Wẽnnaam ‘datame t’a yɩ woto’

1. Bõe n kɩt t’a Zezi sũur yɩ noog wʋsgo? (Ges-y fotã sẽn be yĩngrã.)

DAAR a ye, bũmb n maan t’a Zezi sũurã yɩ noog wʋsgo. Mams-y wa yãmb sẽn da na n beẽ be, n get a nengã sẽn be laadã. La bõe n kɩt t’a Zezi sũur yɩ noog woto? Bilf sẽn deng rẽ, a tʋma a karen-biis 70 tɩ b tɩ moon Wẽnnaam Rĩungã koe-noogã. Koe-moondbã bɛɛb sẽn da tar pãngã yĩnga, a ra yãgd n na n bãnga b sã n na n tõoga tʋʋmdã. Gʋlsdbã la fariziẽ-rãmbã sẽn da yaa bãngdb la neb sẽn karem n zãagã ra bee bɛɛbã sʋka. B ra kɩtame tɩ nebã tagsdẽ t’a Zezi yaa ra-wãad bala, t’a karen-biisã ‘yaa nin-tals sẽn ka paam zãmsgo.’ (Tʋʋ. 4:13; Mark 6:3) Baasgo, karen-biisã tɩ mooname n lebg n wa ne sũ-noogo. Baa nebã sẽn kɩɩs-bã, b tõog n mooname. Zĩn-dãmbã meng pa tõog tɩ b pa moon ye. Bõe n sõng-b tɩ b kell n tall sũ-noog n moon ne raoodo?—Karm-y Luk 10:1, 17-21.

2. a) Bõe yĩng t’a Zezi bool a karen-biisã tɩ kom-bõonego? b) Bõe n sõng a Zezi karen-biisã tɩ b wʋm Wẽnnaam goamã võore?

² A Zezi yeela a Zeova woto: “M Ba sẽn yaa [“saasẽ,” MN] ne dũniyã Zu-soaba, mam pẽgda yãmba, yãmb sẽn solg bõn-kãens ne yẽesem dãmbã la ne yam dãmbã, n yaool n vẽneg kom-bõoneg ne bõn-kãensã yĩnga. N-ye, m Ba, mam pẽgda yãmba, yãmb sẽn dat t’a yɩ woto wã yĩnga.” (Mat. 11:25, 26) Bõe yĩng t’a Zezi bool a karen-biisã tɩ kom-bõonego? Yaa tɩ b ra pa wa gʋlsdbã la fariziẽ-rãmbã sẽn da karem n zãagã sẽn get b mens wa yam dãmbã ye. B ra sakdame tɩ b zãms-b bũmbu, wa kamb sẽn nong zãmsgã. B ra yaa sik-m-mens rãmba. (Mat. 18:1-4) Rẽ n so t’a Zeova tũnug ne a vʋʋsem sõngã, n sõng-b tɩ b wʋm a goamã võore. La zʋɩf-rãmbã tũudmã taoor dãmbã wuk-m-mengã, n paas a Sʋɩtãan sẽn lud b yamã kɩtame tɩ b kell n pa likã pʋgẽ.

3. Bõe yell la d na n gom sõs-kãngã pʋgẽ?

³ Rẽnd pa lingr la a Zezi sũur sẽn yɩ noog wʋsgã ye. A ra neeme t’a Zeova kɩtame tɩ sik-m-mens rãmbã fãa tõe n wʋm a goamã võore, baa b rãmb nins sẽn pa karem n zãagã. A Zeova sẽn da rat tɩ bũmb nins a sẽn zãmsd nebã yɩ woto wã noom-a lame. Hal baa rũndã, a Zeova pa toeem ye. Bõe n wilgd t’a ket n datame t’a zãmsgã yɩ nana ne nebã fãa? Sõs-kãngã pʋgẽ, d na n yã a sẽn maand to-to tɩ sik-m-mens rãmbã wʋmd Biiblã goam võor rũndã-rũndã.

WẼNNAAM KƖTAME TƖ NED BUUD FÃA TÕE N WƲM A GOAMÃ VÕORE

4. Wãn to la Gũusg Gasgã ne ãngilind wʋmb sẽn pa toogã sõng neb wʋsgo?

⁴ Yʋʋmã noorã, a Zeova siglgã maana bũmb toor-toor sẽn na yɩl tɩ Biiblã goam võor wʋmb lebg nana. Ad makr a tãab sẽn wilgd rẽ. Pipi, b yiisda Gũusg Gasgã ne ãngilind wʋmb sẽn pa toogo.a A sõngda neb nins sẽn pa wʋmd ãngilindã sõmã, wall sẽn pa mi-b kareng sõma wã. Zak-soben-dãmbã mikame tɩ sõngda b kambã tɩ b wʋmd Gũusg Gasgã võor sõma. Neb wʋsg gʋlsa lɛta n tool Siglgã taoor lʋɩtb Sulli, n wilg tɩ b sũur yaa noog ne Gũusg Gasg-kãngã. Wala makre, saam-bi-poak a ye yeelame tɩ Gũusg Gasgã zãmsg sasa, yẽ ra yɛɛsdame n pa rat n zẽk a nug n leok sokr ye. La a sẽn sɩng Gũusg Gasgã ne ãngilind wʋmb sẽn pa toogã kareng tɛkã, a pa le yɛɛsd ye. Ad a sẽn yeele: “Masã, m wae n leokdame n pa le yɛɛsdẽ ye. M pʋʋsda a Zeova barka, la m pʋʋsd yãmb me barka.”

5. Bõe n kɩt tɩ Les Saintes Écritures—Traduction du monde nouveau wã ne ãngilind b sẽn lebs n manegã yaa sõma?

⁵ Yiib-n-soaba, b yiisa Les Saintes Écritures—Traduction du monde nouveau wã ne ãngilind b sẽn lebs n manege.b Yɩɩ yʋʋmd 2013 tõnd siglgã yʋʋmd-yʋʋmd tigsgã sasa. Biibl-kãng pʋgẽ, b booga vɛrse-rãmb kẽer gom-biisã sõore, tɩ b võorã yaool n pa toeem ye. B võorã wʋmb lebga nana menga. Wala makre, Zoob 10:1 ra yaa gom-biis 27. La masã, lebga gom-biis 19. Yelbũn 8:6 ra yaa gom-biis 20, n lebg gom-biis 13. Vɛrse kãens võorã wʋmb lebga nana. Sɩd me, saam-biig sẽn paam vʋʋsem sõngã zaeeb n tũud a Zeova na maan yʋʋm wʋsg yeela woto: “Mam karma Zoob sebrã Biibl-paallã pʋgẽ, la yɩɩ wa m da nan zɩ n wʋm a võor ye!” Neb a taab me togsa goam sẽn wõnd woto.

6. Bõe n kɩt tɩ b sẽn bilgd Matɩe 24:45-47 võor to-to wã noom yãmba?

⁶ Tãab-n-soaba, tẽeg-y tɩ yʋʋmã noorã d wʋma vɛrse-rãmb kẽer võor n paase. Wala makre, yʋʋmd 2013 sẽoog kiuug pipi daar Gũusg Gasgã sõnga tõnd tɩ d bãng ‘tʋm-tʋmd sẽn tũud sɩd la sẽn tar yamã’ sẽn yaa a soabã vẽenega. (Mat. 24:45-47) Gũusg Gasgã wilgame tɩ tʋm-tʋmd sẽn tũud sɩdã yaa a Zeova Kaset rãmbã Siglgã taoor lʋɩtb Sulli, tɩ zakã nebã yaa neb nins tʋm-tʋmdã sẽn sõngd tɩ b wʋmd Gʋlsg Sõamyã võor sõma wã, la tɩ nin-kãens yaa sẽn paam-b vʋʋsem sõng zaeebã, la a Zezi ‘piis a taabã’ fãa. (Zã 10:16) Gom-kãensã zãmsg yaa nana. F sã n na n wilg-b ned me, yaa nana. Woto pa noom yãmb sɩda? Bõe me la a Zeova maand tɩ wilgdẽ t’a ratame t’a zãmsgã yɩ nana ne nebã fãa?

BIIBLÃ KIBAYÃ

7, 8. Biiblã kiba-bʋs n makd bũmb sẽn da wate?

⁷ Yãmb sã n sɩng n tũuda a Zeova hal sẽn kaoose, tõe tɩ y gũus n gesame tɩ tõnd sɛbã sẽn bilgd Biiblã kibay kẽer to-to wã toeema bilfu. Pĩndã, b ra wae n yetame tɩ Biiblã kibay kẽer makda bũmb sẽn wate. Ra yaa Biiblã zug la b ra tikd n yet woto bɩ? N-ye. Wala makre, a Zezi goma “no-rɛɛs a Zonas bõn-bãndã” yelle. (Karm-y Matɩe 12:39, 40.) A wilgame t’a Zonas sẽn zĩnd zĩnfã pʋgẽ rasem a tã wã makda yẽ sẽn da na n maan rasem a tã yaoogẽ wã.

⁸ Biiblã tara kibay a taab sẽn makd bũmb sẽn da wate. Tʋm-tʋmd a Poll goma kiba-kãens kẽer yelle. Wala makre, a wilgame tɩ manesem ning a Abrahaam sẽn tall ne a Agaarã, la ne a Saara wã makda manesem ning a Zeova sẽn tall ne Israyɛll buudã, la ne a siglgã babg ning sẽn be yĩngrã. (Gal. 4:22-26) A wilgame me tɩ sɛk-roogã, paasg daarã, maan-kʋʋdb kãsmã, la a Moiiz tõogã bũmb a taab ra “yaa bõn-neeb sẽn watã maasem.” (Heb. 9:23-25; 10:1) D sã n bao n bãng Biiblã kiba-kãens la b sẽn makd bũmb ninsã, kengda d tẽebo. La rẽ yĩnga d tõe n yeelame tɩ kibay nins fãa sẽn be Biiblã pʋgẽ wã, la neb nins fãa Biiblã sẽn gomd b yellã makda bũmb wall ned sẽn wat bɩ?

9. Pĩndã, wãn to la b ra bilgd a Nabot kibarã võore?

⁹ Pĩndã, d ra wae n yeta d sɛbã pʋsẽ tɩ Biiblã sẽn gomd neb nins yellã fãa, a kibayã fãa la bũmb nins yell b sẽn gomdã makda ned wall bũmb sẽn wate. Wala makre, rĩm a Akaab pag a Zezabɛll kɩtame tɩ b kʋ a Nabot sẽn na yɩl t’a sɩdã paam n deeg a Nabot viyn pʋʋgã. (1 Rĩm 21:1-16) Yʋʋmd 1932, Gũusg Gasgã wilgame t’a Akaab ne a Zezabɛll makda a Sʋɩtãan ne a siglgã, t’a Nabot makd a Zezi, la t’a Nabot kʋʋbã makda b sẽn kʋ a Zezi wã. La yʋʋmd 1961, “ Que ton nom soit sanctifié ” sebrã wilgame t’a Nabot makda kiris-neb nins sẽn paam vʋʋsem sõng zaeebã, t’a Zezabɛll makd kiris-neb ne yʋʋrã. B paasame t’a Zezabɛll sẽn nams a Nabotã makda b sẽn namsd sẽn paam-b vʋʋsem sõng zaeebã yaoolem wakatã. Yʋʋm wʋsg pʋgẽ, Wẽnnaam nin-buiidã ra karemda sɛb nins sẽn wilgd tɩ Biiblã kibay makda bũmb sẽn watã, tɩ kengd b tẽebo. La bõe yĩng tɩ d pa le yet woto?

10. a) Tʋm-tʋmd sẽn tũud sɩdã sẽn paam yam n paasã kɩtame t’a pa le yɩt tao-tao n yeel bõe? b) Rũndã-rũndã, tõnd sɛbã gomda bõe yell n yɩɩda?

¹⁰ Yʋʋm wʋsg pʋgẽ, a Zeova sõnga ‘tʋm-tʋmd sẽn tũud sɩd la sẽn tar yamã’ t’a paam yam n paase. Woto kɩtame tɩ sã n pa Biiblã n wilg tɩ kibar makda bũmb sẽn wate, tʋm-tʋmd sẽn tũud sɩdã pa yɩt tao-tao n yeel rẽ ye. Sẽn paase, b sẽn da bilgd Biiblã kibay kẽer to-to wã võor wʋmb yaa toogo. F ra segd n bãnga kibarã sẽn gomd bũmb nins yellã sẽn makd bũmb ninsi, la b sẽn makd rẽ wã võore. Yɩl n tẽeg woto fãa pa nana ye. Sẽn yɩɩd fãa, f sã n karemd kibar n baood n na n bãng bũmb nins yell a sẽn gomdã sẽn makd bũmb ninsi, tõe n yɩɩ toog tɩ f bãng yam ning f sẽn tõe n dɩk kibarã pʋgẽ. Yaa rẽ yĩng la sɛb nins tõnd sẽn yiisd rũndã-rũndã wã sẽn gomd yam ning d sẽn tõe n dɩk Biiblã kibay pʋsẽ wã yell n yɩɩdã. B wilgda kiba-kãens sẽn tõe n sõng-d tɩ d bɩɩs tẽebo, sũ-mare, wẽn-zoeer la zʋg-sõma a taab to-to.c

11. Wãn to la d wʋmd a Nabot kibarã võor rũndã-rũndã, la bõe yĩng t’a mak-sõngã tõe n naf tõndo?

¹¹ Wãn to la d wʋmd a Nabot kibarã võor rũndã-rũndã? D miime tɩ kibarã pa makd bũmb sẽn da wat ye. A Nabot sẽn ki wã pa a sẽn makd a Zezi wall sẽn paam-b vʋʋsem sõng zaeebã yĩng ye. Yaa a sẽn da rat n kell n sak Wẽnnaam ne a sũur fãa wã yĩnga. Baa rĩmã ne a pagã sẽn nams-a wã, a kell n saka a Zeova tõogã. (Sõd. 36:7; 1 Rĩm 21:3) A mak-sõngã tõe n nafa d fãa, bala d sẽn sakd Wẽnnaamã tõe n yɩɩ sabab tɩ b nams-do. (Karm-y 2 Tɩmote 3:12.) Kiris-nebã fãa tõe n wʋma yãoã võor nana-nana, n tẽegd rẽ tɩ kengd b tẽebo.

12. a) Bõe la d tõe n yeel Biiblã kibayã wɛɛngẽ? b) Bõe n kɩt tɩ d tõe n wʋm Biiblã goam nins võor wʋmb sẽn pa nana wã? (Ges-y vẽnegrã sẽn be tẽngrã.)

¹² Rẽ yĩnga, d tõe n yeelame tɩ Biiblã kibayã fãa kõta tõnd yam bala, n pa makd bũmb sẽn wat bɩ? Ayo. La d pa le wae n yetẽ tɩ Biiblã kibay makda bũmb sẽn wat ye. Rũndã-rũndã, tõnd sɛbã wae n yetame tɩ Biiblã kibar ning wõnda a to, pa rẽ bɩ bũmb sẽn maan kɩtame tɩ d tẽeg Biiblã kibare. Wala makre, a Nabot sẽn kell n sak Wẽnnaam baa b sẽn nams-a la b kʋ-a wã, wõnda Kiristã ne sẽn paam-b vʋʋsem sõng zaeebã sẽn sakd Wẽnnaam to-to wã. Leb n wõnda a Zezi piis a taabã wʋsg sẽn sak namsg b tẽebã yĩngã. Woto pa wilgd t’a Zeova ratame t’a zãmsgã yɩ nana ne nebã fãa sɩda?d

A ZEZI YEL-BŨNÃ

13. Mak-bʋs n wilgd tɩ masã, d sẽn bilgd a Zezi yel-bũnã võor to-to wã lebga nana?

¹³ Ninsaalbã sẽn be tẽngã zug tɛka, b zɩ n paam karen-saamb sẽn mi a tʋʋmd n ta a Zezi Kirist ye. A ra nong n dɩkda makre, wall a wẽed yel-bũn n zãmsd nebã. (Mat. 13:34) Makr tara pãng zãmsg pʋgẽ, bala a kɩtdame tɩ d mams yɛlã d yamẽ, tɩ zãmsgã kẽ-do. Yʋʋmã noorã, tõnd sɛbã sẽn bilgd a Zezi yel-bũnã võor to-to wã lebga nana. Wala makre, yʋʋmd 2008 sẽoog kiuug pipi daar Gũusg Gasgã sõng-d lame tɩ d wʋm rabɩllã yel-bũndã võore, mutard bilã la zĩm-gãmbr yel-bũnã võor n paase. Rũndã-rũndã, d miime tɩ yel-bũn-kãens gomda Wẽnnaam Rĩungã yelle, la a sẽn sõngd neb wʋsg sẽn be dũniyã pʋgẽ tɩ b lebgd Kirist karen-biisã yelle.

14. a) Pĩndã, wãn to la d ra bilgd Samari nin-sõngã yel-bũndã? b) Wãn to la d wʋmd yel-bũndã võor rũndã-rũndã?

¹⁴ La yel-bũn nins a Zezi sẽn wẽ n gom bũmb wʋsg yellã yẽ? Kẽer makda bũmb sẽn wate, tɩ sãnda kõt tõnd yam. La wãn to la d tõe n bãng yel-bũn nins sẽn makd bũmb sẽn watã n bake? Pĩndã, ra pa nana ye. D rɩk makr ne a Zezi yel-bũnd ning sẽn gomd Samari nin-sõngã yellã. (Luk 10:30-37) Yʋʋmd 1924, Gũusg Gasgã yeelame tɩ Samari nedã makda a Zezi, tɩ sor ning sẽn yi Zerizalɛm n dabd Zeriko wã sẽn yaa tãng sigdgã makd ninsaalbã yɛl sẽn tar sãoong n dabd kɩɩsgã sẽn zĩnd Edɛnnã tɛkã. B paasame tɩ bi-beesã sẽn be sorã zugã makda lɛɛbdbã sigls sẽn yaa rat-tɩ-loog rãmbã, tɩ maan-kʋʋdã la Levi nedã makd kiris-neb ne yʋʋrã taoor dãmbã. Rũndã-rũndã, tõnd sɛbã tikda yel-bũndã n tẽegd tõnd fãa tɩ d pa segd n yɩ bu-wɛlsdb ye. D segd n sõnga neb nins sẽn dat sõngrã, sẽn yɩɩd fãa, d segd n sõng-b lame tɩ b bãng Wẽnnaam la a raabã. D sẽn paam t’a Zeova sõngd-d tɩ d wʋmd a goamã võor nana-nana wã pa noom-d sɩda?

15. Bõe yell la d na n gom sõsg ning sẽn pʋgdã pʋgẽ?

¹⁵ Sõsg ning sẽn pʋgdã pʋgẽ, d na n goma a Zezi yel-bũnd a to yelle. Yaa pʋg-sadb piigã yel-bũndã. (Mat. 25:1-13) Wãn to la a Zezi rat t’a karen-biisã wʋm yel-bũn-kãng võor yaoolem wakatã? Yel-bũndã sẽn gomd bũmb nins yellã fãa makda bũmb sẽn wat bɩ, bɩ a Zezi ratame tɩ d rɩk yam yel-bũndã pʋgẽ, n tõog n kell n tũ Wẽnnaam? Sõsgã na n leoka sogs-kãensã.