Y sã n maanda yɩɩr rabeem yĩnga

A Alona yeela woto: “Mam sẽn wa n wʋm a wuu kɛlenga, m sũurã sɩnga kiuusgu, tɩ m zoe n tɩ solg roog b sẽn me tɩ ned tõe n soond be zabr wakate. Baa m sẽn wa n be be wã, m yamã ra pa gãe bãan ye. Mam sẽn wa n yi yɩng n kẽnd tɩ zĩig ka pẽ yambẽ m sẽn tõe n tɩ soondã, m rabeemã maneg n paasame. Daar a ye, m da kẽnda sorã zug n wa sɩng yãbre, tɩ m vʋʋsmã rat n lebge. Kaoosa bilf tɩ m yamã yaool n gãande. Rẽ poore, a wuu le sɩnga kɛleng yɛsa.”

La pa zabã bal n wat ne rabeem la yɩɩr ye. Wala makre, logtor tõe n gesa yãmb n yeel tɩ y tara bã-kɛgenga, wall yaa y ned n lʋɩ bã-kɛgenga, tɩ y sũur sãam wʋsgo. Neb kẽer yɛɛsda vɩɩmã sẽn na n yɩ to-to beoog sẽn wate, n maand yɩɩr rẽ yĩnga. B sokda b mens woto: ‘Mam kambã wall m yagensã na n kell vɩɩmda ne zaba, bi-be-tʋʋma, tẽn-gãongã la pemsmã rẽgengo, la bã-longdsã bɩ?’ Sã n yaa yel-kãensã n wat ne yãmb yɩɩrã, bõe la y tõe n maane?

Yel-beed tõe n paama ned buud fãa. Rẽ n so tɩ Biiblã yeel woto: “Gũus-m-meng soab yãta yell n zoe n soonde.” (Yel-bũnã 27:12) D sẽn tog n gũus tɩ bũmb da wa paamdã toor sẽn ka be, d segd n kogla d sũurã. Reem kẽer pida ne nen-kɛglem. Baa kibayã b sẽn wilgd televiziõ wã pʋgẽ la zĩis a taabã mi n tara yɛl sẽn kẽesd rabeem, tɩ yãmb ne y kambã sã n get rẽ bɩ paasd y yɩɩrã. Y sã n gind bõn-kãens n pa rat n gese, pa rat n yeel tɩ y maanda wa y pa ne yɛl nins sẽn be dũniyã zugã ye. Wẽnnaam pa naan tõnd tɩ d tõe n get yel-beed tɩ yell kaẽ ye. A pʋd n datame tɩ d tagsd ‘bũmb nins fãa sẽn yaa sɩdã’ yelle, la ‘bũmb nins fãa sẽn yaa tɩrsã, bũmb nins sẽn be pʋ-peelmã, la bũmb nins fãa sẽn zems ne nonglmã’ yelle. D sã n maan woto, “Wẽnnaam sẽn yaa laafɩ soabã” na n sõng-d lame tɩ d yam gãand bãane.—Filip-rãmbã 4:8, 9.

PƲƲSGÃ TARA YÕODO

D sã n sɩd tar tẽebo, na n sõng-d lame tɩ d yɩɩrã booge. Biiblã yeelame tɩ d yɩ “gũus-m-mens-rãmba, n kẽng taoor ne pʋʋsgo.” (1 Pɩyɛɛr 4:7) D tõe n kosa Wẽnnaam t’a sõng-do, la t’a kõ-d yam la raood tɩ d kell n tũ-a baa ne zu-loeesã, n kɩs sɩd tɩ “sẽn yaa bũmb ning la tõnd kos-yã,” a kelgda tõndo.—1 Zã 5:15.

Biiblã wilgame tɩ yaa a Sʋɩtãan la ‘dũni-kãngã naab’ lakae, pa Wẽnnaam ye. A paasame tɩ “dũniyã zãng bee wẽng soabã nugẽ.” (Zã 12:31; 1 Zã 5:19) Rẽnd a Zeezi sẽn yeel tɩ d pʋʋs Wẽnnaam n kos t’a ‘fãag tõnd wẽng soabã nugẽ’ wã, a ra pa gomd ne pagd ye. (Matye 6:13) A Alona yeela woto: “A wuu sã n da kelem fãa, m pʋʋsda a Zeova n kos t’a sõng-m tɩ m rabeemã booge. Sẽn paase, mam sɩdã mi n boola maam telefõnnẽ, tɩ d naag taab n pʋʋse. Pʋʋsgã sɩd sõnga maam wʋsgo.” Sɩd me, Biiblã yeela woto: “Sẽn-Ka-Saab pẽe ne neb nins sẽn boond bãmbã, b pẽe neb nins sẽn boond bãmb ne sɩdã.”—Yɩɩn-sõamyã 145:18.

KƖS-Y SƖD TƖ MANEGR N WATE

A Zeezi sẽn wa n sõsd ne nebã tãngã zugã, a yeela a karen-biisã tɩ b sã n na n pʋʋs bɩ b kos Wẽnnaam t’a kɩt ‘t’a soolmã wa.’ (Matye 6:10) Wẽnnaam soolmã bɩ a Rĩungã sã n wa, a na n kɩtame tɩ bũmb nins fãa sẽn wat ne yɩɩrã sɛ wakat fãa yĩnga. Wẽnnaam na n kɩtame t’a Zeezi sẽn yaa ‘vɩ-bãan naabã’ kɩt tɩ “zabã sẽn be dũniyã tɛk fãa wã sɛ.” (Ezayi 9:5; Yɩɩn-sõamyã 46:10) “[Wẽnnaam] na n yɩɩ neb wʋsg bʋ-kaooda. . . . Buud kõn tol n leb n yik zabr ne a to ye, la b kõn leb n zãms zabr sẽn zabd to-to ye. . . . Ned ka be n tõe n kẽes-b rabeem ye.” (Miise 4:3, 4) Nebã na n vɩɩmda ne sũ-noog b zagsã pʋsẽ. “Bãmb na n mee rot n zĩnd b pʋse. B na n sela tɩɩs n dɩ b biisi.” (Ezayi 65:21) Sẽn paase, “tẽngã ned kõn yeel t’a ka keem ye!”—Ezayi 33:24.

Rũndã-rũndã, baa d sẽn gũusd to-to, yell tõe n wa ling-d lame. (Koɛɛg Soaba 9:11) Hal pĩnd wẽndẽ n tãag rũndã, zabã, nen-kɛglmã la bãasã ket n kʋʋda baa wẽn-tũudbã. Bõe la Wẽnnaam na n maan nin-kãensã yĩnga?

Neb milyõ-rãmb la a na n vʋʋge. Yaa Wẽnnaam bal n mi b sõorã. La rũndã-rũndã, sẽn ki-bã pa mi baa fʋɩ, la Wẽnnaam tẽra b yelle. B gũuda wakat ning b sẽn na n vʋʋg n yi wã. (Zã 5:28, 29) Biiblã goma tõnd sẽn tẽed kũum vʋʋgrã yelle, n yeel woto: “Saag-sõng-kãng yaa wa baar sẽn vigl kãenkãe la sẽn tar pãng tõnd sɩɩgã yĩnga.” (Ebre-rãmbã 6:19) Sẽn paase, “Wẽnnaam kõo nebã fãa bãnde, n vʋʋg [a Zeezi] n bas kũum n wilg tɩ yaa sɩda.”—Tʋʋmã 17:31.

La rũndã-rũndã, baa neb nins sẽn modgd n dat n ta Wẽnnaam yamã mi n maanda yɩɩre. La y sã n tʋm ne yam, n pʋʋsd Wẽnnaam tɩ yãmb ne yẽ zoodã pãng paasdẽ, la y kɩs sɩd tɩ manegr n wat wa Biiblã sẽn yetã, y na n tõog n booga y yɩɩrã wa a Polle, a Zanet la a Alona. Y sã n maan wa bãmba, ‘Wẽnnaam, saag-sõng sẽn yit a soab nengẽ wã na n pidsa yãmb ne sũ-noog fãa la bãan fãa tẽeb pʋgẽ.’—Rom-dãmbã 15:13.