ZÃMS-Y Y KAMBÃ

Bi-bɛɛg ning yell d sẽn na n gomã la sẽn be fotã zug n gomd ne a Zezi wã. A sũur sãama ne tʋʋm-wẽns nins a sẽn da tʋmã. A kosa a Zezi woto: “Yãmb sã n wa reeg y naamã, bɩ y tẽeg mam yelle.” Wa fotã sẽn wilgdã, a Zezi me gomda ne bi-bɛɛgã. Fo mii bũmb ning a Zezi sẽn yet-a wã bɩ?—a A pʋlm-a-la woto: “Fo na n zĩnda ne maam [“arzãnã pʋgẽ,” MN].”

Fo tagsdame tɩ arzãnã na n yɩɩ wãn to?— Sẽn na yɩl n bãng fo leokrã sã n zemsame, d na n goma arzãn ning Wẽnnaam sẽn maan n kõ d yaab a Ãdem ne a pag a Hawa wã yelle. Arzãn kãng ra bee yɛ? A ra bee saasẽ bɩ, bɩ tẽngã zugu?—

Fo sã n yeelame t’a ra bee tẽngã zugu, f bee bʋʋm. A Zezi sẽn pʋlem bi-bɛɛgã t’a na n zĩnda arzãnã pʋgẽ wã, rat n yeelame t’a na n vɩɩmda tẽngã zug wakat ning a sẽn na n wa lebg arzãnã. La arzãn kãng na n yɩɩ wãn to?— Bɩ d gom rẽ yelle.

Biiblã wilgame tɩ Wẽnnaam a Zeova sẽn naan d yaab a Ãdem ne a Hawa poore, a ning-b-la tẽngã zug ka, zĩig b sẽn da boond tɩ Edɛn. Fo tõe n mamsa Edɛn sẽn da yaa neer to-to wã tɩ d ges bɩ?— Rũndã-rũndã, zĩig ka be tẽngã zug t’a neerem ta Edɛn ye.

La m sok-f wɛ. A Zezi na n zĩnda tẽngã zug ne bi-bɛɛg ning sẽn tek yam n kos sugrã bɩ?— Ayo. A Zezi na n bee saasẽ n dɩt naam tẽngã sẽn lebg arzãnã zugu. La a Zezi sẽn na n zĩnd ne-a wã yaa t’a na n vʋʋg-a lame, la a kɩt tɩ b ges a yelle. La bõe yĩng t’a Zezi na n bas ned sẽn da tʋm tʋʋm-wẽns t’a vɩɩmd arzãnã pʋgẽ?— Bɩ d gom rẽ me yelle.

Yaa sɩd tɩ bi-bɛɛgã ra tʋma wẽng wʋsgo. La neb milyaar-rãmb sẽn vɩɩmd tẽngã zug me maana woto. La wʋsgã sẽn tʋm wẽngã yaa b sẽn da pa mi a Zeova, la b sẽn ka paam tɩ b zãms-b a raabã yĩnga.

Neb a woto, n paas bi-bɛɛg ning a Zezi sẽn da gomd ne ra-lukã zugã na n vʋʋgame, n vɩɩmd tẽngã sẽn na n lebg arzãnã pʋgẽ. B na n zãms-b-la Wẽnnaam sẽn dat tɩ d maan bũmb ninsã. Woto, b na n tõog n wilgame tɩ b nonga a Zeova.

Fo mi b sẽn tõe n wilg to-to tɩ b nonga a Zeova bɩ?— Yaa b sẽn na n maan a raabã. D sã n wa vɩ arzãnã pʋgẽ, tɩ nebã fãa nong a Zeova la b taabã, pa na n yɩ noog sɩda?