Keng-y y pɛlg n gũ a Zeova pʋlemsã pidsgu

1, 2. a) Bõe yĩng tɩ tõnd sẽn gũud d tẽebã pidsgã yaa toor ne neb a taabã? b) Sogs-bʋs la d na n leok sõs-kãngã pʋgẽ?

A ZEOVA sẽn pʋlem tõnd bũmb nins tɩ d gũudẽ wã yaa bõn-sõma tɛkẽ! A pʋlmame t’a na n kɩtame t’a yʋʋrã paam waoogre, la a kɩt t’a raabã maan tẽng zug wa sẽn maand saasẽ wã. (Mat. 6:9, 10) Yaa bõn-kãensã la d gũud n yɩɩda. A leb n pʋlmame tɩ sẽn paam-b vʋʋsem sõng zaeebã na n tɩ vɩɩmda saasẽ wakat sẽn kõn sa, tɩ ‘piis a taabã’ vɩɩmd tẽngã zug wakat sẽn kõn sa. Sɩd na n yɩɩ sũ-noog tɛkẽ! (Zã 10:16; 2 Pɩy. 3:13) La nananda, d saagdame t’a Zeova na n ket n ningda a nin-buiidã bark wa a sẽn pʋlmã.

² Biiblã yeelame tɩ tẽeb yaa “pɛl-kɛgeng” ned sẽn tar t’a na n paama bũmb nins a sẽn tẽedã. Rat n yeelame tɩ neb nins sẽn tar tẽeb hakɩɩkã kɩsa sɩd t’a Zeova sẽn pʋlem bũmb ninsã fãa na n pidsame. (Ebre. 11:1) Rũndã-rũndã, neb wʋsg saagdame tɩ b na n paama bũmb toor-toore, la b pa tõe n kɩs sɩd tɩ b na n paamame ye. Wala makre, ned tõe n tãoo lotori n saagdẽ t’a na n dɩɩme, la a pa tõe n kɩs sɩd ne rẽ ye. La tõndo? Bõe la d tõe n maan tɩ sõng-d tɩ d keng d pɛlg n gũ a Zeova pʋlemsã pidsgu? D tẽebã sã n tar pãnga, wãn to la tõe n naf-do? Sõs-kãnga pʋgẽ, d na n leoka sogs-kãensa.

3. Bõe yĩng tɩ d kɩs sɩd t’a Zeova pʋlemsã fãa na n pidsame?

³ Tõnd ned baa a ye pa rog ne tẽeb ye. Yɩl n tall n tẽebo, rẽnda d paam vʋʋsem sõngã sõngre, n bãng Wẽnnaam sõma. (Gal. 5:22) D sã n bãng t’a Zeova yaa pãng sẽn ka to soaba, la t’a yamã ka koaka, d na n kɩsa sɩd t’a tõe n pidsa a pʋlemsã fãa. A Zeova mengã sã n gomd a pʋlemsã yelle, yaa wa zoe n pidsame. A goma a pʋlems yelle, n yeel tɩ “maaname.” (Karm-y Vẽnegr 21:3-6.) D miime t’a Zeova pidsda sẽn pʋlem fãa. A yaa Wẽnnaam sẽn yaa sɩd soaba. Yaa rẽ yĩng la d sẽn tẽed a sẽn pʋlem tɩ watẽ wã.—Tõo. 7:9.

NEB SẼN TALL TẼEB HAKƖƖKA

4. Bõe la pĩnd wẽn-sakdbã ra gũuda?

⁴ Ebre-rãmb sak 11 wã pʋgẽ, b goma rap la pagb 16 sẽn tall tẽeb yelle, n sõdg b yʋya. La neb a taab me yell la gom be, n pa sõdg b yʋy ye. Bãmb me yɩɩ neb sẽn “paam kaset-sõng b tẽebã yĩnga.” (Ebre. 11:39) B fãa ra gũuda “yageng” ning a Zeova sẽn pʋlem t’a na n waame wã. B ra miime tɩ yagengã na n sãama a Zeova bɛɛbã fãa, la a kɩt tɩ tẽngã lebg arzãn wa a Zeova sẽn da sɩng n datã. (Sɩng. 3:15) B ra kɩsa sɩd tɩ b kũum poore, a Zeova na n wa vʋʋg-b lame. La b ra pa saagd tɩ b na n wa tɩ vɩɩmda saasẽ ye. Bala, a Zeezi Kirist sẽn yaa “yageng” ning b sẽn da gũudã ra nan pa wa pak sor tɩ wẽn-sakdb tõe n kẽng saasẽ ye. (Gal. 3:16) B ra gũuda wakat ning tẽngã sẽn na n lebg arzãn tɩ b vɩɩmd a zug wakat sẽn kõn sa wã.—Yɩɩn. 37:11; Eza. 26:19; Ooze 13:14.

5, 6. Bõe la a Abrahaam ne a zakã rãmb ra gũuda? Bõe la b maan tɩ sõng-b tɩ b tẽebã kell n tall pãnga? (Ges-y sõsgã sɩngrẽ fotã.)

⁵ Ebre-rãmb 11:13 yeelame tɩ pĩnd wẽn-sakdbã “fãa kii ne b tẽebã, n ka paam bũmb nins b sẽn da kãab bãmbã,” la tɩ “b tool n gesa bõn-kãens yɩɩg n beel-ba, n wilg tɩ bãmb mensã yaa sãamb la kaoos-wet tẽng zug ka.” B ra gũuda dũni-paalgã, n da mamsd wa b zoe n bee be. A Abrahaam ra maanda woto. A Zeezi goma a yelle, n yeele: “Yãmb ba a Abrahaam dag n kɩdma ne sũ-noogo, a sẽn dag n tagsd t’a na n yãnda mam daarã yĩnga. A yãnd-a lame, n maan sũ-noogo.” (Zã 8:56) A Saara ne a Izaak la a Zakoob ne wẽn-sakdb a taab me ra gũuda wakat ning Wẽnnaam Rĩungã b sẽn mak ne tẽng sẽn na n soog dũniyã gillã. Wẽnnaam mengã n yaa tẽng-kãng “meebã magda la a meta.”—Ebre. 11:8-11.

⁶ Bõe n sõng a Abrahaam ne a zakã rãmb tɩ b tẽebã kell n tall pãnga? B ra modgd n bãngda bũmb wʋsg a Zeova zugu. Wẽnnaam da mi n tʋma malɛgs tɩ b taas-b a koeese. A ra mi n goma ne-b bõn-makr pʋgẽ me, pa rẽ bɩ zãmsd pʋgẽ. Tõe me tɩ b kelga wẽn-sakdb yʋʋm sẽn yɩɩd-ba, wall b karma kibay sẽn gomd a Zeova yelle. A Abrahaam ne a zakã rãmb pa tol n yĩm Wẽnnaam pʋlemsã ye. B ra nong n bʋgsda rẽ zugu. Kɩtame tɩ b ra pa sãmbd a Zeova sã n na n pidsa a pʋlemsã ye. Rẽ n so tɩ b kell n sak a Zeova, baa b sẽn paam namsg b tẽebã yĩnga, la b paam zu-loees a taabã.

7. Bõe la a Zeova kõ tõnd n na n sõng-d tɩ d tẽebã kell n tall pãnga, la bõe la d segd n maane?

⁷ Bõe n na n sõng tõnd me tɩ d tẽebã kell n tall pãnga? A Zeova kõo tõnd Biiblã sẽn yaa a Gomdã, n na n sõng-d tɩ d bãng bũmb nins a sẽn pʋlem tɩ watẽ wã. Ne Biiblã maasem, a wilgda d sẽn segd maan n paam sũ-noog hakɩɩka. Rẽ n so tɩ d segd n karemd Biiblã daar fãa la d tũud a saglsã. (Yɩɩn. 1:1-3; karm-y Tʋʋm 17:11.) A Zeova leb n tũnugda ne tʋm-tʋmd sẽn tũud sɩdã, n kõt tõnd “rɩɩb wakat fãa sẽn segde.” (Mat. 24:45) D tog n dɩka pĩnd wẽn-sakdbã togs-n-taar n karemd Wẽnnaam Gomdã, n bãngd a pʋlemsã, la d maagd d yĩng n bʋgsdẽ. Rẽ na n sõng-d lame tɩ d kell n sak Wẽnnaam, n gũud wakat ning Rĩungã sẽn na n wa soog tẽngã gillã.

8. Bõe yĩng tɩ pʋʋsgã tõe n keng tẽebo?

⁸ Bõe me n sõng pĩnd wẽn-sakdbã tɩ b tẽebã kell n tall pãnga? B ra wae n pʋʋsda a Zeova n kot a sõngre. A Zeova ra leokda b kosgã, tɩ rẽ paasd b tẽebã pãnga. (Nee. 1:4, 11; Yɩɩn. 34:5, 16, 18; Dãn. 9:19-21) Tõnd me tõe n pelga d pʋg n pʋʋs a Zeova n togs-a d zu-loeese, n miẽ t’a na n kelg-d lame, n keng d raood tɩ d tõog toogo. A sã n leok d pʋʋsgo, paasda d tẽebã pãnga. (Karm-y 1 Zã 5:14, 15.) Tẽebã naaga zʋg-sõma nins vʋʋsem sõngã sẽn sõngd ned t’a bɩɩsã. Rẽnd yɩta sõma me tɩ d pʋʋsd a Zeova n kot a vʋʋsem sõngã.—Luk 11:9, 13.

9. D segd n tẽegda bõe d pʋʋsg pʋgẽ?

⁹ D sã n pʋʋsd a Zeova, d pa segd n kot tõnd bõn-daabã bal ye. D segd n tẽegd n pʋʋsd-a-la bark la d pẽgd-a daar fãa. Sɩd me, a “tʋʋm-kãsemsã sõor yaa wʋsg tɩ ka tõe n sõd n sɛ ye.” (Yɩɩn. 40:6) Sẽn paase, d segd n tẽegda ‘neb nins sẽn be bi-bees roogẽ wã yelle, wa tõnd mens bee bi-bees roogẽ wã ne-ba.’ Segdame me tɩ d pʋʋsd d tẽed-n-taasã sẽn be dũni gill zugã yĩnga, sẽn yɩɩd fãa, d “taoor dãmbã” yĩnga. D sã n neẽ t’a Zeova leokda d pʋʋsgã, d tẽebã pãng paasdame, tɩ tõnd ne yẽ zoodã me paasdẽ.—Ebre. 13:3, 7.

NEB SẼN PA SAK N KƖƖS A ZEOVA

10. Bõe n sõng wẽn-sakdb tɩ b tall raood n kell n sak Wẽnnaam?

¹⁰ Ebre-rãmb sak 11 wã pʋgẽ, tʋm-tʋmd a Poll yeelame: “Pagb kẽer paamame tɩ b neb sẽn ki leb n vʋʋge. Neb namsa neb a taaba, la sẽn namsdbã ka sak tɩ b yols-b ye, sẽn na yɩlg n paam vʋʋgr sẽn yaa sõama n yɩɩda.” (Ebre. 11:35) Wẽn-sakdb wʋsg paama namsgo, la b sẽn da tẽed kũum vʋʋgrã, b kell n saka Wẽnnaam. B ra kɩsa sɩd t’a Zeova na n wa vʋʋg-b lame, tɩ b vɩɩmd wakat sẽn kõn sa tẽngã zugu. Tẽeg-y-yã a Nabot la a Zakari yelle. B lob-b-la ne kug n kʋ, b sẽn maan a Zeova raab yĩnga. (1 Rĩm 21:3, 15; 2 Kib. 24:20, 21) A Dãniyɛll ne a tũud-n-taasã me pa sak n kɩɩs Wẽnnaam sẽn na yɩl “tɩ b yols-b ye.” B sẽn da kɩs sɩd tɩ Wẽnnaam yaa pãn-kãseng soabã kɩtame tɩ b “mum gɩgma noyã, la b sãam bugum pãnga.”—Ebre. 11:33, 34; Dãn. 3:16-18, 20, 28; 6:14, 17, 22-24.

11. Bõe la b maan no-rɛɛsdb kẽer b tẽebã yĩnga?

¹¹ B yaala no-rɛɛsdb la b kẽes-b bãens roogo. Wala makre, a Miise la a Zeremi. A taab me ra “yeebda wetẽ, la tãmsẽ, la tãms bogdẽ, la bogd sẽn tu tẽnga.” Wala makre, no-rɛɛs a Eli. B fãa tõoga toog n kell n sak Wẽnnaam, bala b ra tara “pɛl-kɛgeng” tɩ b na n paama ‘bũmb nins b sẽn tẽedã.’—Ebre. 11:1, 36-38; 1 Rĩm 18:13; 22:24-27; Zer. 20:1, 2; 28:10, 11; 32:2.

12. Ãnd n kõ tõnd mak-sõng sẽn ka to? Bõe n sõng-a t’a tõog toogo?

¹² A Poll sẽn gom pagb la rap sẽn tall tẽeb hakɩɩkã yell n sa wã, a wilgame tɩ yaa a Zeezi Kirist n kõ mak-sõng sẽn ka to. A yeelame t’a Zeezi saka kũum ra-lukã “n ka zoe yãnd ye, sũ-noog sẽn be bãmb taoora yĩnga.” (Ebre. 12:2, Wẽnnaam sebre, 1983) Rẽ poore, a sagla kiris-nebã tɩ b bʋgs a Zeezi mak-sõngã zug neere. (Karm-y Ebre-rãmb 12:3.) Pipi kiris-neb wʋsg n dɩk a Zeezi togs-n-taar n sak kũum, b sẽn da pa rat n kɩɩs a Zeova yĩnga. Wala makre, a Ãntipaas. (Vẽn. 2:13) Kiris-nin-kãens zoe n vʋʋgame n be saasẽ. La wẽn-sakdb nins sẽn vɩɩmd nand t’a Zeezi ki wã na n vʋʋgame n vɩɩmd tẽngã zugu. (Ebre. 11:35) A Zeezi naamã sɩnga yʋʋmd 1914. A naamã sɩngr poore, sẽn paam-b vʋʋsem sõngã zaeeb n da zoe n maan kaalmã vʋʋgame n tɩ be saasẽ. B na n wa naaga a Zeezi n soog tẽngã.—Vẽn. 20:4.

A ZEOVA KASET RÃMB SẼN KELL N TALL TẼEBO

13, 14. Zu-loe-bʋs la a Rudolf paam-yã, la bõe n sõng-a t’a tõog toogo?

¹³ Wẽnnaam a Zeova nin-buiidã sẽn yaa milyõ-rãmbã rɩkda a Zeezi togs-n-taare. B bʋgsda Wẽnnaam pʋlemsã zugu, tɩ sõngd-b tɩ b maand sɩd ne-a, baa b sã n paamd namsg b tũudmã yĩnga. D gom a Rudolf Graichen yelle. A roga yʋʋmd 1925, Alemayn soolmẽ wã. A yãadmẽ, a roagdbã ra yagla fot-rãmb sẽn bilgd Biiblã kibay b roogẽ wã. A yeelame: “Fot a ye zug la b ra wilgd rigd-n-yĩidg ne peosgo, ãbg ne bulli, n paas nag-bil ne gɩgem-polle, tɩ b fãa be ne taab ne laafɩ, tɩ bi-bilf yaa b pe-kɩɩma.” (Eza. 11:6-9) Fot-kãng kɩtame t’a Rudolf ra tagsd arzãnã yell wʋsgo, tɩ kengd a pɛlg tɩ tẽngã na n yɩɩ arzãna. Nazi-rãmbã nams-a-la yʋʋm wʋsgo. Rẽ zugẽ, a paama nams-toaag kominist-rãmbã me nugẽ. La ne rẽ fãa, a sẽn da kɩs sɩd tɩ tẽngã na n lebga arzãnã, a kell n saka a Zeova.

¹⁴ A Rudolf paama zu-loe-kɛgems a taaba. A ma wã b sẽn da pag kãn de kõnsãntrasiõ pʋgẽ wã yika bãag buud sẽn wõnd gɛndba, tɩ tũ ne a yõore. A ba wã sak n sĩyn sebr n wilg t’a pa le yaa a Zeova Kaset soab ye. La a Rudolf tẽebã kell n talla pãnga. A sẽn wa n yi bãens roogã, b yãk-a lame t’a lebg tigims sull yel-gɛta. Rẽ poore, a paamame n kẽng Gileyaad lekollã. Lekollã poore, b tʋm-a-la Sili. Be me, a le yɩɩ tigims sull yel-gɛta. A wa n kẽe kãadem ne misioneer-poak sẽn be Sili t’a yʋʋr la a Patsy. B wa n doga bi-pugla, la a maana kaalem kiis a wãn poore. Rẽ tɩ b kãadmã zemsa yʋʋmde. A Patsy me wa n maana kaalem. A ra tara yʋʋm 43 bala. Ne zu-loe-kãensã fãa, a Rudolf kell n tũ a Zeova. Baa a sẽn wa n kʋʋl n pa le tar keelmã, a ra ket n yaa kãsem-soab la wakat fãa so-pakda. A Rudolf vɩɩmã kibar bee yʋʋmd 1997 sa-sik kiuug pipi daar Gũusg Gasgã neng 20-25.^[1]

15. Kiba-bʋs n wilgd tɩ d tẽed-n-taas n tũud a Zeova ne sũ-noogo, baa b sẽn namsd-b wʋsgã?

¹⁵ Rũndã-rũndã, tõnd tẽed-n-taas wʋsg ket n tũuda a Zeova ne sũ-noogo, baa b sẽn namsd-b tɩ loog nugã. Wʋsg la b pag bãens roog Eritre, Sẽngapʋʋr la Kooredisiid soolmẽ wã. La b fãa la bal yaa b sẽn dat n tũ a Zeezi noore, n tõdg tɩ b kõn kẽng zabrã. (Mat. 26:52) D tõe n sõdga a Isaac ne a Negede la a Paulos. B pag-b-la bãens Eritre soolmẽ wã sẽn yɩɩd yʋʋm 20 masã. B nams-b lame tɩ looge. Sẽn paase, b pa tõog n na n kẽ kãadem wall n ges b roagdbã yell ye. La ne rẽ fãa, b ket n tũuda a Zeova hal tɩ b tẽebã tar pãnga. Baa bãensã roog gũudb meng nand-b lame. A Isaac ne a Negede la a Paulos foto wã bee tõnd sɩtã pʋgẽ. Baa sẽn pa nana ne-bã, b nensã bee laado.

16. D tẽebã sã n tar pãnga, na n sõng-d lame tɩ d maan bõe?

¹⁶ Pa a Zeova Kaset rãmbã fãa la b kẽes roog wall b nams tɩ loog nug wa b rãmb nins yell d sẽn gomã ye. La b wʋsg namsa naong yĩnga, wall sabab-wẽns pa rẽ bɩ zab yĩnga. B taab me n bas yʋʋr wall arzɛk baoobo, n lʋɩɩs a Zeova raabã taoor wa a Abrahaam, a Izaak, a Zakoob la a Moyiiz. Bõe n sõng-ba? Yaa b sẽn nong a Zeova ne b sũur fãa, la b kɩs sɩd t’a na n pidsa a pʋlemsã. B miime t’a na n wa keoa neb nins sẽn tũud-a ne b sũur fãa wã, n kɩt tɩ b vɩɩmd wakat sẽn kõn sa dũni-paalgã pʋgẽ, zĩig ning kɛgr buud fãa sẽn pa na n zĩndã.—Karm-y Yɩɩn-sõamyã 37:5, 7, 9, 29.

17. Bõe la yãmb dat ne y sũur fãa n maane? Sõsg ning sẽn pʋgdã na n goma bõe yelle?

¹⁷ Sõs-kãngã sõng-d lame tɩ d bãng tɩ d sã n bʋgsd Wẽnnaam pʋlemsã zug la d wɩng ne pʋʋsgo, d tẽebã na n kell n talla pãnga. Rẽ na n kɩtame tɩ d tõog toog buud fãa, n gũ bũmb nins a Zeova sẽn pʋlmã ne ‘pɛl-kɛgenga.’ Sõsg ning sẽn pʋgdã na n sõng-d lame tɩ d bãng bũmb a taab Biiblã sẽn yet tẽebã zugu.