SEBRÃ GOM-ZUG SÕSGÃ | YÃMB NONGẼ LAME TƖ B ZÃMS-Y BIIBLÃ BƖ?

B zãmsda neb Biiblã dũniyã gill zugu

Neb wʋsg miime t’a Zeova Kaset rãmbã moonda koɛɛgã zĩig fãa. La yãmb miime tɩ b zãmsda neb Biiblã dũniyã gill zug me bɩ?

Yʋʋmd 2014, a Zeova Kaset rãmbã sẽn yaa 8000000 la zakã zãmsa na maan neb 9500000 Biiblã kiuug fãa, tẽns 240 pʋsẽ.a Tẽns 140 n be tɩ b nebã sõor pa ta neb nins d sẽn zãmsd Biiblã ye.

Sẽn na yɩl n zãms nebã sõma, a Zeova Kaset rãmbã yiisda Biibl-dãmb la sɛb buud toor-toor milyaar a ye la pʋɩ-sʋk yʋʋmd fãa. B yiisda b sɛbã na maan buud-goam 700 pʋgẽ. Woto kɩtame tɩ nebã tõe n zãms Biiblã buud-gomd ning pʋgẽ b sẽn date.

“Mam sẽn wa n be lekollã, m da pa nong kareng ye. La Biiblã zãmsg yaa noogo. Sẽn paase, bũmb nins m sẽn bãngã kenga m daood wʋsgo.”—A Katlego sẽn be Afirikdisiidã.

“Biiblã zãmsg sõnga maam tɩ m paam m sogsgã fãa leoore, la sogsg a taab leoor menga.”—A Bertha sẽn be Megsikã.

“Biiblã zãmsg ra maanda mam zakẽ wã, la wakat ning m sẽn tar sẽka. Ra yaa wa mam sẽn datã bal kɛpɩ!”—A Eziquiel sẽn be Berzɩllã.

“Zãmsgã ra maandame tɩ zems mam sẽkã. Wakat ninga zemsda minit 15 bɩ minit 30, tɩ sasa ning yɩɩd rẽ.”—A Viniana sẽn be Ostrali wã.

“B ra zãmsda maam zaalem. Ra noom-m-la hal wʋsgo!”—A Aimé sẽn be Benẽ wã.

“Sẽn da zãmsd-a maam Biiblã yaa nin-bʋgsga, la maag-m-meng soaba. Tõnd lebga zoodo.”—A Karen sẽn be Irlãnd dinoorã.

“Neb wʋsg zãmsa Biiblã n pa lebg a Zeova Kaset rãmb ye.”—A Denton sẽn be Ãngeletɛɛrã.

SOGSG NEBÃ SẼN WAE N SOKD TÕND SẼN ZÃMSD NEBÃ BIIBLÃ TO-TO WÃ WƐƐNGẼ

Zãmsgã maanda wãn-wãna?

D yãkda gom-zugu, n bao Biiblã vɛrse-rãmb nins sẽn gomd rẽ yellã n karme. Wala makre, Biiblã tõe n sõng-d lame tɩ d paam sogs-kãensã leoore: Ãnda la Wẽnnaam? Wẽnnaam yaa wãn-wãna? A tara yʋʋr bɩ? A bee yɛ? Bõe la d tõe n maan n lebg a zoa? Sẽn yaa toog yaa tõog n bãng Biiblã vɛrse nins sẽn leokd sogs-kãensa wã.

Sẽn na yɩl n sõng nebã tɩ b paam b sogsgã leoore, d wae n zãmsda Biiblã sɩd yetame tɩ bõe? sebrã ne-ba.b B yiisa seb-kãngã n na n sõng nebã tɩ b bãng bũmb kẽer Biiblã sẽn yete. Wala makre, Biiblã sẽn yet Wẽnnaam la a Zezi Kirist zugu, ninsaalbã sẽn namsdã võore, kũum vʋʋgre, la pʋʋsgã wɛɛngẽ.

Wakat bʋg la zãmsgã maanda, la yaa yɛɛnẽ?

Zãmsgã tõe n maana zĩig ning y sẽn date, la wakat ning y sẽn date.

Zãmsg fãa kaoosda lɛɛr a wãna?

Neb wʋsg zãmsda lɛɛr a ye bɩ sẽn yɩɩd woto semen fãa. La pa tɩlae tɩ yɩ woto ye. Zãmsgã tõe n maaname tɩ zems yãmb sẽkã. Kẽer zãmsda minit 10 bɩ 15 semen fãa.

Yaa wakɩr wãn la yaooda?

Zãmsgã la sɛb ning d sẽn tar n zãmsd nebã yaa zaalem. D tũudã saglg ning a Zezi sẽn kõ a karen-biisã. A yeelame: “Yãmb deega zaalem, bɩ y kõ zaalem.”—Matɩe 10:8.

Wakat bʋg la zãmsgã sata?

Y tõe n kell n zãmsame n kaoos wa y sẽn date. Biiblã sɩd yetame tɩ bõe? sebrã tara sags 19. Y sã n date, y tõe n zãmsa sagsã fãa, wall sags kẽer bala. Y leb n tõe n yãka y sẽn dat tɩ sak fãa zãmsg kaoos to-to.

Yaa tɩlae tɩ m lebg a Zeova Kaset soab bɩ?

Ayo. D miime tɩ ned kam fãa tara sor n na n yãk tũudum ning a sẽn date. La yaa ned sẽn na n bãng Biiblã sẽn yetã bal la a na n bãng n yãk tɩ zemse.

M maanda wãn n paam kibay n paase?

Y tõe n kẽ a Zeova Kaset rãmbã sit wɛɛbã sẽn yaa jw.org pʋgẽ, n bao n bãng d sẽn tẽed bũmb ninsã, la d sẽn maand bũmb nins dũniyã gill zugã.

M sã n dat tɩ b wa zãms-m Biiblã, m maanda wãn n kose?

Y tõe n kẽe www.jw.org pʋgẽ n kos tɩ ned wa zãms-y-yã.
Y tõe n gesa seb-kãngã neng a yiibã zĩigẽ n yãk adɛrs n gʋls n kose.
Y tõe n kosa a Zeova Kaset rãmb nins sẽn moond yãmb babgẽ wã.

a Naoor wʋsgo, d zãmsda Biiblã ne nebã yembr-yembre, wall ne neb a wãn sẽn naag taaba.

b A Zeova Kaset rãmbã yiisa seb-kãngã bãmb milyõ 230 la zaka, buud-goam 260 la zak pʋgẽ.

ZÃMSGÃ NAFDA ZAKÃ NEBÃ FÃA

“Mam pagã sẽn sɩng Biiblã zãmsgã tɛka, m yãame t’a toeemame. Tõnd zĩid-n-taarã lebga noog n paase. Mam sẽn da rat n bãng bũmb ning a sẽn zãmsdã kɩtame tɩ ma-me sɩng Biiblã zãmsgo. Mam sẽn bãng bũmb ninsã toeema maam. Biiblã zãmsg kɩtame tɩ tõnd zakã rãmb zemsd taaba.”—A Eziquiel.

“Mam sẽn sɩng Biiblã zãmsgã, sõnga maam tɩ b bas doroogã yũub la rãamã yũ tɩ loogã. Sẽn paase, sõnga maam tɩ m sũurã pa le yikd tao-tao ye. Mam manegda m doogã sõma masã. M nonga m zakã rãmb sõma, n maand bũmb toor-toor n noogd b sũur ne yamleoogo. Mam vɩɩmã yaa noog masã.”—A Karen.

“Mam sẽn da zãmsd Biiblã kɩtame tɩ neb kẽer ra wɩt-ma. La mam sɩdã ra teend-m lame. A ra mi n yeta woto: ‘Ra kelg nebã goam ye. Mam neeme tɩ fo toeemame n lebg pʋg-sõngo, la rẽ n tar yõod n yɩɩda. Kell n maan fo sẽn maandã.’ Sɩd me, tõnd zĩid-n-taarã zɩ n yɩɩ noog wa rũndã ye.”—A Viniana.