Biiblã sẽn yet sẽn be-b saasẽ wã wɛɛngẽ

SẼN-KA-TO SOAB A ZEOVA BEE SAASẼ

“Geer n da be arzãn pʋga [“saasẽ,” MN] la ned n dag n zao geerã zugu. Ned ning sẽn zao-a geerã zugã dag n wẽnda wa kug sẽn be yõod n boond tɩ zaspe la sardoan. La saag-gomtɩʋʋg sẽn wẽnd wa kugr sẽn boond tɩ emerood n dag n gũbg geerã.”—Vẽnegre 4:2, 3.

“Mam leb n yãnda bũmb sẽn wẽnd bugum vẽenem sẽn dag n gũbg yẽnda. La vẽenem ning sẽn dag n gũbg yẽnda wã rag n wẽnda wa saag gomtɩʋʋg sẽn pukd sawatẽ saag niib daarã. A yalẽ wã rag n yaa Sẽn-Ka-Saab ziirã wẽnego.”—Ezekɩyɛll 1:27, 28.

Bũmb ning tʋm-tʋmd a Zã sẽn yã wã, ne bũmb ning no-rɛɛs a Ezekɩyɛll sẽn yã wã bilgda a Zeova sẽn yaa Wẽnnaam sẽn ka to wã ziirã. B bilga rẽ ne bũmb toor-toor tõnd sẽn tõe n mams d yamẽ. Wala makre, kug-neeb buud toor-toore, saag gomtɩʋʋgo, la naam geer sẽn pa wõnd a taaba. Wilgdame t’a Zeova sẽn be zĩig ningã neermã pa tõe n bãng n bilgi, la tɩ yaa sũ-noog la bãan zĩiga.

Woto zemsa ne gomd yɩɩn-gʋlsdã sẽn da yeele. A ra yeelame: “Sẽn-Ka-Saab yaa kãsenga, la b zemsa ne pẽgr buud fãa, bãmb seka zoees n yɩɩd wẽnnaam-dãmbã fãa. Bala, buud a taabã wẽnnaam-dãmbã fãa yaa zĩrẽ wẽnnaam-dãmbã, la Sẽn-Ka-Saab n naan saasã. Sẽn-Ka-Saab nengã tara ziir n pɩnda. Bãmb zĩ-sõngã pida ne pãng la neerlem.”—Yɩɩn-sõamyã 96:4-6.

Yaa sɩd t’a Zeova yaa Wẽnnaam sẽn ka to. La baa ne rẽ, a yeta ninsaalbã tɩ b pʋʋs-a, la b bas b yam t’a kelgdame. (Yɩɩn-sõamyã 65:3) Wẽnnaam nonga ãdem-biisã hal wʋsgo, n get b yell sõma. Rẽ n so tɩ tʋm-tʋmd a Zã yeel tɩ “Wẽnnaam yaa nonglem.”—1 Zã 4:8.

A ZEEZI BEE NE WẼNNAAM SAASẼ

“A Etɛn sẽn pid ne Sɩɩg-sõngo, yẽ gesa yĩngri la a yãnda Wẽnnaam ziirã, la a Zeezi sẽn yas Wẽnnaam dɩtgo. La a Etɛn yeelame yaa: ‘Kelg-y yã, mam nee yĩngr sẽn pake la Ninsaal Bi-riblã sẽn yas Wẽnnaam dɩtgo.’ ”—Tʋʋmã 7:55, 56.

Yaa zʋɩf-rãmbã taoor dãmb sẽn kɩt tɩ b kʋ a Zeezi wã la a Etɛn sẽn da gomd ne wã. A Etɛn sẽn yã bũmb ningã wilgdame t’a Zeezi vʋʋgame n be saasẽ, la t’a paama ziiri. Tʋm-tʋmd a Poll me goma a Zeezi vʋʋgrã yelle, n yeel tɩ Wẽnnaam vʋʋg-a lame t’a ‘yi kũum sʋka, n kɩt t’a zĩ yẽnda rɩtgo.’ A paasame: “Wẽnnaam kɩtame tɩ Kiris yɩɩd rĩm-dãmba fãa la noyã fãa la pãensã fãa la naam fãa, la b yʋʋrã yɩɩda yʋyã fãa sẽn pʋtã, la ka dũndã zamaanã pʋg bal ye, la yaa ne zamaan ning sẽn watã me pʋgẽ.”—Efɛɛs-rãmbã 1:20, 21.

Biiblã pa bilgd a Zeezi ziirã sẽn yaa to-to wã bal ye. A wilgdame me tɩ wa a Zeova, yẽ me rata ãdem-biisã neere. Sɩd me, a Zeezi sẽn wa n be tẽng zugã, a sãooga bãad-rãmb la koms-rãmba, la a vʋʋg kũum. A sẽn sak n ki tɩ yɩ maoongã wilgdame t’a nonga Wẽnnaam la ãdem-biisã hal wʋsgo. (Efɛɛs-rãmbã 2:4, 5) A Zeezi bee Wẽnnaam rɩtgo, la ka la bilfu, a na n kɩtame tɩ wẽn-sakdbã paam bark buud toor-toor dũniyã gill zugu.

MALƐGSÃ TƲMDA WẼNNAAM YĨNGA

“Mam [no-rɛɛs a Dãniyɛll] sẽn wa n getẽ wã, mam yãndame tɩ b vigind naam gɛya, la nin-kẽem kulkuug n wa n zaoond be. . . . Neb tus kẽema n tʋmd bãmb yĩnga, la neb tus kẽema ka tɛk n yas bãmb taoore.”—Dãniyɛll 7:9, 10.

Bõn-makr kãngã pʋgẽ, a Dãniyɛll pa yã malɛk a ye bal ye. A yãa malɛgs ka tɛka. Ad yaa bõn-makr sẽn kẽesd rabeem! Malɛgsã tara ziir wʋsgo, tɩ b yamã la b pãngã me yɩɩd ninsaalbã hal zĩig sẽn zãre. B sʋkã, seribẽ-rãmbã beeme, serafẽ-rãmba, la malɛgs a taaba. Biiblã gomda malɛgsã yell hal sẽn yɩɩd naoor 250.

Malɛgsã pa ninsaalb sẽn deng n zĩnd tẽngã zug ye. Wẽnnaam naan-b-la hal sẽn kaoose, n yaool n na n naan ninsaalbã. Wẽnnaam sẽn wa n naand dũniyã, tɩ malɛgsã ra beeme, b yãame n kaas ne sũ-noogo.—Zoob 38:4-7.

Tʋʋm nins malɛgsã sẽn tʋmd Wẽnnaam yĩnga waoogame. Wala makre, b sõngdame tɩ Wẽnnaam soolmã bɩ a Rĩungã koe-noogã mooneg sẽn yaa tʋʋmd sẽn tar yõod wʋsgã tat zĩig fãa. (Matye 24:14) Bõn-makr pʋgẽ, tʋm-tʋmd a Zã yãa malɛk sẽn sõngd n tʋmd tʋʋm-kãngã. A Zã yeelame: “Mam yãnda malɛɛk a to sẽn yɩgd n pɩʋʋgd yĩngri: A rag n tara koe-noog sẽn paad wakat sẽn kõn sa, n na n togs neb nins sẽn be tẽng zugã, soolem fãa, buud fãa, goam buud fãa nebã, la tẽng fãa nebã.” (Vẽnegre 14:6) Rũndã-rũndã, malɛgsã pa gomd ne neb wa b sẽn gom ne neb kẽer pĩnd wẽndẽ wã ye. La b sõngda sẽn moond-b koɛɛgã, n wilgd-b sor tɩ b paamd pʋ-peelem dãmbã n taasd koe-noogã.

A SƲƖTÃAN BELGDA NEB WƲSGO

“Malegs naab a Misɛll [a Zeezi Kirist] ne a malegsã zaba ne wag-bɛɛgã. Wag-bɛɛgã me ne a malegsã zabame, la b ka tõog ye. . . . B riga wag-bɛ-kãsengã, wag-kʋdrã b sẽn boond tɩ rõatã la a Sʋtãana, soab ning sẽn belgd tẽngã zĩig ning fãa neb sẽn be wã nebã. B tusa yẽnda ne a malegsã n lob tẽng zugu.”—Vẽnegre 12:7-9.

Pa yɩ wakat fãa la laafɩ zĩnd saasẽ ye. Ninsaalbã naaneg poore, malɛk a ye n wa n yik n dat tɩ b waoog yẽ wa Wẽnnaam. A tʋlsmã paama pãng hal n kɩt t’a kɩɩs a Zeova n lebg Sʋɩtãana, rat n yeel tɩ “kɩɩsda.” Malɛgs a taab n wa n lebg kɩɩsdb wa yẽ. Bãmb la b sẽn boond tɩ zĩn-dãmbã. B wẽnemã pʋgẽ, b kɩɩsda a Zeova, la b belgd ninsaalb wʋsg tɩ bãmb me kɩɩsd a Zeova noyã la a saglsã a sẽn kõ tõnd neer yĩngã.

A Sʋɩtãan ne a zĩn-dãmbã yaa wẽnem dãmba, la b nong tʋʋm-yoodo. B yaa ninsaalbã bɛɛba. Naoor wʋsgo, yaa bãmb n kɩtd tɩ nebã namsdẽ. Wala makre, a Sʋɩtãan kʋʋ wẽn-sakd a Zoob tʋm-tʋmdbã ne a rũmsã. Rẽ poore, a kɩtame tɩ “sob-kãseng” lub roog n kʋ a kamb piigã sẽn da be roogã pʋgẽ wã. Sẽn paase, a wa n loba “a Zoob yĩn-gãong bã-toaag sẽn sɩng ne a nao-pʋsã n tɩ tãag a zugã.”—Zoob 1:7-19; 2:7.

Ka la bilfu, b na n sãama a Sʋɩtãana. B sẽn dig-a t’a sig tẽng zugã tɛka, a miime t’a ‘wakatã sẽn ketã ka waoog ye.’ (Vẽnegre 12:12) A Sʋɩtãan sãoongã pa na n vaale, la rẽ yaa koe-noog tɛkẽ!

WẼNNAAM YÃKA NEB TƖ B NA N TƖ VƖƖMD SAASẼ

“Yãmb [a Zeezi] fãaga neb buud fãa pʋgẽ, goam buud fãa pʋgẽ, tẽms fãa pʋgẽ, soolem fãa pʋgẽ ne yãmb zɩɩm tɩ b lebg Wẽnnaam nebã. Yãmb kɩtame tɩ bãmb lebg soolem la maan-kʋʋdb tõnd Wẽnnaamã yĩnga, la bãmb na n dɩɩ naam dũni zugu.”—Vẽnegre 5:9, 10.

Neb a taab me n na n vʋʋg n tɩ vɩɩmd saasẽ wa a Zeezi. A Zeezi ra yeela a tʋm-tʋmdb nins sẽn kell n pa ne yẽ wã woto: “Mam dabdame n na n tɩ segl zĩig yãmb yĩnga. Dẽ, . . . mam na n lebg n waa n peega yãmba, tɩ maam sẽn be zĩig ningã, bɩ yãmb me zĩnd be.”—Zã 14:2, 3.

Neb nins sẽn debd saasẽ wã pa rebd be zaalem yĩng ye. B na n tɩ naaga a Zeezi n yɩ Wẽnnaam Rĩungã bɩ a goosneemã nanambse, n soog tẽngã n kɩt tɩ ãdem-biisã paam bark buud toor-toore. Yaa Rĩung-kãng bɩ soolem-kãng la a Zeezi sẽn yeel a karen-biisã tɩ b pʋʋs n kos tɩ wa wã. A yeelame tɩ b kos woto: “Tõnd ba sẽn be arzãna, bɩ yãmb yʋʋrã paam waoogre, tɩ yãmb soolmã wa, tɩ yãmb daab maan tẽng zug wa sẽn maand arzãnã.”—Matye 6:9, 10.

SẼN BE-B SAASẼ WÃ SẼN NA N MAANE

“Mam [tʋm-tʋmd a Zã] wʋma koe-kãseng sẽn yi geerẽ wã n yeele: Ad Wẽnnaam yirã bee ninsaalb sʋka. . . . Wẽnnaam na n yẽesa nintãm fãa sẽn be b ninẽ wã. Kũum kõn leb n zĩnd ye, la sũ-sãang wall yãbre, wall toog kõn leb n zĩnd ye. Bala, dẽenem bũmbã fãa loogame.”—Vẽnegre 21:3, 4.

Vɛrse-kãngã na n pidsa wakat ning Wẽnnaam goosneemã, rat n yeel t’a Zeezi la neb nins sẽn na n vʋʋg n kẽng saasẽ wã sẽn na n kɩt t’a Sʋɩtãan naamã sa, tɩ tẽngã lebg arzãnã. Bũmb nins fãa sẽn kɩt tɩ ninsaalbã namsdẽ wã na n saame. Baa kũum meng pa na n le zĩnd ye.

La neb milyaar-dãmbã sẽn ki n pa na n vʋʋg n kẽng saasẽ wã yẽ? B na n wa vʋʋg-b lame, tɩ b paam n vɩɩmd wakat sẽn kõn sa arzãnã pʋgẽ tẽngã zugu.—Matye 5:5.