M da pa yit tɩ m pa zã m bug-raoogã ye

M KIBARÃ:

M doga Rom tẽn-kɩreng a yembr pʋgẽ. Beenẽ ra yaa naong-rãmb zĩiga. Yaa be la m bɩ. Vɩɩmã ra pa nana be ye. Mam zɩɩ n bãng m ma-roakã ye. Maam ne m baaba me ra pa wʋmd taab ye. M sẽn wa n bɩtẽ wã, bi-beesã n da yaa m tũud-n-taase.

M sẽn wa n tar yʋʋm piiigã, m sɩnga zuubu. Mam sẽn zoe n yi zakẽ pipi wã yɩɩ m sẽn wa n tar yʋʋm 12. Naoor wʋsgo, m baaba waa komisariya wã n wa tall maam n kuili. M da wẽeda no-kɛɛm ne nebã wakat fãa. M da yaa nen-kɛglem soaba, la ned sũur sẽn puug wʋsg ne neb a taabã. M sẽn wa n tar yʋʋm 14, m tolg n yiime n bas zakã. M sɩnga dorgã yũubu, la m da gõe soayã noy. Mam sẽn da pa tar zĩig n gõe wã, m mii n kaoo mobill n kẽ n gãand n vẽeg beoogo. Rẽ poore, m da baooda koom zĩiga, sẽn na yɩl n paam n so.

M wa n tolg n paama minim zuubã wɛɛngẽ. M da fãada nebã kordo, la m soosd n kẽed zag-bɛdã pʋsẽ ne yʋng n zuuda. Mam yʋʋrã waa n yii wagdmã yĩnga. Pa yã n kaoos la m tɩ naag bi-bees sulli, tɩ d tɩ kẽnd n kaood bãnk-rãmbã ye. Mam sẽn da nong zabã yĩnga, kɩtame tɩ bi-beesã sull neb ra zoet maam. M da pa yit n pa zã m bug-raoogã ye. M da ningd-a-la m zu-kʋkã tẽngr n gõe. Nen-kɛglmã, dorgã yũubã, wagdmã, gom-dẽgdã la tʋʋm-dẽgd a taabã n da lebg m tʋʋmde. Polɩɩs-rãmbã ra gẽesda maam wakat fãa. Yʋʋm wʋsg pʋgẽ, b yõka maam n kẽes bãens roog naoor wʋsgo.

BIIBLÃ ZÃMSG SẼN NAF MAAM TO-TO:

Vugri, b yiisa maam bãens roogo, tɩ m kẽng n na n tɩ ges m pʋgdba. M da pa mi tɩ yẽ ne a kamb a yiib n lebg a Zeova Kaset rãmb ye. B boola maam tɩ m wa b tigsgã. Mam yãka yam bal n na n tũ-b n tɩ ges tigissã sẽn maand to-to. D sẽn ta Rĩungã roogẽ wã, m kosame n na n zĩnd n pẽneg kʋɩlengã, n na n get neb nins sẽn kẽed la b yitã. M da suii bug-raoogo.

La baraar tigsgã sõnga maam tɩ m toeem m vɩɩmã. M tẽrame tɩ m sẽn wa n be roogã pʋgẽ wã, ra yaa wa m bee dũni a to pʋgẽ. Nebã ra wat n pʋʋsda maam noog-noogo, tɩ b nensã ra be laado. A Zeova Kaset rãmbã sẽn deeg maam to-to wã, la b sẽn tall manesem ning ne maamã ket n yaa vẽeneg m yamẽ. B ra yaa toor fasɩ ne neb nins m sẽn da tũudã!

Mam sɩnga Biiblã zãmsg ne a Zeova Kaset rãmbã. M bãngrã sẽn da paasdã kɩtame tɩ m da ne vẽeneg tɩ m segd n toeema m sẽn vɩ to-to wã. Mam tũu saglg ning sẽn be Yel-bũn 13:20 pʋgẽ wã. B yeta be yaa: “Sẽn kẽnd-a ne yam dãmb na n lebga yam soaba, la sẽn tũud-a yalemb na n paama zu-loeese.” Mam bãnga vẽeneg tɩ m segd n zãaga m meng ne bi-beesã sulli. Pa yɩ nana baa bilfu. La ne a Zeova sõngre, m wa n tõogame.

M basa tʋʋm-dẽgdã, la m manesem-wẽnsã me. M modga wʋsg n wa tõog n bas sɩgaarã la dorgã yũubu. Mam wõrsa m zoobdã sẽn da yaa wogdã, n yãgs m tʋb-londã, la m bas gom-yoodã me. M vɩɩmã tõre, ra yaa pipi la woto m sẽn tõog n yõk m meng n maan sẽn yaa sõma.

M da pa nong sebr kareng la a zãmsg ye. Rẽ kɩtame tɩ pa yɩ nana ne-m tɩ m tõog n zãms Biiblã ye. La m sẽn modg wʋsgã, bilf-bilfã m wa n nonga a Zeova. La bũmb n wa n maan m sũurã pʋgẽ. M sũur-kasetã wa n ningd-m-la taale. M da ningda m meng taal daar fãa, n sãmbd a Zeova pa tol n tõe n kõ maam sugr tʋʋm-wẽns nins fãa m sẽn tʋmã yĩng ye. Sasa kãens fãa, mam karma kibar ning sẽn gomd a Zeova sẽn kõ rĩm a Davɩɩd a yel-wẽn-kãsemsã sugrã, tɩ bels-m wʋsgo.—2 Sãmwɛll 11:1–12:13.

Bũmb a to sẽn pa yɩ nana ne-m yaa zak-zak moonegã. (Matiye 28:19, 20) M da yɛɛsda m na n wa sɛg ned m sẽn da pãbe, bɩ m sẽn da maan wẽnga. La bilf-bilfã, m wa n tõoga m rabeemã. M sẽn da sõngd nebã tɩ b bãngd tɩ d saasẽ Ba wã kõta sugr wʋsgã ra kõt-m-la sũ-noog hakɩɩka.

BIIBLÃ ZÃMSG SẼN NAF MAAM TO-TO:

M sẽn bãng a Zeova wã sõng-m-lame tɩ m ket n vɩ. M pĩnd tũud-n-taasã wʋsg maana kaalem, t’a taab be bãens roogẽ. La mam vɩɩmã tara barka, tɩ m saagdẽ me tɩ beoog na n yɩɩ neere. M modgame n bɩɩs sik-m-menga, la wẽn-sakre. M lebga ned sũur sẽn pa yikd tao-tao. Rẽ sõngame tɩ zems-n-taar be maam ne m taabã sʋka. Mam kẽe kãadem ne pʋg-neere, t’a yʋʋr boond t’a Carmen. D tara sũ-noog d kãadmã pʋgẽ. Maam ne yẽ naaga taab n sõngd nebã tɩ b bãngd Biiblã sẽn yetã.

Masã m tʋmda ne pʋ-peelem. M mi n kẽnga bãnkẽ, la pa sẽn na n tɩ zu ye. Yaa sẽn na n tɩ yẽes b roogã!