Karemdbã sogsgo

Bõe yĩng t’a Matye evãnzillã ne a Luk evãnzillã sẽn togsd bũmb nins a Zeezi rogmã la a yãadmã wɛɛngẽ wã pa yembre?

Matye evãnzillã ne Luk evãnzillã sẽn togsd bũmb nins a Zeezi rogmã la a yãadmã wɛɛngẽ wã pa yembr zãnga, bala, a Matye sã n togsd kibayã, a Zozɛf yell la a gomd n tɩ yɩɩda, t’a Luk gomd a Maari yell n tɩ yɩɩda.

Matye evãnzillã wilgda a Zozɛf manesem sẽn yɩ to-to a sẽn wa n wʋm t’a Maari tʋtame wã, la malɛkã sẽn gom ne-a zãmsd pʋgẽ n bilga yellã võore, t’a sak n maan wa malɛkã sẽn yeelã. (Mat. 1:19-25) Matye evãnzillã leb n wilgame tɩ malɛk n le gom ne-a zãmsd pʋgẽ, n yeel-a t’a zoe n kẽng Ezɩpt ne a zakã rãmba, la t’a sɩd tũu malɛkã goamã. A Matye wilgame me t’a Zozɛf sẽn wa n be Ezɩptã, malɛk n le gom ne-a zãmsd pʋgẽ, n yeel-a t’a yik n leb Israyɛlle, t’a sɩd tall a zakã rãmb n lebe, tɩ b tɩ zĩnd Nazarɛte. (Mat. 2:13, 14, 19-23) Matye sebrã sak a ye ne a yiibã pʋgẽ, naoor a 6 la b pʋd a Maari yʋʋrã, n yaool n pʋd a Zozɛf yʋʋrã hal naoor 10.

La Luk evãnzillã togsda malɛk a Gabriyɛll sẽn wa n gom ne a Maari wã, a Maari sẽn tɩ ges a Elizabɛtã, la a sẽn gom goam nins n pẽg a Zeova wã. (Luk 1:26-56) A Luk leb n togsda a Sɩmeyõ sẽn yeel a Maari t’a Zeezi na n wa namsame wã. Baa a Luk sẽn na n togs a Zeezi sẽn tũ a roagdbã n kẽng wẽnd-doogẽ wã a sẽn wa n tar yʋʋm 12, yaa a Maari sẽn yeel bũmb ninsã la a togs-yã. A pa togs a Zozɛf goamã ye. A yeelame meng t’a Maari pa tol n yĩm yel-kãensã fãa ye. (Luk 2:19, 34, 35, 48, 51) A Luk sebrã sak a ye ne a yiibã pʋgẽ, b pʋda a Maari yʋʋrã naoor 18, n yaool n pʋd a Zozɛf yʋʋrã naoor a 5 bala. Dẽnd d tõe n yeelame t’a Matye gomda a Zozɛf yell n yɩɩda, n wilgd a sẽn da maand yɩɩr ne yɛl ninsã, la a sẽn maan bũmb ninsã, t’a Luk gomd a Maari yell n yɩɩda, n wilgd sẽn da be a sũurẽ wã, la a sẽn maanã.

A Matye ne a Luk fãa sõdga a Zeezi yaab-rãmbã roogo, la pa yembr zãng ye. A Matye sõdga a Zozɛf yaab-rãmbã, n na n wilg t’a sẽn yaa a Zeezi ba-wubdgã, kɩtame t’a Zeezi tar sor n na n deeg a Davɩɩd naamã. Bõe yĩnga? Bala a Zozɛf yaa rĩm a Davɩɩd biig a Salomo yagenga. (Mat. 1:6, 16) A Luk yẽ sõdga a Maari yaab-rãmbã, n na n wilg tɩ rĩm a Davɩɩd ne a Zeezi yaa rogem, la tɩ rẽ kɩtame t’a Zeezi tar sor n na n deeg a Davɩɩd naamã. (Rom. 1:3) Bõe yĩnga? Bala, a Maari yaa rĩm a Davɩɩd biig a Natã yagenga. (Luk 3:31) La a Luk sẽn wa n sõdgd a Maari yaab-rãmbã, bõe yĩng t’a pa pʋd a Maari yʋʋr n wilg t’a yaa a Heli biiga? Bala, sɛbã pʋsẽ, b sã n na n sõdg roogo, nong n yaa rapã la b sõdgda. Rẽnd a Luk sẽn pʋd a Zozɛf yʋʋr tɩ yaa wa a yaa a Heli biigã, nebã bãngame tɩ yaa sẽn dat n yeel t’a yaa a Heli rɛɛmba.—Luk 3:23.

A Zeezi yaab-rãmbã roog a Matye ne a Luk fãa sẽn sõdgã wilgdame t’a Zeezi n sɩd yaa Mesi ning Wẽnnaam sẽn da yeel t’a watame wã. Nebã ra miime t’a Zeezi sɩd yaa rĩm a Davɩɩd yagenga, hal tɩ baa fariziẽ-rãmbã ne sadiseẽ-rãmbã ra pa tõe n kɩɩs ye. A Matye ne a Luk sẽn sõdg a Zeezi yaab-rãmbã roogã yaa bũmb sẽn paasd tõnd tẽebã pãnga, n kɩt tɩ d kɩs sɩd tɩ Wẽnnaam pʋlemsã fãa na n wa pidsame.