Sogsg Biiblã sẽn leokde

D tõe n paama d yel-wẽnã sugr bɩ?

Biiblã wilgame tɩ ninsaalbã fãa yaa yel-wẽn-maandba. Yaa d yaab a Ãdem yel-wẽndã n long tõndo. Yaa rẽ la d sẽn mi n tudg n maan bũmb n wa maand d bãngẽ wã. La a Zezi Kirist kii tõnd yel-wẽnã yĩnga. Rẽ paka sor tɩ d tõe n paam d yel-wẽnã sũgri. Woto yaa bark sẽn yit Wẽnnaam nengẽ.—Karm-y Rom dãmb 3:23, 24.

Neb kẽer maana yel-wẽn-kãsemse, n sãmbd Wẽnnaam sã n na n sak n kõ-b-la sugri. La Wẽnnaam Gomdã yeela woto: ‘A Zezi Kirist zɩɩmã pekda tõnd n yiisd tõnd yel-wẽnã fãa.’ (1 Zã 1:7) Ned sã n maan yel-wẽnde, baa yaa yel-wẽn-kãsenga, a sã n tek yam n kos sugri, a Zeova kõt-a-la sugri.—Karm-y Ezai 1:18.

Bõe la d segd n maan n paam d yel-wẽnã sugri?

D sã n dat tɩ Wẽnnaam kõ-d sugri, d segd n bao n bãng-a lame, a sẽn dat la a sẽn pa rate, la d tũ a saglsã. (Zã 17:3) Ned sẽn maan yel-wẽnd sã n tek yam n kos sugr la a modgd sẽn na yɩl n da le maane, a Zeova kõt-a-la sugri.—Karm-y Tʋʋm 3:19.

Paam n ta Wẽnnaam yam pa toog wʋsg ye. Bala a Zeova mii tõnd pãn-komsmã. A yaa nimbãan-zoɛt la sõmblem soaba. Woto fãa pa kɩt tɩ y rat n bao n bãng y sẽn na n maan to-to n ta a yam sɩda?—Karm-y Yɩɩl Sõamyã 103:13, 14.