Wẽnnaam kũun sẽn ka to wã yõodã waoogame

SẼN KÕ-A KŨUNÃ

Kũun ning tara yõodo, bala sẽn kõ-a tõnd kũunã yaa ned sẽn tar zu-sobendo, pa rẽ bɩ ned d sẽn nand wʋsgo. Kũun ning me ligd pa waooge, tɩ d yaool n nand-a hal wʋsgo, bala, sẽn kõ-a tõndã yaa d zakã neda, pa rẽ bɩ d zo-nongre. Yaa woto ne kũun ning a Rusɛll sẽn kõ a Zordan tɩ d gom a yell pipi sõsgã pʋgẽ wã. La a Zeezi maoongã yẽ?

Pipi, Biiblã yeelame tɩ ‘Wẽnnaam . . . tʋma a Bi-ribl yendã dũniyã pʋgẽ tɩ tõnd tõe n paam vɩɩm yẽ maasem yĩnga.’ (1 Zã 4:9) Woto kɩtame tɩ kũun-kãngã yõodã pa tõe n bãng n sɩf ye. Wẽnnaam zu-sobendã ka to ye. Yɩɩn-gʋlsdã ra goma rẽ yell n yeele: “Yãmb y yembr bal yʋʋr la Sẽn-Ka-Saabo [“a Zeova,” MN], n yaa Sẽn-Ka-To sẽn so dũniyã gilli.” (Yɩɩn-sõamyã 83:19) Kũun sõmblem sẽn ka to pa tõe n paam zĩig a to n zʋʋg Wẽnnaam nengẽ ye.

Yiib-n-soaba, Wẽnnaam yaa tõnd Ba. (Ezayi 63:16) Bõe yĩng tɩ d yet woto? Bala, yaa yẽ n naan tõndo. Sẽn paase, a geta tõnd yell wa ba sẽn nong a kamb sẽn get b yell to-to wã. Wẽnnaam da goma ne a pĩnd wẽndẽ nin-buiidã neb kẽere, n yeele: “A Efrayiim yaa mam bi-nongre, Mam nonga yẽnda ne m sũur fãa. . . . Yaa rẽ n kɩt tɩ rogem yĩn-sidg tar maam a yĩnga. Yaa sɩda, a nimbãaneg tara maam.” (Zeremi 31:20) Wẽnnaam ket n nonga a nin-buiidã woto. A pa tõnd Naand sẽn ka to bal ye. A yaa d Ba sẽn nong-do, la d zo-nongre. Woto pa kɩt tɩ bũmb ning fãa a sẽn kõt-d tar yõod wʋsg sɩda?

A SẼN KÕ-D KŨUNÃ VÕORE

Kũun ning tara yõod wʋsgo, bala, sẽn kõ-a tõnd kũunã maana woto a sẽn nong tõnd yĩnga, pa b sẽn modg-a yĩng ye. Ned sã n kõ a to bũmb ne yamleoogo, a pa baood t’a rol ye.

Yaa Wẽnnaam sẽn nong-dã la a sẽn tʋm a Bi-riblã t’a wa ki tɩ yɩ maoong tõnd yĩngã. Ad Biiblã sẽn yeele: ‘Ad Wẽnnaam sẽn puk b nonglmã to-to tõnd yĩngã: Bãmb tʋma b Bi-ribl yendã dũniyã pʋgẽ tɩ tõnd tõe n paam vɩɩm yẽ maasem yĩnga.’ (1 Zã 4:9) Ra yaa tɩlɛ tɩ Wẽnnaam maan woto bɩ? A bada! Yaa Wẽnnaam “nimbãan-zoeerã” bɩ a bark sẽn ka to wã yĩng la a Zeezi Kirist sẽn ki tɩ yɩ maoong tõnd yĩngã.—Rom-dãmbã 3:24.

Bõe tɩ d yetẽ tɩ Wẽnnaam kũun-kãngã wilgda a “nimbãan-zoeerã”? Biiblã yeelame: “Wakat ning tõnd sẽn dag n ket n yaa yel-wẽn-maandba, Kiris kii tõnd yĩnga.” (Rom-dãmbã 5:8) Tõnd yaa pãn-komsem dãmba, n pa tar d sẽn maandg ye. La Wẽnnaam sẽn nong tõndã, a kɩtame t’a Zeezi wa ki tõnd yĩnga. Tõnd pa segd ne rẽ ye. D leb n pa tõe n dol Wẽnnaam ye. A sẽn kɩt t’a Zeezi wa ki tɩ yɩ maoongã n wilgd a nonglem ne ãdem-biisã n tɩ yɩɩda.

A SẼN MONG A MENG BŨMB NINGÃ

Kũun ning tara yõod wʋsgo, sẽn kõ-a kũunã sẽn sak n mong a meng bũmb ningã yĩnga. Ned sã n sak n dɩk bũmb sẽn tar yõod wʋsg ne-a n kõ-do, kɩtdame tɩ d nong a kũunã hal wʋsgo, bala a sak n monga a menga.

Wẽnnaam kõ a “Bi-ribl yendã.” (Zã 3:16) Bõn-naandg a to kae a sẽn nong n tɩ yɩɩda, a sẽn da tõe n dɩk n kõ ye. Wẽnnaam dɩka yʋʋm sẽn kõn bãng n sõd n naan ãndũniyã. Yʋʋm-kãensã fãa, a Zeezi naag-a lame n tʋme, n da ‘kõt-a sũ-noogo.’ (Yel-bũnã 8:30) A Zeezi yaa Wẽnnaam sẽn yaa a “soab ning ned sẽn ka tõe n yãnda wã wẽnego,” la a ‘bi-ribl-nongre.’ (Koloos-rãmbã 1:13-15) Vẽenega, a Zeova ne a Zeezi sẽn nong taab to-to wã pa tar mak-n-taar ye.

Baasgo, Wẽnnaam ‘ka bas a meng Bi-riblã t’a põs’ ye. (Rom-dãmbã 8:32) A Zeova sẽn kõ tõndã yaa a fãa-fãa. Bũmb a to yõod sẽn yɩɩd a Bi-riblã kae a sẽn da tõe n dɩk n kõ-d ye.

KŨUNÃ SÃ N SƖD NAFDA YÃMBA

Kũun ning tara yõodo, bala, a manegda d yell ninga, tɩ tõe n yaa yell sẽn pak-d menga. D rɩk makr wa yãmb sẽn na n bẽed bãag sẽn tõe n tũ ne y yõore, n pa tar ligd n na n tɩpe, tɩ ned sak n sõng-yã. Rẽ yĩnga y pa na n get a sẽn maanã wa kũun sẽn ka to sɩda?

‘A wa nebã fãa sẽn kiid a Ãdem maasem yĩngã, woto me, nebã fãa na n vʋʋgame, Kiris maasem yĩnga.’ (1 Korẽnt-rãmbã 15:22) Tõnd sẽn yaa a Ãdem yagensã, d fãa yaa ‘kiidba,’ n pa tõe n põs bãas wall kũum, la d pa tõe n maneg yell ning sẽn be tõnd ne Wẽnnaam sʋkã t’a ra le ning-d taal ye. Sẽn paase, d sẽn yaa ninsaalb balã, d kũum poore, d pa tõe n vʋʋg d menga, d pa tõe n vʋʋg d to me. Sɩd me, Biiblã yeelame: “Bãmb ned ba a yembr ka tõe n fãag a to ye. La b ka tõe n yao Wẽnnaam b fãagrã yĩng ye.” (Yɩɩn-sõamyã 49:8, 9) D rata sõngre, bala, d pa tõe n yao n paam fãagr ye. D sã n pa paam sõngre, d pa tar d sẽn maandg ye.

A Zeova sẽn nong tõnd hal wʋsgã, a sak n kõo tõnd bũmb ning sẽn na n kɩt tɩ d põsã, tɩ yaa wa a sẽn yao d tɩbsg ligdi. A kɩtame tɩ ‘nebã fãa na n vʋʋge, Kiris maasem yĩnga.’ Wãn to la a Zeezi maoongã na n kɩt tɩ woto tõog n yɩ? Biiblã yeelame t’a “Bi-ribl a Zeezi zɩɩmã pekda tõnd yel-wẽnã fãa n yiisi.” Ned sã n tẽed a Zeezi maoongã, a paamda a yel-wẽnã sugri, la a na n wa paam vɩɩm sẽn kõn sa. (1 Zã 1:7; 5:13) La wãn to la a Zeezi maoongã na n naf sẽn zoe n maan-b kaalmã? Ad Biiblã sẽn yeele: “A wa kũumã sẽn tũnug rao a yembr tãa n wa wã, kũum vʋʋgrã me tũnuga rao a yembr tãa [a Zeezi] n wa.”—1 Korẽnt-rãmbã 15:21.a

A Zeezi sẽn ki tɩ yɩ maoongã yaa kũun sẽn yit Sẽn-ka-to soabã nengẽ, la wilgdẽ t’a sẽn nong tõnd to-to wã pa tar mak-n-taar ye. Ninsaal bɩ malɛk zɩ n sak n mong a meng tõnd neer yĩng wa a Zeova ye. Sẽn paase, kũun kae n sɩd nafd tõndo, n ta a Zeezi maoongã sẽn fãagd tõnd ne yel-wẽnã la kũumã ye. Hakɩɩka, kũun pa be t’a yõodã ta a Zeezi maoongã sẽn yaa kũun sẽn yɩɩd noor toagsgã ye.