Yãmb ne Wẽnnaam gomda ne taab bɩ?

Ned ne a zoa wae n gomda ne taaba, wall b tũnugd ne bũmb toor-toor n sõsda. Wala makre, telefõnne, ẽntɛrnete, wall lɛta. Woto me, d sã n dat n tall zood sõma ne Wẽnnaam, d segd n sõsda ne-a. La wãn to la d tõe n maan dẽ?

Ne pʋʋsgã maasem, d gomda ne a Zeova. La pʋʋs Wẽnnaam, pa rat n yeel tɩ d gom ne-a wa ned sẽn gomd ne a rog-taag ye. D sã n pʋʋsdẽ, d segd n tẽegame tɩ d gomda ne d Naandã, rat n yeel tɩ ãndũniyã fãa Soaalã. Woto na n kɩtame tɩ d sã n wa pʋʋsd-a bɩ d waoog-a ne d sũur fãa. Sẽn na yɩl tɩ Wẽnnaam kelg d pʋʋsgã, bũmb kẽer me la d segd n maane. Ad bãmb b tãabo.

Pipi, yaa Wẽnnaam a Zeova a ye bal la d segd n pʋʋse. Pa a Zezi bɩ “nin-sõngo,” wall imaaz ye. (Yikri 20:4, 5) Biiblã yeela woto vẽenega: ‘Da maan-y yɩɩr ne bũmb ba a yembr ye. La ne pʋʋsgo, la ne bark pʋʋsgo, bɩ y wilg Wẽnnaam yãmb sẽn dat bũmb ninsi.’ (Filip rãmba 4:6) Yiib-n-soaba, d segd n pʋʋsa Wẽnnaam, a Bi-ribl a Zezi Kirist yʋʋrã maasem yĩnga. A Zezi meng yeela woto vẽenega: ‘Ned ka tõe n ta m Ba nengẽ, a sã n ka mam maasem yĩng ye.’ (Zã 14:6) Tãab-n-soaba, d sẽn pʋʋsd n kot bũmb ningã segd n zemsa ne Wẽnnaam daabã. Biiblã yeela woto: ‘Tõnd sã n kos bũmb sẽn zems bãmb daabo, b kelgda tõndo.’a—1 Zã 5:14.

Yaa vẽeneg tɩ neb sã n dat tɩ b zood kaoose, yaa tɩlae tɩ b sõsd ne taaba. Wa zo-rãmb sẽn nong n yẽsd ne taabã, tõnd me segd n basame tɩ Wẽnnaam gomd ne-do, la d kelgd-a. Yãmb mii Wẽnnaam sẽn gomd ne tõnd to-to bɩ?

Rũndã-rũndã, Wẽnnaam a Zeova “gomda” ne tõnd ne Biiblã sẽn yaa a Gomdã maasem. (2 Tɩmote 3:16, 17) Bõe yĩng tɩ d yet woto? Ad makre. Mams-y n ges-y wa yãmb zoa sẽn na n tool-y lɛtre. Yãmb sã n karem lɛtrã n sa, tõe tɩ y na n yeela woto ne sũ-noogo: “Mam wʋma m zoa wã kibare!” La yãmb yaool n pa wʋm a koɛɛg sẽn gomd ne yãmb ye. Yaa lɛtr la a tũnug n gom ne yãmba. Woto me, y sã n karemd Biiblã, y basame t’a Zeova gomd ne-yã. A Gina, pag ning yell d sẽn gom pipi sõsgã pʋgẽ wã yeela woto: “Mam tagsdame tɩ m sã n dat n yɩ Wẽnnaam zoa, m segd n karemda Biiblã sẽn yaa wa lɛtr a sẽn tool tõndã.” A paasa woto: “Mam sẽn karemd Biiblã daar fãa wã kɩtame tɩ maam ne Wẽnnaam zoodã pãng paasdẽ.” Yãmb karemda Biiblã daar fãa tɩ wilgdẽ tɩ y basdame t’a Zeova gomd ne-y bɩ? Y sã n maand woto, yãmb ne-a zoodã pãng na n paasame.