Bũmb sã n namsd biiga, a roagdbã pʋd n maanda b sẽn tõe n na n yols-a. Rẽnd Wẽnnaam pa sɩbgd bʋʋm soab ye.—Sɩngre 18:25.

Baasgo, bʋʋm dãmb n namsde. Rẽnd tõe tɩ y sokda y meng woto: ‘Tõnd yell sã n paka Wẽnnaam, t’a pãngã me ka koaka, bõe yĩng t’a pa kɩtd tɩ namsgã sa?’

Wẽnnaam sẽn bas tɩ namsgã ket n beẽ wã tara võore. Ad bʋʋm a ye: Naoor wʋsgo, yaa neb n yaa sabab tɩ b taab namsdẽ. Nin-toos la pãens rãmb wʋsg pa tol n dat n toeem ye. Rẽnd bũmb a ye Wẽnnaam sẽn na n maan tɩ namsgã sa, yaa sãam nin-kãens buudã.

Tʋm-tʋmd a Pɩɛɛr wilga bũmb ning sẽn kɩt tɩ Wẽnnaam nan pa sãam nin-wẽnsã, n yeel woto: “Zusoabã ka kaoosd tɩ pids bãmb kãabg wa neb kẽer sẽn tagsdã ye. La bãmb sẽn ka rat tɩ ned ba a ye sãamã yĩnga, bãmb maanda sũ-mar ne yãmb n dat tɩ yãmb fãa yam tek tɩ y kos sugri.” (2 Pɩɛɛr 3:9) Wẽnnaam a Zeova sẽn maand sũ-marã yaa a sẽn nong ninsaalbã la a zoet b nimbãanegã yĩnga.

La ka la bilfu, a Zeova na n kaoa bʋʋdo. A na n “lebsa neb nins sẽn namsd [bʋʋm dãmbã] toogo.” B sẽn maand b taab pãngã yĩnga, b “sɩbgrã na n yɩɩ sãoong sẽn ka sɛta.”—2 Tesalonik rãmba 1:6-9.

Y sã n dat kibay n paas sẽn na yɩl n bãng bũmb ning sẽn kɩt tɩ Wẽnnaam bas tɩ ninsaalbã namsdẽ wã, bɩ y ges Biiblã sɩd yetame tɩ bõe? sebrã sak a 11. A Zeova Kaset rãmbã n yiis seb-kãnga.

Bõe la a Zezi yeel namsgã wɛɛngẽ?

A Zezi pa ning Wẽnnaam taal a wakatẽ nebã sẽn da namsdã yĩng ye. Ad a sẽn wilgi:

A Zezi wilgame tɩ Wẽnnaam pa sɩbgd bʋʋm dãmb ye. A sãooga bãad-dãmba, põyã, la zoense. (Matɩe 15:30) Yel-soalem nins a sẽn maanã wilgda bũmb a yiibu: Pipi, a pa tũnug ne pãng ning Wẽnnaam sẽn kõ-a wã n nams ned ye. A yolsa neb sẽn da namsde. Yiib-n-soaba, a ra pa sõngd nebã a we n sõng-b bal ye. A sã n da yã nebã sẽn namsda, a ‘zoeta b nimbãanega.’ (Matɩe 20:29-34) Zĩ-kãng wɛɛngẽ, a Zezi rɩka a Ba wã togs-n-taar kɛpɩ. Rẽnd a no-goamã la a yel-manesmã wilgdame tɩ ninsaalbã sẽn namsdã sãamda Wẽnnaam sũuri, la t’a rat n yols-b lame.—Zã 14:7, 9.

A Zezi wilgame tɩ naoor wʋsgo, yaa a Sʋɩtãan n kɩtd tɩ ninsaalbã namsdẽ. A yeelame t’a Sʋɩtãan “yaa nin-kʋʋd hal sɩngrẽ.” (Zã 8:44) A paasame t’a Sʋɩtãan la “dũniyã naaba,” la a soab ning “sẽn belgd dũniyã fãa wã.”—Zã 12:31; Wilgri 12:9.

A Zezi wilgame tɩ wakat n wat tɩ namsg buud fãa na n sa. A yeela a karen-biisã tɩ b pʋʋs woto: “Tõnd Ba sẽn be arzãna, . . . tɩ yãmb soolem wa, tɩ yãmb daab maan dũniyã zug wa sẽn maand arzãna.” (Matɩe 6:9, 10) Wẽnnaam soolmã bɩ a Rĩungã sã n wa, namsg pa na n le zĩnd tẽngã zugu, wa namsg sẽn pa be saasẽ wã.

Wilgr sebrã pʋgẽ, a Zezi vẽnega tʋm-tʋmd a Zã t’a yã vɩɩmã sẽn na n yɩ to-to tẽngã zug Wẽnnaam Rĩungã naam sasa. Wakat kãnga, Wẽnnaam “na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbr wall toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 1:1; 21:3, 4.