SOGSG BIIBLÃ SẼN LEOKDE
A Zezi sɩd vʋʋga neb sẽn da ki bɩ?
A Zezi zoa a Lazaar kiime, t’a vʋʋg-a rasem a naas poore
Biiblã yeta vẽeneg t’a Zezi vʋʋga neb sẽn da ki. Pa kibay neb sẽn naan ye. Biiblã togsda sẽn yɩ wakat ningã, la sẽn yɩ zĩig ningã takɩ. Wala makre, yʋʋmd 31 wã tʋʋlg wẽnde, a Zezi ne neb kʋʋng n da yi Kapɛrnaum n dabd Nayin. B sẽn wa kolgdẽ, b sega kʋʋng a to sẽn da rabd n na n tɩ mum kũum, la a Zezi vʋʋgã sẽn da ki-a wã. Y tõe n tẽeme tɩ yaa sɩda, bala b gʋlsa rẽ tɩ be Biiblã sẽn yaa Wẽnnaam Gomdã pʋgẽ. Sẽn paase, yɩɩ kʋʋngã nifẽ.—Karm-y Luk 7:11-15.
A Zezi zoa a Lazaar me kiime, t’a vʋʋg-a rasem a naas poore. Y tõe n tẽe kibarã, bala baraarã me yɩɩ neb kʋʋng nifẽ.—Karm-y Zã 11:39-45.
Bõe yĩng t’a Zezi vʋʋg neb sẽn da ki?
Yaa nonglem la nimbãan-zoeer n kɩt t’a Zezi vʋʋg neb sẽn da ki wã. Sẽn paas me, yaa sẽn na n yɩl n wilg t’a Ba wã sẽn yaa vɩɩmã kõtã kõo yẽ tõog t’a na n kɩt tɩ kũum da le zĩnd ye.—Karm-y Zã 5:21, 28, 29.
A Zezi sẽn vʋʋg neb sẽn da ki wã kɩtame tɩ d tõe n kɩs sɩd t’a sẽn pʋlem bũmb ninsã fãa na n wa pidsame. A na n vʋʋga neb wʋsgo, baa neb sẽn yɩ nin-wẽnse, b sẽn pa paam n bãng Wẽnnaam sɩd-sɩdã yĩnga. Nin-kãens na n paamame tɩ b zãms-b tɩ b bãng Wẽnnaam a Zeova sõma, la b nong-a.—Karm-y Tʋʋm 24:15.