A Zeezi maoongã yaa kũun sẽn yit Ba wã nengẽ

1. Kiristã sẽn ki n dol yel-wẽnã nafa kẽer la bʋse?

YƲƲMD fãa, d sã n wa maand Kiristã kũumã tẽegre, tẽegda tõnd t’a sẽn sak n ki tɩ rol yel-wẽnã, ãdem-biisã tõe n paam n lebga Wẽnnaam kamba. Kɩtame me tɩ d na n wa paam n vɩɩmd ne sũ-noog wakat sẽn kõn sa. La bũmb a taab yõod sẽn yɩɩd rẽ la a Zeova maan-yã, a Zeezi maoongã maasem yĩnga. A tõog n welga no-koeemd ning a Sʋɩtãan sẽn wa ne Edɛnnã.—Ebre. 1:9.

2. a) Pʋʋsg ning a Zeezi sẽn wilg a karen-biisã pʋgẽ, a yeelame tɩ bõe la b tõe n kose, tɩ tar yõod wʋsgo? (Ges-y fotã sẽn be yĩngrã.) b) Bõe yell la d na n gom sõs-kãngã pʋgẽ?

² A Zeezi kũumã ket tɩ yʋʋm a yiib woto, a wilga a karen-biisã tɩ b sã n na n pʋʋse, b tõe n yeelame: ‘Tõnd ba sẽn be arzãna, bɩ yãmb yʋʋrã paam waoogre, tɩ yãmb soolmã wa, tɩ yãmb daab maan tẽng zug wa sẽn maand arzãnã.’ (Mat. 6:9, 10) La wãn to la a Zeezi sẽn ki tɩ yɩ maoongã sõng tɩ Wẽnnaam yʋʋrã paam waoogre, tɩ Wẽnnaam Rĩungã lugli, la sõng t’a raabã na n pidsi? Rẽ yell la d na n gom sõs-kãngã pʋgẽ. Woto na n kɩtame tɩ d maneg n wilg tɩ d sũur nooma wʋsg ne a Zeezi maoongã.

“BƖ YÃMB YƲƲRÃ PAAM WAOOGRE”

3. A Zeezi sẽn kos tɩ Wẽnnaam yʋʋrã paam waoogrã, rat n yeelame tɩ bõe? Bõe la a Sʋɩtãan maan n sãam a Zeova yʋʋrã?

³ Wẽnnaam yʋʋrã na paam waoogrã yell la a Zeezi lʋɩɩs taoor a pʋʋsgã pʋgẽ. A Zeezi sẽn kos tɩ Wẽnnaam yʋʋrã paam waoogrã, rat n yeelame t’a mengã paam waoogre, tɩ nebã fãa sak n deeg tɩ ãndũniyã fãa pʋgẽ, a tõogã la a tɩrlmã ka to ye. A Zeezi pʋʋsg a to pʋgẽ, a boola Wẽnnaam t’a “ba sẽn ya sõmblem soaba.” (Zã 17:11) A Zeova sẽn yaa sõngã, a noyã la a saglsã fãa yaa sõma zãnga. Baa ne rẽ, Edɛn zẽedã zĩigẽ wã, a Sʋɩtãan goma sɩlem goama, n yeel tɩ pa zems tɩ Wẽnnaam lugl noy ãdem-biisã yĩng ye. A yaga ziri, n sãam a Zeova yʋʋrã.—Sɩng. 3:1-5.

4. Bõe la a Zeezi maan a Zeova yʋʋrã waoogr yĩnga?

⁴ A Zeezi yẽ ra nonga a Zeova yʋʋrã ne a sũur fãa. (Zã 17:25, 26) A ra maanda bũmb fãa a Zeova yʋʋrã waoogr yĩnga. (Karm-y Yɩɩn-sõamyã 40:9-11.) A tʋm-tʋmdɩ wã la a sẽn zãms nebã bũmb ninsã ra wilgda vẽeneg t’a Zeova noyã yaa tɩrse, la tɩ yaa tõnd neer yĩnga. Baa ne a Sʋɩtãan sẽn kɩt tɩ b nams a Zeezi nams-toaaga, la b kʋ-a wã, a Zeezi pa tol n kɩɩs a Zeova ye. Woto wilgame tɩ ned sẽn zẽms zãng tõe n saka a Zeova wakat fãa.

5. Bõe la tõnd tõe n maan n waoog a Zeova yʋʋrã?

⁵ Bõe la tõnd tõe n maan n wilg tɩ d nonga a Zeova yʋʋrã? Tõnd tʋm-tʋmdɩ wã tõe n wilga rẽ. A Zeova ratame tɩ d modg n yɩ pʋ-peelem dãmba, n zãag d mens ne wẽnga. (Karm-y 1 Pɩyɛɛr 1:15, 16.) Woto rat n yeelame tɩ d tũ a Zeova a ye tãa, n sakd a noyã ne d sũur fãa. Baa nebã sã n wa namsd tõndo, d maanda d sẽn tõe fãa n ket n tũud a Zeova noyã la a saglsã. D sã n tũud a Zeova noyã, a yʋʋrã paamda waoogre. (Mat. 5:14-16) Wilgdame me tɩ d sakame t’a noyã yaa sõma, la t’a Sʋɩtãan yaa ziri yagda. La ned buud fãa mi n tudgame. Y sã n wa tudg bɩ y tek yam n kos sugri, la y ra le maan bũmb ning y sẽn maan tɩ paoog a Zeova wã ye.—Yɩɩn. 79:9.

6. Baa d sẽn yaa koangdbã, bõe yĩng t’a Zeova geelgd tõnd wa nin-tɩrse?

⁶ D yaa kiris-ned sẽn paam vʋʋsem sõngã zaeeb n na n wa tɩ vɩɩmd saasẽ tɩ d naaga neb nins sẽn na n wa vɩɩmd wakat sẽn kõn sa tẽngã zugã me, yaa d sã n tẽed a Zeezi maoongã la a Zeova sakd n kõt-d d yel-wẽnã sugri. Ned sã n dɩk a meng n kõ a Zeova, a getame t’a soab lebga ned yẽ sẽn so, ned sẽn naag a nin-buiidã. A geelgda kiris-nebã fãa wa nin-tɩrse, n boond sẽn paam-b vʋʋsem sõngã zaeebã t’a kamba, la a geelgd a Zeezi sẽn boond b rãmb t’a ‘piis a taabã’ wa a zo-rãmba. (Zã 10:16; Rom. 5:1, 2; Zak 2:21-25) Dẽnd baa masã menga, ne a Zeezi maoongã maasem, yell ning sẽn da be tõnd ne d Ba a Wẽnnaam sʋkã saame, tɩ d tar d sẽn tõe n maan t’a yʋʋrã paam waoogre.

“TƖ YÃMB SOOLMÃ WA”

7. A Zeezi maoongã maasem yĩnga, bõe la Wẽnnaam Rĩungã na n wa maane?

⁷ A Zeezi sẽn kos tɩ Wẽnnaam yʋʋrã paam waoogrã poore, a kosame t’a “soolmã” bɩ a Rĩungã wa. Bõe yĩng tɩ d tõe n yeel t’a Zeezi maoongã sõngame tɩ Wẽnnaam Rĩungã tõog n lugli? Yaa a Zeezi maoongã maasem yĩng la Wẽnnaam sẽn yãk neb tus koabg la pis-naas la a naasã tɩ b na n kẽng saasẽ, n tɩ naag a Zeezi n yɩ rĩm-dãmb la maan-kʋʋdbã. (Vẽn. 5:9, 10; 14:1) A Zeezi ne a na-rɩt-n-taasã na n dɩɩ naam yʋʋm tusri, n ges tɩ ãdem-biisã paam n dɩ a Zeezi maoongã nafa zãnga. Wakat kãnga, tẽngã na n lebga arzãna, tɩ ãdem-biisã me lebg neb sẽn zems zãnga. Saasẽ la tẽngã zug rãmbã na n naaga taab noor a ye n maand Wẽnnaam daabã, tɩ b fãa yaa wa zak a ye neba. (Vẽn. 5:13; 20:6) Rẽ masã la a Zeezi na n sãam a Sʋɩtãan fasɩ, la a kɩt tɩ zu-loees nins fãa a sẽn wa ne wã sa.—Sɩng. 3:15.

8. a) Bõe la a Zeezi maan n na n sõng a karen-biisã tɩ b bãng tɩ Wẽnnaam Rĩungã luglg yaa bõn-kãsenga? b) Bõe la d tõe n maan n wilg tɩ d teenda Rĩungã?

⁸ A Zeezi sẽn wa n be tẽngã zugã, a sõnga a karen-biisã tɩ b bãng tɩ Wẽnnaam Rĩungã luglg yaa bõn-kãsenga. A lisgã poor bala, a sɩngame n moond “Wẽnnaam soolem koe-noogã” zĩig fãa. (Luk 4:43) A sẽn wa n na n leb saasẽ wã, a yeela a karen-biisã tɩ b kẽng n moon koɛɛgã n yɩ yẽ kaset dãmb hal “dũniyã tɛk fãa.” (Tʋʋ. 1:6-8) Rĩungã koɛɛgã b sẽn moond rũndã-rũndã wã kɩtame tɩ neb buud fãa tõe n paam n bãng t’a Zeezi kiime n na n dol yel-wẽnã, la b yãk yam n lebg Wẽnnaam Rĩungã poorẽ dãmba. Tõnd sã n sõngd sẽn paam-b vʋʋsem sõng zaeebã n moond Wẽnnaam Rĩungã koe-noogã dũniyã gill zugu, d teenda Rĩungã.—Mat. 24:14; 25:40.

‘TƖ YÃMB DAAB MAANE’

9. Bõe n kɩt tɩ d kɩs sɩd t’a Zeova sẽn da rat tɩ ãdem-biisã vɩɩm yɩ to-to wã na n pidsame?

⁹ A Zeezi sẽn kos a pʋʋsgã pʋgẽ tɩ Wẽnnaam daabã maan tẽngã zugã võor yaa bõe? A Zeova la bũmb fãa Naanda. A sã n yeel t’a na n maana bũmbu, pa tõe n pa pids ye. (Eza. 55:11) Dẽnd a Sʋɩtãan sẽn wa ne no-koeemd ningã pa tõe t’a Zeova raabã pa pids ye. Hal sɩngrẽ wã, a Zeova ra ratame t’a Ãdem ne a Awa rog kamba, tɩ tẽngã pid ne b kamb la b yagens sẽn zems zãnga. (Sɩng. 1:28) A Ãdem ne a Awa sã n da ki n pa paam kamba, a Zeova raabã ra pa na n pids ye. Rẽ n so t’a Zeova bas tɩ b rog kamba, baa b sẽn kɩɩs-a wã. Ne a Zeezi maoongã maasem, neb nins fãa sẽn na n wilg tɩ b tẽeda a Zeezi wã tõe n wa paam n lebga neb sẽn zems zãnga, la b vɩɩmd wakat sẽn kõn sa tẽngã zugu. Hakɩɩka, a Zeova nonga ãdem-biisã, n dat tɩ b paam vɩɩm sẽn tar barka, wa a sẽn da rat hal sɩngrẽ wã.

10. Wãn to la a Zeezi maoongã na n naf sẽn ki-bã?

¹⁰ La neb milyaar-dãmbã yẽ sẽn ki n pa paam n bãng a Zeova wã? A Zeezi sẽn ki n dol yel-wẽnã kɩtame tɩ sẽn ki-bã na n wa vʋʋge. A Zeova sẽn dat tɩ nebã vɩ n pa kiidẽ wã, a na n vʋʋga sẽn ki-bã. Rẽ, b na n paam n bãnga a Zeova, tɩ b sã n sak-a bɩ b na n vɩɩmd wakat sẽn kõn sa. (Tʋʋ. 24:15) Sẽn yaa yẽ n na n kɩt tɩ sẽn ki-bã vʋʋgã, yẽ n na n lebg b ba. (Yɩɩn. 36:10) Dẽnd a Zeezi sẽn bool a Zeova a pʋʋsgã pʋgẽ tɩ “tõnd ba” wã, a bee bʋʋm. (Mat. 6:9) Sẽn ki-bã vʋʋgrã yaa tʋʋm-kãseng a Zeova sẽn kõ a Zeezi. (Zã 6:40, 44) Sɩd me, a Zeezi ra yeelame tɩ yẽ “la vʋʋgre, la vɩɩm.”—Zã 11:25.

11. Bõe la a Zeova rata?

¹¹ A Zeova ratame tɩ nebã buud fãa wa lebg yẽ neba. A pa tũus neb a wãn bal ye. A Zeezi ra yeelame: ‘Ned ning fãa sẽn maand-a Wẽnnaam daabo, ada soab n yaa mam ma-bi-raoogo, la m ma-bi-poaka, la m ma.’ (Mark 3:35) Wẽnnaam datame tɩ “neb kʋʋng” sẽn ka tõe n sõde, sẽn yi soolem fãa pʋsẽ, buud toɛy-toɛyã fãa pʋsẽ, la sẽn gomd goam buud toɛy-toɛy lebg a nin-buiidu. B tẽeda a Zeezi maoongã la b rat ne b sũy faa n sak Wẽnnaam. Nin-kãensã pẽgda Wẽnnaam n yetẽ: “Fãagrã bee ne tõnd Wẽnnaam sẽn zao geerã zugã, la ne pe-bilã.”—Vẽn. 7:9, 10.

12. Bõe yĩng tɩ d yetẽ t’a Zeezi sẽn yeel a pʋʋsgã pʋgẽ wã sõngda tõnd tɩ d bãng a Zeova raabã sẽn yaa a soab ne ãdem-biisã?

¹² A Zeezi sẽn yeel bũmb ning a pʋʋsgã pʋgẽ wã sõngda tõnd tɩ d bãng a Zeova raabã sẽn yaa a soab ne ãdem-biisã. D bãngame tɩ d segd n maana d sẽn tõe fãa t’a yʋʋrã paam waoogre. (Eza. 8:13) A Zeezi yʋʋrã võor meng yaa: “A Zeova yaa Fãagda.” A sẽn ki n dol yel-wẽnã tɩ tõnd na n tõog n paam fãagrã waoogda a Zeova yʋʋrã. Ne Rĩungã maasem, Wẽnnaam na n kɩtame tɩ sẽn sakd-b yẽ wã fãa paam n dɩ a Zeezi maoongã yõodo. A Zeezi pʋʋsgã leb n sõngda tõnd tɩ d kɩs sɩd tɩ bũmb kae sẽn tõe n kɩt tɩ Wẽnnaam daabã pa pids ye.—Yɩɩn. 135:6; Eza. 46:9, 10.

D WILG TƖ D SŨUR NOOMA WƲSG NE A ZEEZI MAOONGÃ

13. Ned sã n deeg lisgu, wilgda bõe?

¹³ D rat n wilga a Zeova tɩ d pa zɩ-beoog rãmb ye. Bũmb a ye ned sẽn na n maan n wilg rẽ yaa a sẽn na n sɩd sak n lebg a neda, wa a sẽn datã. Ned sã n sak n dɩk a meng n kõ a Zeova n deeg lisgu, wilgdame t’a tẽeda a Zeezi maoongã. A lisgã wilgdame t’a lebga ‘a Zeova rẽnda.’ (Rom. 14:8) D sã n deeg lisgu, yaa wa d sẽn kos a Zeova t’a kõ-d “sũur kaset sẽn ya sõama.” (1 Pɩy. 3:21) Kiristã zɩɩmã sẽn daagã yĩnga, a Zeova sakda d kosgã, n yẽes d yel-wẽnã. Rẽ n so tɩ d kɩs sɩd zãng t’a Zeova na n kɩtame tɩ d paam bark nins fãa a sẽn pʋlmã.—Rom. 8:32.

14. Bõe yĩng t’a Zeova rat tɩ d nong d taabã?

¹⁴ Bũmb a to me la d tõe n maan n wilg tɩ d pa zɩ-beoog rãmb ye. A Zeova ratame tɩ sẽn yaa-b yẽ nebã wilg nonglem wa yẽnda. Sɩd me, a maanda bũmb fãa ne nonglem. (1 Zã 4:8-11) Tõnd sã n nong nebã, sẽn yɩɩd fãa d tẽed-n-taasã, wilgdame tɩ d yaa d Ba sẽn be saasẽ wã “kamba.” (Mat. 5:43-48) Tẽeg-y-yã a Zeova noy nins sẽn yɩɩd noy a taabã fãa wã. Pipi soabã yetame tɩ d nong a Zeova, tɩ yiib-n-soabã yetẽ tɩ d nong d taabã. (Mat. 22:37-40) Bũmb d sẽn tõe n maan n wilg tɩ d nonga d taabã yaa d sẽn na n sak n taas-b Wẽnnaam Rĩungã koe-noogã, wa a sẽn yeel tɩ d maanã. Rẽ sõngdame tɩ nebã yã Wẽnnaam ziirã. D sã n tũ a Zeova noorã n sɩd nong d taabã, d wilgdame t’a “nonglmã zemsa zãng tõnd pʋgẽ.”—1 Zã 4:12, 20.

A ZEEZI MAOONGÃ YĨNGA, D PAAMDA BARK TOOR-TOOR SẼN YIT A ZEOVA NENGẼ

15. a) Bark bʋs la d zoe n paamd a Zeezi maoongã yĩnga? b) La bark bʋs la d na n wa paame?

¹⁵ A Zeova yeta tõnd tɩ d sẽn tẽed a Zeezi maoongã, bɩ d bas d yam t’a “yẽesa” d yel-wẽnã. A basa d yel-wẽnã taale. (Karm-y Tʋʋm 3:19-21.) Wa d sẽn zoe n yeelã, a Zeezi maoongã yĩnga, a Zeova yãka neb kẽer tɩ b lebg a kamba, n na n tɩ vɩɩmd saasẽ. Yaa kiris-neb nins sẽn paam vʋʋsem sõngã zaeebã. (Rom. 8:15-17) Sã n yaa ne kiris-neb nins a Zeezi sẽn boond t’a ‘piis a taabã,’ a Zeova sakame tɩ b yaa yẽ nin-buiidu, n na n vɩɩmd tẽngã zugu. A na n sõng-b lame tɩ b lebg neb sẽn zems zãnga. Rẽ poore, b na n paama b yaoolem makre. B sã n kell n sak a Zeova, bãmb me na n lebga a kamba. (Rom. 8:20, 21; Vẽn. 20:7-9) A Zeova na n nonga a kambã fãa. A Zeezi maoongã nafa na n kaoosa wakat sẽn kõn sa. (Ebre. 9:12) Hakɩɩka, a Zeezi maoongã sɩd yaa Wẽnnaam kũun sẽn ka to. Bõn-naandg baa a ye pa tõe n deeg-a n bas-d ye.

16. Bõe yĩng tɩ d yetẽ t’a Zeezi maoongã fãaga tõndo?

¹⁶ Ned sã n tek yam n bas a yel-wẽnã, bũmb kae a Sʋɩtãan sẽn tõe n maan n gɩdg-a t’a pa lebg a Zeova rẽnd ye. A Zeezi sẽn wa tẽngã zugã, a kii “vugr bala,” la a maoongã yõod na n kaoosa wakat fãa. (Ebre. 9:24-26) D yaab a Ãdem kɩtame tɩ d fãa yaa kiidba, la a Zeezi maoongã kɩtame tɩ d na n wa paam n vɩ n pa kiidẽ ye. A Zeezi kũumã sẽn dol yel-wẽnã yĩnga, tõnd pa le zoet kũum, d pa le yaa a Sʋɩtãan dũniyã yembs me ye.—Ebre. 2:14, 15.

17. Wilg-y-yã a Zeova sẽn nong ãdem-biisã sẽn nafd yãmb to-to.

¹⁷ Wẽnnaam pʋleng fãa pidsdame. Wa noy nins a sẽn luglã sẽn pa toeemdã, yẽ me pa toeemd ye. A pa na n tol n belg tõnd a bada! (Mal. 3:6) Pa vɩɩmã bal la a Zeova kõ tõnd ye. A wilga tõnd a nonglem. Ad Biiblã sẽn yete: “Tõnd bãnga nonglem ning Wẽnnaam sẽn tar tõnd yĩngã, la tõnd tẽe nonglem-kãnga. Wẽnnaam yaa nonglem.” (1 Zã 4:16) Hakɩɩka, Wẽnnaam pʋlemsã fãa na n pidsame. Dũniyã gill na n lebga arzãna, tɩ vɩɩmã yɩ noog wʋsgo! Nebã na n nonga taaba, la b nong Wẽnnaam. Wakat kãnga, tẽng zug la saasẽ dãmbã fãa na n lagma b koees n yeele: “Pẽgre, la ziiri, la yam la bark pʋʋsgo, la waoogre, la pãn-tõogo, la pãng yaa tõnd Wẽnnaamã n so zamaan woo zamaana! Ãmina!”—Vẽn. 7:12.