Sogsg Biiblã sẽn leokde

Wẽnnaam tara yʋʋr bɩ?

Tõnd zakã ned kam fãa tara yʋ-peelle. Baa rũms kẽer tara yʋy. La Wẽnnaam tara yʋʋr bɩ? B boond-a-la Biiblã pʋgẽ ne naam yʋy wʋsg wala Wẽnnaam sẽn tõe fãa, Saasẽ pãng soaba, la Naanda. La Biiblã wilgame me tɩ Wẽnnaam tara yʋ-peelle.—Karm-y Ezai 42:8.

Biibl-dãmb wʋsg pʋsẽ, Wẽnnaam yʋ-peellã bee Yɩɩl Sõamyã 83:18 pʋgẽ. Les Saintes Écritures — Traduction du monde nouveau wã pʋgẽ, vɛrse kãng yeta woto: “Fo yʋʋr sẽn yaa a Zeova wã, foo f yembr bal n ka to dũniyã tɛk fãa.”

Bõe yĩng tɩ d segd n pʋt Wẽnnaam yʋ-peellã?

Wẽnnaam ratame tɩ d pʋt a yʋ-peellã. D sã n sõsd ne ned d sẽn nonge, wala makre, d zoa, d wae n pʋta a yʋ-peellã. Pa segd n maand woto ne Wẽnnaam me sɩda? Sẽn paase, a Zezi wilgame tɩ zemsame tɩ d pʋt Wẽnnaam yʋ-peellã.—Karm-y Matɩe 6:9; Zã 17:26.

La d sã n dat n lebg Wẽnnaam zoa, a yʋʋrã bãngr bal pa sek ye. Wala makre, d segd n baoa sogs-kãensã leoore: Wẽnnaam yaa wãn to? D sɩd tõe n yɩ a zoa bɩ? Y tõe n paam sogs-kãensã leoor Biiblã pʋgẽ.