Masã, m getame tɩ m tõe n sõnga m taabã

M KIBARÃ:

M doga Akul. Yaa tẽng sẽn be Guwatemala tãmsã nin-taoor sẽnese. Mam roagdbã yaa Izil buudã neba, n yit Maya-rãmbã buudã neb sʋka. Ɛspayõllã sẽn yãk a toogo, m yãadmẽ m da gomda Izil buudã gomd me. M sẽn wa n yaa yãaga, zabr n yik Guwatemala soolmẽ wã. Zabrã kaoosa yʋʋm 36. Sasa kãnga, Izil neb wʋsg n ki.

Mam sẽn wa n tar yʋʋm a naase, m kẽemã sẽn da tar yʋʋm a yopoe wã ra zãada grenaad n deemdẽ, tɩ wa tiig n pusgi. Rẽ yɩɩ sabab tɩ m lebg zoanga, la bʋko, m kẽemã maana kaalem. Rẽ poore, b talla maam n kẽng zoens lekoll sẽn be Guwatemala na-tẽngã, tɩ m tɩ zãms Braille wã. M zĩnda be m yãadmã tõre. M sẽn wa n be be wã, m pa mi sẽn yɩ bũmb ning yĩnga, la lekollã taoor dãmb ra gɩdga maam tɩ m da sõsd ne kamb a taaba, tɩ kɩt tɩ m karen-bi-taasã ra gĩnd-ma. M da yaa m yembr wakat fãa. Kɩtame tɩ yʋʋmd fãa, m da yãgdame n dat tɩ kiis a yiibã m sẽn na n paam n tɩ zĩnd zakẽ ne m ma wã ta. M ma ra maand-m-la neere, la a kʋmd m nimbãaneg wakat fãa. Bʋko, m sẽn wa n tar yʋʋm 10, a maana kaalem. M sũurã ra tolg n sãama wʋsgo, bala ned ning sẽn da nong-a maam n tɩ yɩɩd dũni-kãngã pʋgẽ wã maana kaalem.

M sẽn wa n tar yʋʋm 11, m lebg n kẽnga tẽng ning pʋgẽ m sẽn da rogã, n tɩ vɩ ne m baabã biig a yembr ne a zak rãmba. B gesame tɩ m paam rɩɩbo, futu, gãag zĩig la yɛl a taaba. La ned baa a ye pa tõog n bels maam ye. Wakat ninga, m yãbdame n sok Wẽnnaam yaa: “Bõe yĩng tɩ m ma maan kaalem? Bõe yĩng tɩ mam lebg zoanga?” Nebã ra yeta maam tɩ yel-beed nins sẽn paamd maamã yaa Wẽnnaam daabo. Rẽ kɩtame tɩ m da kɩs sɩd tɩ Wẽnnaam toog kae ne tõndo, la t’a bakda nebã n sõngdẽ. Bũmb ning bal sẽn kɩt tɩ m pa tõog n yãk m yõorã, yaa tɩ m da pa tar bũmb n na n maan dẽ ye.

M sẽn da yaa zoangã yĩnga, nebã ra wẽgd-m lame la b maand bũmb toor-toor n sãamd m sũuri. M sẽn wa n ket n yaa biiga, b modga maam naoor wʋsg n kẽ ne-ma. M zɩ n togs ned ye. Bala m da tagsdame tɩ pa yell sẽn na n pak nebã ye. Nebã ra pa wae n sõsd ne maam ye. Ma-me ra pa sõsd ne ned ye. M da yaa ned sẽn nong n be m zĩigẽ, ned yam sẽn ka a menga, m da pa kɩs ned sɩd me ye.

BIIBLÃ SẼN TOEEM MAAM TO-TO:

M sẽn wa n tar yʋʋm 13, pag ne a sɩd sẽn yaa a Zeova Kaset rãmb n wa tõnd lekollẽ wã rekreyasiyõ sasa, n sõs ne maam. Yaa m lekollã karen-saam-poak a ye sẽn da kʋmd m nimbãaneg n kos-b tɩ b wa sõs ne maam. B yeela maam tɩ Biiblã pʋgẽ, b pʋlmame tɩ sẽn ki-bã na n vʋʋgame, la tɩ daar n wat tɩ zoens nin na n puki. (Ezayi 35:5; Zã 5:28, 29) B sẽn da zãmsd maam bũmb ningã ra noom-m lame. La m sẽn da yaa ned sẽn pa wae n sõsd ne m taabã, ra yaa toog ne-m tɩ m tõog n sõs ne-ba. La baa ne m sẽn da yaa nin-sĩndgã, b maan-m-la neere. B talla sũ-mare, n da ket n wat n zãmsd maam Biiblã. Pagã ne a sɩdã sẽn da yaa a Zeova Kaset rãmbã ra kẽnda sẽn yɩɩd kilo 10, n dʋʋg tãng n yaool n ta m sẽn beẽ wã.

Mam ba wã biigã bilga maam b sẽn da yaa to-to wã. A yeelame tɩ b manegda b mens sõma, la tɩ yaa neb nus sẽn pa zãade. La b ra wilgda maam wakat fãa tɩ m yeel pak-b lame. B ra wata ne kũun buud toor-toor n kõt maam. M da miime bal tɩ yaa kiris-neb hakɩɩkã n na n sak n mong b meng woto.

Ne siglgã sɛb nins b sẽn yiis ne Braille wã maasem, m tõog n zãmsa Biiblã. Baa ne m sẽn da wʋmd bũmb nins m sẽn da zãmsdã võorã, ra yaa toog ne-m tɩ m sak n deeg bũmb kẽere. Wala makre, ra yaa toog tɩ m sak n deeg tɩ m yell sɩd paka Wẽnnaam, la tɩ m yell me paka neb kẽere. M da wʋmda a Zeova sẽn bas tɩ namsgã ket n beẽ wã võore. La ra yaa toog ne-m tɩ m sak n deeg t’a yaa d Ba sẽn sɩd nong-do.a

M sẽn bãng bũmb nins Gʋls-sõamyã pʋgẽ wã sõng-m lame tɩ m toeem m tagsa wã bilf-bilfu. Wala makre, m bãngame tɩ Wẽnnaam sɩd kʋmda neb nins sẽn namsdã nimbãanega. Wẽnnaam yeela a nin-buiidã b sẽn da namsdã wɛɛngẽ yaa: “Sɩd-sɩda, mam yãa m nin-buiidã sẽn be Ezɩpt n namsdẽ wã . . . Mam mii toog ning b sẽn paamdã sõma.” (Yikri 3:7) M sẽn wa n bãng a Zeova zʋg-sõma buud toor-toorã, kɩtame tɩ m dɩk m meng n kõ-a pʋʋsg pʋgẽ. Yʋʋmd 1998 wã, m deega lisgu, n lebg a Zeova Kaset soaba.

M sẽn deeg lisg tɩ yʋʋmde, m tɩ naaga zoens a taab n maan lekoll b sẽn da sigl zoensã yĩnga, zĩig sẽn pẽ Ɛskuwĩntla tẽngã. Tigingã kãsem-soab a ye n gũus n ges tɩ m sẽn da yit Akul n wat n maand tigissã, ra yaa toog ne maam. Sɩd me, ra pa nana ne-m ye. Bala Rĩung roog ning sẽn da pẽ n tɩ yɩɩdã ra bee tãng ning pagã ne a sɩdã sẽn da yaa a Zeova Kaset rãmbã sẽn da rʋʋgd n wat n zãmsd maam Biiblã poore. Sẽn na yɩl n sõng-ma, kãsem-soabã kosa a Zeova Kaset rãmb sẽn be Ɛskuwĩntla, sẽn na n sak n deeg-m b zakẽ, la b sõng-m tɩ m tõogd n kẽnd tigissã. Hal n tãag rũndã, b ket n geta m yelle, wa m yaa b zakã neda.

M tõe n taas-y-la kibay wʋsg sẽn wilgd tɩ tigingã neb nong-m lame. Woto fãa kɩtame tɩ m kɩs sɩd tɩ m sẽn yaa a Zeova Kaset soabã, m bee kiris-neb hakɩɩkã sʋka.—Zã 13:34, 35.

BIIBLÃ ZÃMSG SẼN NAF MAAM TO-TO:

M pa le tagsd tɩ m yaa ned sẽn ka võore, m tẽeda manegre me. Masã, m vɩɩmã tara võore. Mam sẽn yaa so-pakdã, sẽn pak maam n tɩ yɩɩd yaa m sõng m taabã tɩ b bãng bũmb nins sẽn be Biiblã pʋgẽ wã. Pa m komslmã ye. Sẽn paase, m paamame tɩ b yãk-m tɩ m yaa tigingã kãsem-soaba, la m wɛgsd sõss sẽn tik Biiblã zug zãma wã taoore, tigims toor-toor pʋsẽ. M paamame meng tɩ b yãk-m tɩ m wɛgsd sõss rasem a tãab tigims kãsems sasa, tɩ neb tusa kelgdẽ.

Yʋʋmd 2010, m kẽnga Wẽnnaam tʋʋmdã zãmsg lekoll b sẽn maan Salvador (b boonda lekol-kãng rũndã-rũndã tɩ Rĩungã koe-moondb lekolle). Lekol-kãng sõnga maam tɩ m wa tõog n tʋm tʋʋm nins fãa b sẽn bobl maam tigingã pʋgẽ wã sõma. Zãmsgã m sẽn paamã kɩtame tɩ m mi tɩ Wẽnnaam a Zeova nand-m lame, t’a nong-m lame, la tɩ yaa yẽ n tõe n sõng ned ning a sẽn dat t’a tʋm a tʋʋmdã, la a paam minim.

A Zeezi yeelame yaa: “Kũun wata ne sũ-noog n yɩɩd reegre.” (Tʋʋma 20:35) Rũndã-rũndã, m tõe n sɩd yeelame tɩ m tara sũ-noogo. Bala baa ne m sẽn da zɩ n tags tɩ m tõe n sõnga m taabã, masã, m getame tɩ m tõe n sõng-b lame.