Wẽnnaam wʋmda yãmb yɛlã võor bɩ?

WẼNNAAM SẼN NAANÃ WILGDA BÕE?

Tags-y zood la zems-n-taar ning sẽn tõe n zĩnd kinkirs a yiib sʋkã.a Ninsaalbã ne taab zoodã wɛɛngẽ, zood pa be n tõe n tall pãng n ta kinkirs a yiib zood ye. B sẽn mi taab sõma to-to wã, n wʋmd taab la b nong taab to-to wã pa tar mak-n-taar ye. A Nancy Segal yaa kinkirga. A yaa tʋʋmd noor a ye taoor soaba. B maanda vaeesg kinkirsã zugu. Ad a sẽn yeele: “Kinkirs a yiib tõeeme meng n wʋmd taab goam võor nana-nana, tɩ pa tũ ne bilgr ye.” Pag a ye sẽn yaa kinkirg goma zood ning sẽn be yẽ ne a kinkir-taagã sʋkã yelle, n yeel yaa: “Bũmb kae d sẽn pa mi d to wã zug ye.”

Bõe n kɩt tɩ kinkirs tõe n wʋmd taab sõma woto? Bãngdb n wilg tɩ kinkirs sẽn bɩ zĩig ningã, wall b roagdbã sẽn wub-b to-to wã tõe n kɩtame tɩ yaa woto, la tɩ sẽn yɩɩd fãa, yaa b yalẽ wã sẽn tolg n wõnd taabã yĩnga.

TAGS-Y N GES-Y: Sẽn yaa Wẽnnaam n naan kinkirsã tɩ b mi taaba, la b tõe n wʋmd taab sõma woto wã, yaa vẽeneg tɩ yẽ n mi tõnd ned kam fãa n yɩɩda, la a wʋmd d yɛlã võor n yɩɩda. Sɩd me, yɩɩn-gʋlsd a Davɩɩd ra yeelame: “Yãmb n yag maam m ma pʋgẽ. Mam yĩngã ka tar bũmb sẽn solg ne yãmb ye. Yãmb naana maam zĩ-soalgdgẽ. . . . Mam sẽn wa n nan ka tar naande, yãmb dag n nee maam.” (Yɩɩn-sõamyã 139:13, 15, 16) Wẽnnaam a ye tãa n mi tõnd yalẽ wã fãa sõma, la yɛl nins fãa sẽn kɩt tɩ d tar zʋgd ning d sẽn tarã. A sẽn mi tõnd sõma woto wã kɩtame tɩ d tõe n bas d yam t’a wʋmda tõnd yɛlã fãa võore.

BÕE LA BIIBLÃ YETA, TƖ WILGDẼ TƖ WẼNNAAM WƲMDA D YƐLÃ VÕORE?

Daar a ye, a Davɩɩd pʋʋsa a Zeova n yeel-a yaa: “Yãmb feesda maam, yãmb mii maam. Yãmb mii mam zĩndg la m yikr wakate, yãmb reng n bãnga mam tagsgã tɩ ket n zãra. Sẽn deng tɩ gomd yi mam noorẽ, yãmb a Sẽn-Ka-Saab zoe n bãng-a-la fãa.” (Yɩɩn-sõamyã 139:1, 2, 4) Sẽn paase, a Zeova mii sẽn be tõnd sũurã pʋgẽ-pʋgẽ wã, la baa d ‘tagsgã la d ratmã’ menga. (1 Kibayã 28:9, Wẽnnaam Sebre, 1983; 1 Sãmwɛll 16:6, 7) Gom-kãensã sõngda tõnd tɩ d bãng bõe Wẽnnaam zugu?

Wakat ninga, d tõeeme n dat n togs Wẽnnaam bũmb sẽn be d sũurẽ, n yaool n pa mi d sẽn na n yeel ye. Baa wakat kãng menga, d Naandã nee d sẽn maandã fãa, la a wʋmd bũmb ning sẽn kɩt tɩ yaa woto wã võore. A pʋd n mii bõn-sõma nins d sẽn tʋll n maanã, baa d sẽn mi n kong pãnga, n pa tõog n pids d sẽn tʋllã. Sẽn yaa Wẽnnaam n naan-d tɩ d tõe n wilg nonglmã, a sã n neẽ tɩ nonglmã pukda d tagsa wã la d tʋlsmã pʋgẽ, noom-a lame.—1 Zã 4:7-10.

Ad Biiblã sẽn yete:

• “Zu-soabã geta nin-tɩrse, bãmb kelgda nin-tɩrs pʋʋsgo.”—1 PƖYƐƐR 3:12.

• Wẽnnaam yetame yaa: “Mam na n zãmsa foom, la m wilg foom sor ning f sẽn tog n tũ. Mam na n sagla foom, la mam nin na n bee fo zugu.”—YƖƖN-SÕAMYÃ 32:8

WẼNNAAM YAA NIMBÃAN-ZOƐT TƐKẼ!

D sẽn mi tɩ Wẽnnaam wʋmda tõnd yɛlã võore, la a mi sẽn be d sũurẽ wã tõe n sõnga tõnd tɩ d tõog n mao ne zu-loeesã bɩ? N-ye. A Ana sẽn be Nizeriya wã kibar wilgda rẽ. Ad a sẽn yeele: “M zu-loeesã sẽn da loog nugã kɩtame tɩ m da sokd m meng n getẽ m sã n tolg n ki pa são.” A ra yaa pʋg-kõore, t’a bi-pugl ra pa keeme, n be logtor yir t’a get a yelle. A bi-puglã bẽeda bã-kɛgeng sẽn kɩt t’a zugã fɩɩge. Wakat kãng me la logtoeembã bãng t’a Ana mengã bẽeda bĩis kãnsɛɛre, tɩ b ra segd n maan-a wopeere. Ra na n yɩɩ tɩlɛ me t’a sak tɩbsg buud toor-toor sẽn pa nana. Ad a Ana sẽn paase: “B sẽn da gãneg maam logtor yiri, tɩ m bi-puglã me yaool n da ket logtor yirã, ra pa nana ne maam baa-baa.”

Bõe n sõng a Ana t’a tõog toogo? Ad a sẽn yeele: “M bʋgsa Biiblã goam kẽer zugu, wala makre, Filip-rãmb 4:6, 7. B yeela be tɩ: ‘Wẽnnaam laafɩ wã sẽn yɩɩd ninsaalbã bãngr fãa wã na n gũu yãmb sũyã ne y tagsdã.’ M sã n da tẽeg gom-kãensã fãa, m neeme tɩ m pẽe a Zeova, n maneg n kɩs sɩd t’a wʋmda m yɛlã võor sõma n yɩɩd mam mengã. M leb n da paamdame tɩ m tẽed-n-taasã sẽn be m tigingã pʋgẽ wã kengd m daood hal sõma.”

“Baa m sẽn ket n maood ne m bãagã, sãoo wʋsgo. M biigã me yĩnsã sãoome. A Zeova sẽn be ne tõndã sõngdame tɩ d pa tar tags-kɛg zu-loees a woto buudã pʋgẽ ye. Zak 5:11 yetame: ‘Tõnd yetame tɩ neb nins sẽn yals-b kãenkãe wã yaa sũ-noog rãmba. Yãmb wʋmame tɩ b gom a Zoob sũ-marã yelle, la yãmb yãnda baoosg ning Zu-soabã sẽn kõ-a wã. Bala, Zu-soabã pida ne nonglem la nimbãan-zoeere.’” A Zeova ra mii a Zoob zu-loeesã sẽn da namsd-a to-to wã sõma, tɩ tõnd me tõe n kɩs sɩd t’a mi d zu-loeesã sẽn namsd-d to-to wã.