Ãnd dãmb n lʋɩt Wẽnnaam nin-buiidã taoor rũndã-rũndã?

1, 2. A Zeezi sẽn wa n loog saasẽ wã, tõe tɩ tʋm-tʋmdbã ra sokda b mens bõe?

A ZEEZI sẽn wa n loogd saasẽ wã, a tʋm-tʋmdbã yã-a lame. B yalsa Oliiv tɩɩs tãngã zugu, n zẽk b nens n get b zu-soabã la b zoa wã t’a zẽkdẽ, hal tɩ sawadg wa lill-a tɩ b pa le ne-a ye. (Tʋʋ. 1:9, 10) Na maan yʋʋm a yiib woto, a yɩɩ b taoor soaba, n zãms-b bũmb wʋsgo, la a keng b raoodo. La a looga saasẽ masã. B na n maana wãna?

² Nand t’a Zeezi leb saasẽ, a yeel-b lame yaa: “Yãmb na n yɩɩ mam kaset dãmb Zeruzalɛm, la Zʋʋde soolmã fãa, la Samaari, hal tɩ ta dũniyã tɛk fãa.” (Tʋʋ. 1:8) B na n maana wãn n tõog tʋʋm-kãngã? Yaa sɩd t’a Zeezi pʋlmame tɩ Wẽnnaam na n kõ-b-la a vʋʋsem sõngã. (Tʋʋ. 1:5) La tʋʋmdã sẽn segd n tʋm dũniyã gill zugã, yaa tɩlɛ tɩ tũ ne siglgu, la b paam ned t’a ges tʋʋmdã yelle. Ãnd soab n na n maan rẽ? Pĩnd wẽndẽ wã, a Zeova yãka neb tɩ b lʋɩ Israyɛll nebã taoor n ges b yelle. Dẽnd tõe tɩ tʋm-tʋmdbã soka b mens yaa: ‘A Zeova na n yãka ned a to t’a yɩ taoor soab bɩ?’

3. a) A Zeezi saasẽ loogrã poore, bõe la tʋm-tʋmdb 11 wã maan-yã, tɩ ra yaa tɩlɛ? b) Sogs-bʋs la d na n leok sõs-kãngã pʋgẽ?

³ Sẽn pa ta semen a yiib a Zeezi loogrã poore, a karen-biisã tigma taaba. Baraarã, b maana vaeesg Gʋlsg-sõamyã pʋgẽ, b pʋʋsa Wẽnnaam n kos a sõngre, la b yãk a Matɩyaas n ledg a Zida, tɩ tʋm-tʋmdbã sõor le ta 12. (Tʋʋ. 1:15-26) Bõe yĩng t’a Zida ledgrã ra yaa tɩlɛ? Karen-biisã bãngame tɩ segdame tɩ tʋm-tʋmdbã sõor zãng yɩ 12.a A Zeezi sẽn da yãk tʋm-tʋmdbã, pa a sẽn dat tɩ b yãagd-a bal ye. A gesame tɩ b paam zãmsg sõma, sẽn na yɩl tɩ b wa tʋm tʋʋmd sẽn tar yõod wʋsgo, Wẽnnaam nin-buiidã neer yĩnga. Tʋʋm-bʋg la rẽ? Wãn to la a Zeova ne a Zeezi sõng-b tɩ b na n wa tõog tʋʋmdã? Rũndã-rũndã, ãnd dãmb n tʋmd tʋʋm-kãng buudu? Bõe la tõnd tõe n maane, n wilg tɩ d tẽegda d “taoor dãmba” yelle, sẽn yɩɩd fãa, tʋm-tʋmd sẽn tũud sɩd la sẽn tar yamã?—Ebre. 13:7; Mat. 24:45.

A ZEEZI N YAA TAOOR LƲƖTBÃ SULL TAOOR SOABA

4. Tʋm-tʋmdbã la Zerizalɛm kãsem-dãmb kẽer tʋʋmd ra yaa bõe?

⁴ Yʋʋmd 33 Pãntekotã tɛka, ra lebga tʋm-tʋmdbã n yaa kiris-neb tigingã taoor lʋɩtba. Biiblã yeelame tɩ Pãntekotã raare, “a Pɩyɛɛr yika yĩngr ne neb piig la a yembrã,” n zẽk a koɛɛg n togs kʋʋngã goam sẽn fãagd yõyã. Ra yaa zʋɩf-rãmb la neb sẽn tuub n sak zʋɩf-rãmbã tũudmã. (Tʋʋ. 2:14, 15) B wʋsg sak n lebga kiris-neb baraare. Rẽ tɛka, b ra “sakda tẽn-tʋmdbã zãmsg neere.” (Tʋʋ. 2:42) Tʋm-tʋmdbã n da get tigingã ligd yelle. (Tʋʋ. 4:34, 35) Leb n yaa bãmb n da zãmsd Wẽnnaam nin-buiidã a raabã. B pʋd n yeelame: “Tõnd na n kell n kẽnga taoor ne pʋʋsgo, la Wẽnnaam koɛɛgã moonego.” (Tʋʋ. 6:4) B tʋma kiris-neb sẽn tar minim sõma tɩ b tɩ moon koɛɛgã zĩis nebã sẽn da nan pa wʋm koe-noogã. (Tʋʋ. 8:14, 15) Tʋm-tʋmdbã wa n yãka kãsem-dãmb kẽer sẽn paam vʋʋsem sõngã zaeebo, tɩ b naag-b n get tigimsã yelle. Bãmb n da naag taab n yaa pipi kiris-nebã taoor lʋɩtb sulli, n wilgd tigimsã b sẽn segd n maanega.—Tʋʋ. 15:2.

5, 6. a) Bõe n wilgd tɩ taoor lʋɩtbã sull paama vʋʋsem sõngã sõngr b tʋʋmdã pʋgẽ? (Ges-y sõsgã sɩngrẽ fotã.) b) Bõe n wilgd tɩ taoor lʋɩtbã sull paama malɛgsã sõngre? d) Bõe n wilgd tɩ Wẽnnaam Gomdã sagls sõnga taoor lʋɩtbã sull b tʋʋmdã pʋgẽ?

⁵ Pipi kiris-nebã ra kɩsa sɩd tɩ yaa a Zeova n wilgd b taoor lʋɩtbã sull sore, ne a Zeezi sẽn yaa sul-kãng taoor soabã maasem. Tɩ bõe? Pipi, taoor lʋɩtbã sull ra paamda Wẽnnaam vʋʋsem sõngã sõngre. (Zã 16:13) Yaa sɩd tɩ wakat kãng tɩ kiris-nebã fãa ra paama vʋʋsem sõngã zaeebo, la tʋm-tʋmdbã ne kãsem-dãmbã sẽn da be Zerizalɛm n get tigimsã yellã ra paamda vʋʋsem sõngã sõngr b tʋʋmdã pʋgẽ me. Makre, yʋʋmd 49 soabã, taoor lʋɩtbã rɩka no-sɩɩr bãongã kõom wɛɛngẽ. Tigimsã tũu no-sɩɩrã, tɩ kɩt tɩ kiris-nebã ‘tẽeb pãng ra paasdẽ,’ tɩ b ‘sõorã ra paasd daar woo daare.’ (Tʋʋ. 16:4, 5) D sã n karem taoor lʋɩtbã sẽn yeel tigimsã bũmb ning bãongã wɛɛngẽ wã, d nee vẽeneg tɩ Wẽnnaam vʋʋsem sõngã ra sõngd-b lame, la tɩ b ra nonga b taabã, tɩ b tẽebã me ra tar pãnga.—Tʋʋ. 15:11, 25-29; Gal. 5:22, 23.

⁶ Yiib-n-soaba, taoor lʋɩtbã sull ra paamda malɛgsã sõngre. Makre, malɛk n yeel a Korney t’a tʋm tɩ b tɩ bool tʋm-tʋmd a Pɩyɛɛr t’a wa sõng-ba. A Pɩyɛɛr sẽn taas a Korney ne a nebã koɛɛgã bala, vʋʋsem sõngã siga b zutu, baa b sẽn yaa bu-zẽms neb n pa kẽ bãongã. A Korney n yɩ pipi bu-zẽng ned sẽn lebg kiris-ned n yaool n pa kẽ bãongo. Tʋm-tʋmdbã ne kiris-neb a taabã sẽn wʋmã, b bãngame tɩ yaa Wẽnnaam daabo, n sake. Rẽ tɛka, bu-zẽng ned sã n dat n lebg kiris-neda, b reegd-a lame. (Tʋʋ. 11:13-18) Sẽn paase, malɛgsã sõngame tɩ koɛɛgã mooneg kẽng taoor la a paam pãnga, tɩ yaa wa b sẽn sõng taoor lʋɩtbã sẽn da get tʋʋmdã yellã. (Tʋʋ. 5:19, 20) Tãab-n-soaba, taoor lʋɩtbã ra tũuda Wẽnnaam Gomdã saglse, tɩ sõng-ba. B sã n da wa segd n dɩk no-sɩɩr kiris-nebã tẽeb kengr yĩng wall b wilg-b sore, b baooda sagls a pʋgẽ.—Tʋʋ. 1:20-22; 15:15-20.

7. Bõe n wilgd t’a Zeezi n da yaa pipi kiris-nebã taoor soaba?

⁷ Pipi kiris-nebã wakatẽ, baa sẽn da yaa taoor lʋɩtbã sull n get tigimsã yellã, sul-kãng nebã ra mii vẽeneg tɩ yaa a Zeezi Kirist la b taoor soaba. Bõe n wilgdi? Tʋm-tʋmd a Poll yeelame tɩ yaa Kiristã n kɩt tɩ “neb kẽer yɩ tẽn-tʋmdba,” la tɩ Kiristã n yaa tigingã “naaba,” rat n yeel t’a Zu-soaba. (Efɛ. 4:11, 15) Sẽn paase, karen-biisã pa pʋd b mens yʋʋr sẽn wilgd tɩ b yaa tʋm-tʋmdbã nin-yend poorẽ dãmb ye. B ra boonda b fãa tɩ “kiris-neba.” (Tʋʋ. 11:26) Yaa sɩd t’a Poll da miime tɩ segdame tɩ b sak taoor lʋɩtbã, rat n yeel tɩ tʋm-tʋmdbã la kãsem-dãmbã goam sẽn tik Gʋlsg Sõamyã. La ad a sẽn yeele: “Mam yaool n datame tɩ yãmb bãng tɩ Kiris yaa rao fãa Zu-soaba.” Woto wilgdame tɩ Kiristã yaa taoor lʋɩtbã ned kam fãa me Zu-soaba. Rẽ poore, a paasame tɩ “Wẽnnaam yaa Kiris Zu-soaba.” (1 Kor. 11:2, 3) A sẽn yeelã wilgda vẽeneg tɩ yaa Wẽnnaam n yãk a Bi-ribl a Kirist Zeezi t’a yaa tigingã taoor soaba.

“PA NINSAAL TƲƲMD YE, YAA WẼNNAAM TƲƲMDE”

8, 9. Tʋʋm-bʋg sẽn tar yõod wʋsg la saam-biig a Russell tʋm-yã?

⁸ Yʋʋmd 1870 tɛkã, a Charles Russell ne a tũud-n-taasã kẽer modga wʋsgo, n na n lebs n lugl Kiris-tũudum hakɩɩkã. B sẽn da rat n sõng nebã tɩ b bãng Biiblã buud-goam toor-toor pʋgẽ wã, b paka tʋʋmd noor sẽn boond Zion’s Watch Tower Tract Society yʋʋmd 1884 soabã, tɩ saam-biig a Russell ra yaa taoor soaba.b Yɩɩ ned sẽn da maagd a yĩng n zãmsd Biiblã. A talla raoodo, n wilg nebã tɩ egiliizã rãmb sẽn yet tɩ Wẽnnaam yaa mens a tãabo, la tɩ ninsaal tara sɩɩg sẽn pa kiidã pa yit Biiblã pʋgẽ ye. Biiblã zãmsgã sõng-a lame t’a bãng tɩ Kiristã sẽn yeel t’a na n lebg n waame wã, a sã n wa, ned pa na n yã-a ne nif ye. A bãngame me tɩ ‘bu-zẽmsã wakatã’ na n teka yʋʋmd 1914 soabã. (Luk 21:24) A Russell sak n dɩka a sẽka, a keelem la a ligdi, n sõng nebã tɩ b wʋm bũmb nins a sẽn bãng Biiblã pʋgẽ wã. Yaa vẽeneg t’a Zeova ne a Zeezi tũnuga ne a Russell n ges tigingã yell wakat kãnga.

⁹ A Russell ra pa baood pẽgr ye. Yʋʋmd 1896 soabã, a yeelame: “Tõnd pa baood tɩ nebã pẽg-do, wall b waoog-do, pa rẽ bɩ b pẽg d sɛbã ye. Tõnd ned baa a ye pa baood me tɩ b bool-a tɩ Reveerã bɩ karen-saamb ye. D pa rat me tɩ neb lugl sulli, n bool b mens tɩ tõnd poorẽ dãmb ye.” A Russell wa n pʋd n yeelame tɩ tʋʋmdã pa ninsaal tʋʋmde, la tɩ yaa Wẽnnaam tʋʋmde.

10. a) Yaa wakat bʋg la a Zeezi yãk “tʋm-tʋmd sẽn tũud sɩd la sẽn tar yamã”? b) Bõe la b maan n sõng nebã tɩ b bãng tɩ Siglgã taoor lʋɩtb sullã yaa toor ne Watch Tower Society wã?

¹⁰ A Russell maana kaalem yʋʋmd 1916 soabã. Yʋʋm a tãab poore, rat n yeel tɩ yʋʋmd 1919 wã, a Zeezi yãka “tʋm-tʋmd sẽn tũud sɩd la sẽn tar yamã.” Tʋʋm-bʋg la a ra rat t’a tʋme? A ratame t’a ‘moenegd a zakã wa sẽn zemse.’ (Mat. 24:45, Wẽnnaam Sebre, 1983) Wakat kãnga, saam-biis sõor bilf sẽn paam vʋʋsem sõngã zaeeb n da be Burkilin, n yiisd sɛba, n sõngd a Zeezi tẽedbã tɩ b bãngd Wẽnnaam la a raabã. Yaa yʋʋmd 1940 soabã poor la b sɩng “siglgã taoor lʋɩtb sull” yell goam tõnd sɛbã pʋgẽ, tɩ saam-biisã ra tẽed tɩ yaa bãmb la Watch Tower Bible and Tract Society taoor dãmbã. La yʋʋmd 1971 wã, b wilgame tɩ Watch Tower Society wã yaa tʋʋm noor bal b sẽn lugl tɩ zems ne laloa wã, la tɩ Siglgã taoor lʋɩtb sullã yaa toore. Yʋʋm-kãng tɛka, b mi n wa yãka saam-biig sẽn paam vʋʋsem sõngã zaeeb t’a lebg Siglgã taoor lʋɩtb sull neda, t’a yaool n zɩ n yɩ Watch Tower Society wã yel-gɛt ye. Sẽn zems yʋʋm a wãn woto, b yãka yel-gɛtb neb nins a Zeezi sẽn boond t’a ‘piis a taabã’ sʋk meng tɩ b ges Watch Tower Society wã la siglgã sul a taab yelle. Rẽ kɩtame tɩ Siglgã taoor lʋɩtb sullã paam weer n sõng Wẽnnaam nin-buiidã tɩ b tũ Biiblã noyã la a saglsã sõma. (Zã 10:16; Tʋʋ. 6:4) Yʋʋmd 2013 sẽoog kiuug rasem 15 Gũusg Gasgã pʋgẽ, b wilgame tɩ “tʋm-tʋmd sẽn tũud sɩd la sẽn tar yamã” yaa sul-bil sẽn yaa kiris-neb sẽn paam vʋʋsem sõngã zaeebo, la tɩ yaa bãmb me la Siglgã taoor lʋɩtb sullã.

11. Bõe la Siglgã taoor lʋɩtb sullã maanda, n tõogd n yãkd b sẽn na n maanega?

¹¹ Yaa Siglgã taoor lʋɩtb sull n yãkd b sẽn na n maaneg bũmb fãa pʋgẽ. B tigimda taab semen fãa. Woto kɩtame tɩ b ned kam fãa paamd n togsd a tagsgo, tɩ b maand bũmba fãa noor a yembre. (Yel. 20:18) B ned baa a ye sẽn pa get t’a yɩɩda a taabã, yʋʋmd fãa, b toeemda b tigissã taoor lʋɩta. (1 Pɩy. 5:1) Siglgã taoor lʋɩtb sullã lugla sul a yoobe. Sul-kãens taoor lʋɩtbã me toeemda yʋʋmd fãa. Sullã ned baa a ye pa get tɩ yẽ la b fãa naab ye. A geta a meng wa Kiristã zakã neda, tʋm-tʋmd sẽn tũud sɩdã sẽn dɩlgd la a wilgd-a sore.

“ÃNDA N YAA TƲM-TƲMD SẼN TŨUD SƖD LA SẼN TAR YAMÔ?

12. Wẽnnaam sẽn pa gomd ne Siglgã taoor lʋɩtb ne a vʋʋsem sõngã maasem, tɩ b leb n pa neb sẽn pa kongdã, wata ne sogs-bʋse?

¹² Wẽnnaam pa gomd ne Siglgã taoor lʋɩtb sull ne a vʋʋsem sõngã maasem ye. B leb n pa neb sẽn pa kongd ye. Woto yĩnga, b mi n wɛgsa Biiblã goam kẽer n tudgi, pa rẽ bɩ b mi n dɩk no-sɩɩr tʋʋm a taab wɛɛngẽ tɩ pa yãk neng ye. Sɩd me, d sã n ges Publications de la Société Watch Tower ẽndɛgsã, zĩig ning b sẽn gʋls tɩ “ Compréhensions affinées ” wã, b wilga Biiblã goam kẽer võor b sẽn demse, yʋʋmd 1870 wã tɛk n tar n watẽ. A Zeezi pa yeel tõnd tɩ “tʋm-tʋmd sẽn tũud sɩdã” yẽ sẽn da na n yãk t’a sõng a nebã tɩ b bãng Wẽnnaam la a raabã pa na n tol n tudg ye. Rẽ wã, a Zeezi sẽn sok tɩ “ãnda n yaa tʋm-tʋmd sẽn tũud sɩd la sẽn tar yamã,” leoorã yaa bõe? (Mat. 24:45, Wẽnnaam Sebre, 1983) Bõe n wilgd tɩ yaa Siglgã taoor lʋɩtb sull n sɩd yaa tʋm-tʋmd sẽn tũud sɩd la sẽn tar yamã? Bɩ d lebs n gom bũmb a tãabã sẽn sõng pipi kiris-nebã taoor lʋɩtbã yelle.

13. Bõe n wilgd tɩ Wẽnnaam sõngda Siglgã taoor lʋɩtb sull ne a vʋʋsem sõngã maasem?

¹³ B paamda vʋʋsem sõngã sõngre. Wẽnnaam sõnga Siglgã taoor lʋɩtb sull ne a vʋʋsem sõngã maasem tɩ b wʋm Biiblã goam kẽer võor b sẽn da pa wʋmde. Tags-y n ges-y zãmsg nins fãa b sẽn demsã. Hakɩɩka, ned pa tõe n teeg a yam la a bãngre, n tõog n wʋm la a bilg yel-zulums nins sẽn be Wẽnnaam Gomdã pʋgẽ wã ye! (Karm-y 1 Korẽnt-rãmb 2:10.) Siglgã taoor lʋɩtb sull me yeta wa a Poll yaa: “Tõnd sẽn gomd bõn-kãens yellã, ka ne goam sẽn yit ninsaal yam pʋgẽ ye, la yaa ne goam Wẽnnaam Sɩɩgã sẽn kõta.” (1 Kor. 2:13) Sɩdã kɩɩsg kaoosa yʋʋm kobse, tɩ nebã ra pa wʋmd Biiblã goam võor ye. La maana wãn tɩ yʋʋmd 1919 tɛkã, Biiblã goam võor lebgd vẽeneg n paasdẽ? Hakɩɩka, yaa Wẽnnaam n sõngd Siglgã taoor lʋɩtb sull ne a vʋʋsem sõngã maasem.

14. Wa Vẽnegr 14:6, 7 sẽn yeelã, bõe n wilgd tɩ malɛgsã sõngda kiris-nebã?

¹⁴ B paamda malɛgsã sõngre. Rũndã-rũndã, yaa sẽn yɩɩd koe-moondb milyõ a nii n moond koɛɛgã dũniyã gill zugu, tɩ Siglgã taoor lʋɩtb sull get tʋʋm-kãng sẽn labsã yelle. Bõe yĩng tɩ koe-moonegã paamd pãnga? Bũmb a ye yaa tɩ malɛgsã sõngd n tʋmdame. (Karm-y Vẽnegr 14:6, 7.) Sɩd me, koe-moondb mi n taa zak noor tɩ b kɛlgdã yeel tɩ yẽ ra bee pʋgẽ n pʋʋsd Wẽnnaam, n kotẽ t’a sõng-a t’a bãng a raabã.c Baa zĩis nins b sẽn gɩdg koe-moonegã, tʋʋmdã ket n paamda pãnga, tɩ d maand karen-biis me. Woto fãa wilgda vẽeneg tɩ d paamda malɛgsã sõngre.

15. Bõe n wilgd tɩ Siglgã taoor lʋɩtb sull yaa toor ne Kiris-tũudum a taabã taoor lʋɩtba? Rɩk-y makre?

¹⁵ B tũudã Wẽnnaam Gomdã saglse. (Karm-y Zã 17:17.) Yʋʋmd 1973 sigr kiuug pipi daar Gũusg Gasgã pʋgẽ, b sokame tɩ “rẽ yĩnga, ned sẽn ket n dɩt taba, wall a yũud sɩgaar tõe n deega lisg bɩ?” Ad b sẽn leoke: “Sẽn zems ne Biiblã, a pa tõe ye.” Rẽ poore, b sõdga vɛrse-rãmb wʋsgo, la b wilg b sẽn segd n yiis kiris-ned tigingã pʋgẽ, a sã n yũud sɩgaar n pa rat n basã võore. (1 Kor. 5:7; 2 Kor. 7:1) Gũusg Gasgã paasame: “Tõnd sẽn wilg bũmb ningã pa ninsaalb tagsgo, wa d rat n modga ned t’a maan tõnd raab ye. Yaa Wẽnnaam meng n wilg a Gomdã pʋgẽ tɩ yaa tɩlɛ.” Rẽ yĩnga tũudum a taabã, sakd n tũuda Biiblã kɛpɩ, baa sã n na n yɩɩ toog ne kẽer bɩ? Sebr b sẽn yiis Etazĩni sẽn pa kaoose, tɩ gomd tũudmã yell yeelame: “Naoor wʋsgo, tũudum nins sẽn yet tɩ b yaa Kiris-tũudmã taoor dãmb remsa b sẽn zãmsd nebã bũmb ninsã, sẽn na yɩl tɩ zems ne b tũudmã neb tagsgo, la zãma wã sẽn datã.” La Siglgã taoor lʋɩtb sullã pa tũud zamã wã raab ye. B tũuda Biiblã, tɩ wilgdẽ tɩ yaa a Zeova n wilgd a nin-buiidã sor dũndã-rũndã.

“TẼEG-Y YÃMB TAOOR DÃMBÔ YELLE

16. Bõe la d tõe n maan n wilg tɩ d tẽegda Siglgã taoor lʋɩtb sull yelle?

¹⁶ Karm-y Ebre-rãmb 13:7. Biiblã yeelame tɩ d tẽeg tõnd taoor dãmbã yelle. D sã n pʋʋsd Siglgã taoor lʋɩtb sull yĩnga, d wilgame tɩ d tẽegda b yelle. (Efɛ. 6:18) B tʋʋmã yaa wʋsgo. Makre, bãmb n get tɩ kiris-nebã paamd bũmb nins fãa sẽn yaa tɩlɛ ne-ba, b tẽebã kengr yĩngã. B geta koe-moonegã yell dũniyã gill zug me, la b get kũun toɛy-toɛyã b sẽn kõt tʋʋmdã teelg yĩngã. Rẽnd vẽenega, b ratame tɩ d pʋʋsd b yĩnga.

17, 18. a) Bõe la d tõe n maan n wilg tɩ d tẽegda Siglgã taoor lʋɩtb sull yelle? b) Bõe yĩng tɩ d tõe n yeel tɩ d sã n moond koɛɛgã, d sõngda Siglgã taoor lʋɩtb sulli?

¹⁷ D sã n sakd Siglgã taoor lʋɩtb sull noyã la b saglsã me, d wilgdame tɩ d tẽegda b yelle. B kõta tõnd sagls ne d sɛbã, tigissã la tigis-kãsemsã maasem. B yãkda tigims sul yel-gɛtba, tɩ tigims sul yel-gɛtbã me yãkd kãsem-dãmb tɩ b get tigimsã yelle. Tigims sul yel-gɛtbã la kãsem-dãmbã sã n tũud noy la sagls nins Siglgã taoor lʋɩtb sull sẽn kõt-bã, b wilgdame tɩ b tẽegda b yelle. Tõnd me sã n sakd d taoor lʋɩtbã, d wilgdame tɩ d waoogda tigingã taoor soab sẽn yaa a Zeezi wã.—Ebre. 13:17.

¹⁸ D sã n wɩng ne koɛɛgã mooneg me, d wilgdame tɩ d tẽegda Siglgã taoor lʋɩtb sull yelle. A Poll pʋd n sagla kiris-nebã tɩ b rɩk b taoor dãmbã togs-n-taare, n tall b tẽebã buudu. Tʋm-tʋmd sẽn tũud sɩdã moonda koe-noogã ne yẽesem, la a tʋmd ne a sũur fãa, koe-moonegã na kẽng taoor yĩnga. Baa y sã n pa kiris-ned sẽn paam vʋʋsem sõngã zaeebo, y sõngd-a lame n tʋmd tʋʋm-kãngã sẽn fãagd yõyã bɩ? Y sã n sõngd-a, y sũur na n wa yɩɩ noogo. Bala, a Zeezi na n wa yeel-y lame yaa: “Yãmb sẽn maan bõn-kãens kom-kãensã sẽn yaa bõoneg n yɩɩda, la b ya mam ba-biisã, yaa maam la yãmb maan-yã.”—Mat. 25:34-40.

19. Bõe yĩng tɩ y rat n kell n tũ tõnd taoor soab a Zeezi?

¹⁹ A Zeezi sẽn leb saasẽ wã, a pa bas a karen-biisã teelg ye. (Mat. 28:20) A miime t’a sẽn wa n be tẽngã zugã, yɩɩ vʋʋsem sõngã, malɛgsã la Wẽnnaam Gomdã n sõng-a t’a tõog n yɩ b taoor soaba. Rũndã-rũndã, a tũnugda ne bõn-kãens n sõngd tʋm-tʋmd sẽn tũud sɩd la sẽn tar yamã me. Siglgã taoor lʋɩtb sull “pʋgda pe-bilã n dabd zĩig ning fãa b sẽn dabdã.” (Vẽn. 14:4) Woto yĩnga, d sã n sakd b noyã la b saglsã, yaa d taoor soab a Zeezi la d tũuda. Ka la bilfu, a na n ‘tall-d lame n kẽng vɩɩm ko-bunds zĩisẽ,’ tɩ d paam n vɩɩmd wakat sẽn kõn sa. (Vẽn. 7:14-17) Taoor soab baa a ye sẽn yaa ninsaal pa tõe n kɩt tɩ d paam n vɩɩmd wakat sẽn kõn sa ye!