Sũ-bʋgsem soab yaa yam soaba

A Toni yaa pag sẽn get bãad-rãmb la neb sẽn kʋʋl yelle. Daar a ye, a kẽng n na n tɩ gesa ned sẽn kʋʋle. A sẽn ta n kogs zakã noorã, pag sẽn zems yʋʋm 50 n wa n pake. Pagã tãsa a Toni, n sɩng a tʋya, n yeel t’a pa wa pĩnd n na n ges yẽ ma wã yell ye. A Toni yaool n pa yõsg wakatã ye. La a bʋka a meng n kos pagã sugri, b moorã sẽn yõsgã yĩnga.

A TONI sẽn le kẽng nindaarã, pagã le yika a sũur ne-a. A Toni manesem yɩɩ wãna? Ad a sẽn wa n yeele: “Yellã namsa maam wʋsgo. A goma maam zaalem.” La so-kãnga yɛsa, a Toni kosa pagã sugri, la a yeel-a tɩ yẽ miime tɩ yɛlã pa nana ne-a ye.

Sã n da yaa yãmb la a Toni, y manesem yɩta wãna? Y ra na n baoome meng n bʋk y sũur sɩda? Ra na n yɩɩ toog tɩ y tõog y sũur bɩ? Sãmbg sẽn kae, tõe n yɩɩ toog tɩ ned tõog a sũur yell a woto buud pʋgẽ. D sã n zɩ ne yɩɩre, wall ned sã n bao d noore, yɩl n kell n yɩ sũ-bʋgsem soab tõe n yɩɩ toog wʋsgo.

La Biiblã sagenda kiris-nebã tɩ b yɩ sũ-bʋgsem dãmba. Sɩd me, Biiblã wilgdame tɩ ned sã n yaa yam soaba, a yaa sũ-bʋgsem soab me. Karen-biig a Zak ra sokame yaa: “Ãnda n be yãmb sʋk n tar yam la bãngre?” A leokame: “Bɩ a wilg a tʋʋma ne a yel-manesem sõama ne sũ-bʋgsem yam sẽn wat ne.” (Zak 3:13, Wẽnnaam Sebre, 1983) Bõe n wilgd tɩ ned sã n yaa sũ-bʋgsem soaba, a tara yam ning sẽn yit yĩngrã, rat n yeel tɩ Wẽnnaam nengẽ wã? Bõe n tõe n sõng-d tɩ d rɩk Wẽnnaam togs-n-taar n yɩ sũ-bʋgsem soaba?

SŨ-BƲGSEM SOAB TARA YAM

Sũ-bʋgsem soab goam sigsda sũuri. “Leok-bʋgsg sigsda sũuri, la gom-kɛgeng paasda sũ-puugri.”—Yel. 15:1.

Yell sã n zabd ned t’a gom ne sũ-yikri, tõe n zẽna yellã, bala yaa wa b sẽn paas raad bugmẽ. (Yel. 26:21) La a sã n tõog a sũur n gom ne bʋgsem, naoor wʋsgo, yellã pa zãagd zĩig ye. Pʋd n tõe n kɩtame tɩ sẽn sɩng-a yellã toeem yam.

A Toni yãa rẽ vẽenega. A sẽn leok pagã ne bʋgsmã, pagã ninga nintãm. A yeela a Toni t’a zakã zu-loees n paas yɛl a taab n loog a nugu. A Toni tũnuga ne rẽ n taas-a koe-noogã, n kell n sɩng Biibl zãmsgo. Rẽ fãa yaa a sẽn tõog a sũur n leok ne bʋgsmã.

Sũ-bʋgsem kõta sũ-noogo. “Sũ-noog rãmba la nin-bʋgse tɩ tẽnga na n yɩɩ bãmb soolem.”—Mat. 5:4, Sebr sõngo.

Bõe n kɩt tɩ sũ-bʋgsem dãmbã tar sũ-noogo? Neb wʋsg sẽn da nong zab tara sũ-noog masã, b sẽn modg n lebg sũ-bʋgsem dãmb yĩnga. B vɩɩmã toeemame n tar barka, tɩ b miẽ me tɩ beoog na n yɩɩ neere. (Kol. 3:12) A Adolfo sẽn yaa tigims sull yel-gɛt n be Ɛspayn wã wilga yẽ vɩɩmã sẽn da yaa to-to nand t’a lebg a Zeova Kaset soabã.

Ad a sẽn yeele: “Mam vɩɩmã ra ka võor ye. M sũurã ra yikda tao-tao, hal tɩ m zo-rãmb kẽer ra zoet-ma, m mo-gãgsã, la m sẽn da pa zɛɛd zabrã yĩnga. La daar a ye, yel-kãseng n paam maam. B kõsa maam zĩis a yoob zabr sasa, tɩ m zɩɩmã raag hal tɩ m da na n ki.”

La rũndã-rũndã, ne a no-goamã la a manesmã, a Adolfo sõngda a taabã tɩ b lebgd sũ-bʋgsem dãmba. A sẽn lebg nin-bʋgsgã kɩtame tɩ neb wʋsg nong a zĩigẽ. A Adolfo yeelame tɩ yẽ sẽn tõog n toeemã noom-a-la wʋsgo. A pʋʋsda a Zeova bark a sẽn sõng-a t’a bɩɩs sũ-bʋgsmã.

Sũ-bʋgsem nooma a Zeova. “M biiga, maan yam n kõ maam sũ-noogo tɩ m paam n leok sẽn paoogd-a maamã.”—Yel. 27:11, Wẽnnaam Sebre, 1983.

Sɩd me, a Sʋɩtãan sẽn yaa a Zeova bɛ-kãsengã baooda a noor wakat fãa. Rẽnd bʋʋm waoog sẽn sek a na yikd a sũuri. La Biiblã yeelame t’a “sũur ka yikd tao-tao ye.” (Yik. 34:6) D sã n modg n dɩk Wẽnnaam togs-n-taar n yɩ sũ-bʋgsem soaba, n pa yikd d sũur tao-tao, d wilgdame tɩ d yaa yam soaba, tɩ noom a Zeova wʋsgo.—Efɛ. 5:1.

Dũni-kãngã nebã wʋsg manesem kɩtame tɩ yɩl n bɩɩs sũ-bʋgsem pa nana ye. D mi n sega neb sẽn yaa “yʋ-baoodba, wilg-m-mens rãmba, wẽn-paoogdba,” “tẽn-kãn-neba,” neb “sẽn ka tar yõk-m-menga,” la “nin-wẽnse.” (2 Tɩm. 3:2, 3) La rẽ pa segd n kɩt tɩ kiris-ned pa bɩɩs sũ-bʋgsem ye. Wẽnnaam Gomdã tẽegda tõnd tɩ yam ning sẽn yit yĩngrã “baooda laafɩ, a wata ne sũ-bʋgsem.” (Zak 3:17) Rẽnd d sã n yaa sũ-bʋgsem soab la ned sẽn baood laafɩ, d wilgdame tɩ d paama yam ning sẽn yit Wẽnnaam nengẽ wã. Yam-kãng na n sõng-d lame tɩ ned sã n bao d noor bɩ d tõog d sũuri. Leb n na n kɩtame tɩ tõnd ne a Zeova sẽn yaa yam sẽn ka to soabã zood paam pãnga.

Bõe n tõe n sõng-y tɩ y bɩɩs sũ-bʋgsem?

Ned sã n gom yãmb wẽnga, wall a maan-y-la sẽn pa segde, bõe n na n sõng-y tɩ y tõog y sũuri, n tall manesem sẽn na n yɩ a Zeova noogo? Ad sagls a wãna. Bʋgs-y rẽ zugu.

1 GŨUS-Y Y MENG NE ‘DŨNIYÃ SƖƖGÃ.’—1 Kor. 2:12. Neb wʋsg tagsdame tɩ sũ-bʋgsem soab yaa ned sẽn pa tar raoodo. B yetame tɩ sẽn tar-a raood gomda a yam, a pa nin-bʋgsg me. Sẽn tagsd-b woto wã tara dũniyã yam bɩ a sɩɩgã, pa yam ning sẽn yit yĩngrã ye. Sɩd me, Biiblã wilgda vẽeneg tɩ sũ-bʋgsem soab yaa raood soab meng-menga. Ad a sẽn yete: “Sũ-mar tõee naaba. Sũ-mar goam tõe n kaooga kõbre.”—Yel. 25:15, Wẽnnaam Sebre, 1983.

Sok-y y menga:

Mam getame tɩ sũ-bʋgsem soab yaa ned sẽn pa tar raood bɩ?

Mam maoodame n na n zãag m meng ne ‘yĩngã tʋʋma,’ wala makre, sũ-yikri, la beem bɩ?—Gal. 5:19, 20.
2 RENG-Y N TAGS-Y NEERE. “Nin-tɩrg tagsdame n yaool n leoke, la nin-wẽnsã noy yiisda gom-wẽnse.” (Yel. 15:28) Ned gomd wall a manesem sã n yik d sũur tɩ d yɩ tao-tao n gome, d tõe n yiisa gomd ninga, n wa maand d bãngẽ. La d sã n deng n tags n yaool n na n gome, na n sõngame tɩ d bãng d sẽn na n yɛɛlga, la sõng me tɩ d goamã yɩ ne bʋgsem, tɩ yellã ra zãag zĩig ye.

Sok-y y menga:

M sã n basdẽ tɩ m sũurã yikd tao-tao, bõe n na n maane?

Ned sã n maan maam bũmbu, m na n sak n basa taal sẽn na yɩl tɩ laafɩ zĩnd bɩ?—Yel. 19:11.
3 WƖNG-Y NE PƲƲSGO. Pʋʋsd-y Wẽnnaam n kot a vʋʋsem sõngã sẽn yaa pãng sẽn ka to wã. (Luk 11:13) Tẽeg-y tɩ vʋʋsem sõngã sõngda ned t’a bɩɩs sũ-bʋgsem ne yõk-m-menga, la zʋg-sõma a taaba. A Adolfo yeelame: “Mam sẽn da wɩngd ne a Zeova pʋʋsgã sõng-m-la wʋsgo, sẽn yɩɩd fãa, yɛlã sã n da wa keng tɩ m pa mi m sẽn maandga.” Tõnd me sã n ‘wɩngd ne pʋʋsgo,’ n kot a Zeova a vʋʋsem sõngã ne d sũur fãa, a na n deega d kosgã.—Rom. 12:12.

Sok-y y menga:

Mam wae n pʋʋsda a Zeova n kotẽ t’a fees-m n bãng sẽn be m sũurẽ wã bɩ?

Mam kot-a-la a vʋʋsem sõngã la yam, sẽn na yɩl n maan sẽn noom-a bɩ?—Yɩɩn. 139:23, 24; Zak 1:5.