Ãnda n yaa sabab tɩ zabã la namsgã beẽ?

Dũni gill pipi zabrã saa yʋʋmd 1918 sɩpaolg kiuug rasem 11 wã daare. Nebã basa b tʋʋma, n kɩdem sũ-noog la b sao soɛyã zutu. La sũ-noogã pa kaoos ye. Pa yã n kaoos la b bãng tɩ yell a to n wa ye. Yel-kãng sẽn kʋ neb ninsã sõor yɩɩga zabrã sẽn kʋ b rãmbã hal zĩig sẽn zãre.

Yʋʋmd 1918 sigr kiuugã, bãag n yõk sodaas wʋsg sẽn da be Fãrens n zabdẽ. B ra boonda bã-kãng tɩ girip ɛspayõll. Tao-tao bala, b bãngame tɩ sɩd yaa bã-wẽnga. Kiuug a wãn pʋgẽ, a sẽn kʋ Amerik sodaas nins sẽn da be Fãrensã sõor yɩɩga bɛɛbã sẽn kʋ wã. Zabrã sẽn wa n sa tɩ sodaasã leb b tẽnsẽ wã me, bãagã longa neb a taaba, n piuug tao-tao dũniyã gill zugu.

Yʋʋm nins sẽn pʋgl zabrã yɩɩ kom la talemdo. Zabrã sẽn wa n sa yʋʋmd 1918 wã tɩ Erop soolmã neb wʋsg ra pa tar dɩɩb n dɩtẽ ye. Yʋʋmd 1923, Alemayn ligdã pãng booga hal wʋsgo. Yʋʋm a yoob poore, yel-beed sẽn yɩɩg rẽ n zĩndi. Dũniyã gill zugu, ligdã pãng booga wʋsgo, tɩ nebã fãa lebg naong rãmba. La dũni gill zabr a yiib-n-soabã sɩnga yʋʋmd 1939 wã, tɩ yɩ wa pipi soabã n kell n kẽng taoore. Bõe n wa ne yel-kãensã fãa?

YAOOLEM WAKATÃ BÃNDE

Biiblã bãngr-goam sõngd-d lame tɩ d wʋmd yɛl kẽer sẽn maan pĩnd wẽndẽ wã võore. Yaa woto me ne dũni gill pipi zabrã. A Zezi Kirist reng n wilgame tɩ wakat n wat tɩ ‘buud a yembr na n yik zabr ne buud a to,’ la tɩ kom ne bã-longds na n zĩnda zĩig-zĩiga. (Matɩe 24:3, 7; Luk 21:10, 11) A yeela a karen-biisã tɩ yel-be-kãens na n yɩɩ yaoolem wakatã bãnde. Wilgr sebrã goma rẽ yell ball-balle, n wilg tɩ zabr n na n zĩnd saasẽ, n wa ne tood dũniyã zugu.—Ges-y zĩ-gũbr ning gom-zug sẽn yaa: “Zabr n zĩnd tẽngã zug t’a to zĩnd saasẽ.”

Wilgr sebrã goma wed-rʋʋdb a naas yell me. Wed-rʋʋdb a tãab n makd yel-beed nins yell a Zezi sẽn gomã. Yaa zaba, kom la bã-longdse. (Ges-y zĩ-gũbr ning gom-zug sẽn yaa: “Wed-rʋʋdb a naasã sɩd zoetame bɩ?”) Vẽenega, dũni gill pipi zabrã tɛk n tãag rũndã, yaa tood woo toodo. Sẽn paase, Biiblã wilgame tɩ yaa a Sʋɩtãan n yɩ sabab tɩ toodã sɩnge. (1 Zã 5:19) La rẽ yĩnga, a pãngã na n talla tɛk bɩ?

Wilgr sebrã wilgame me t’a Sʋɩtãan wakatã keta bilfu. (Wilgri 12:12) Yaa rẽ n kɩt t’a sũurã puugdẽ, t’a wat ne tood wʋsg tẽngã zugu. Dẽnd toodã sẽn be tẽngã zugã wilgdame t’a Sʋɩtãan sãoongã kolgdame.

A ZEZI NA N SÃAMA A SƲƖTÃAN TƲƲMÃ

Hakɩka, dũni gill pipi zabrã toeema yɛl wʋsgo. Rẽ tɛka, zabã lebga wẽns wʋsgo, tẽnsã taoor-dãmb kɩɩsgã paama pãnga, tɩ nebã pa le kɩs b taoor-dãmbã sɩd ye. Zab-kãng leb n yɩɩ kaset sẽn wilgd tɩ b riga a Sʋɩtãan saasẽ. (Wilgri 12:9) A maana wa na-toaag sẽn mi tɩ pa na n kaoos tɩ b sik-a a naamẽ wã. A sãoongã wakat sã n ta, tood nins dũni gill pipi zabrã sẽn wa ne wã me na n saame.

Biiblã bãngr-goam sẽn yet bũmb ninsã kɩtame tɩ d tõe n kɩs sɩd tɩ ka la bilfu, a Zezi Kirist sẽn yaa d Rĩm sẽn be saasẽ wã na n ‘sãama Sʋɩtãanã tʋʋmã.’ (1 Zã 3:8) Neb milyõ-rãmb n pʋʋsd n kotẽ tɩ Wẽnnaam Rĩungã wa. Yãmb pʋʋsda woto bɩ? Rĩun-kãng maasem yĩnga, a Sʋɩtãan daab pa na n le maan tẽngã zug ye. Yaa Wẽnnaam daabã n na n maane, tɩ naf wẽn-sakdbã. (Matɩe 6:9, 10) Wẽnnaam Rĩungã sã n wa rɩt naam tẽngã zugu, dũni gill zabr pa na n le zĩnd ye. Zabr meng pa na n le zĩnd ye. (Yɩɩl Sõamyã 46:10) Y sã n dat n wa vɩɩmd wakat ning laafɩ sẽn na n zĩnd dũniyã gill zugã, bɩ y bao n bãng Wẽnnaam Rĩungã sẽn yaa bũmb ninga.—Ezai 9:5, 6.