Bɩ d waoog kãadmã Wẽnnaam sẽn luglã

1, 2. Ebre-rãmb 13:4 goamã segd n kɩtame tɩ d rat ne d sũur fãa n maan bõe?

TÕND fãa rata ne d sũy fãa n waoog a Zeova. A toga ne waoogre. Rẽ me, a pʋlmame tɩ d sã n waoogd-a, a na n waoogda tõndo. (1 Sãm. 2:30; Yel. 3:9; Vẽn. 4:11) A ratame me tɩ d waoogd d taabã, wala makre, goosneemã tʋm-tʋmdbã. (Rom. 12:10; 13:7) La bũmb me n be d sẽn segd n waoog hal sõma. Yaa kãadmã.

² Tʋm-tʋmd a Poll ra yeelame: “Bɩ nebã fãa waoog kãadem, la bɩ ned ne a pag pĩir da zĩnd dẽgd ye.” (Ebre. 13:4) A Poll sẽn yeel woto wã, pa goam bal t’a gomd ye. Yaa sẽn na n sõng kiris-nebã tɩ b bãng tɩ b segd n nanda kãadem. Yãmb tagsg yaa woto ne kãadem buud fãa bɩ? Y sã n kẽe kãadem, y tagsg yaa woto ne yãmb mengã kãadmã bɩ?

3. Sagl-bʋg la a Zeezi kõ kãadmã wɛɛngẽ? (Ges-y fotã sẽn be yĩngrã.)

³ Y sã n nanda kãadmã, y rɩkda a Zeezi togs-n-taare. Sɩd me, a Zeezi ra waoogda kãadmã. Daar a ye, fariziẽ-rãmbã sok-a lame n na n bãng noor sã n beeme tɩ ned kao a kãadem. A lebg n tẽega Wẽnnaam sẽn lugl pipi kãadmã, n yeel yaa: “Yaa woto yĩng tɩ rao na n yii n bas a ba la a ma, n zĩnd ne a paga. La bãmb b yiibã fãa na n lebga yĩng a yembre. Dẽ, bɩ ninsaal da welg bũmb nins Wẽnnaam sẽn lagem ne taab ye.”—Karm-y Mark 10:2-12; Sɩng. 2:24.

4. A Zeova raabã ne kãadmã yaa bõe?

⁴ A Zeezi gomdã wilgdame t’a sak n deegame tɩ kãadmã yaa Wẽnnaam n lugli, la tɩ rao ne pag sã n kẽ kãadem, yaa wakat fãa yĩnga. Wẽnnaam pa yeel a Ãdem ne a Awa tɩ b tõe n wa kao b kãadmã ye. Wẽnnaam da ratame tɩ “b yiibã” zĩnd ne taab wakat sẽn kõn sa. A lugla kãadem, n dat tɩ yɩ woto.

BŨMB KẼER SẼN TOEEME

5. Bõe yĩng tɩ d yetẽ tɩ kũum wata ne toeeng kãadem pʋgẽ?

⁵ La d miime t’a Ãdem kɩɩsgã kɩtame tɩ yɛl wʋsg toeeme. Wala makre, ninsaal sẽn lebg kiidã yaa bũmb sẽn wat ne toeeng kãadem pʋgẽ. Bũmb la tʋm-tʋmd a Poll yeel-yã, tɩ bilgd rẽ sõma. A yeelame tɩ neb sã n kẽ kãadem, t’a ye wa maan kaalem, kãadmã kaool saame, t’a to wã tar sor n na n lebg n kẽ kãadem.—Rom. 7:1-3.

6. Wãn to la a Moyiiz tõogã sõngd tõnd tɩ d bãng t’a Zeova nanda kãadem?

⁶ Tõogã Wẽnnaam sẽn da kõ Israyɛll nebã sõngda tõnd tɩ d bãng bũmb kẽer kãadmã wɛɛngẽ. Wala makre, Wẽnnaam ra basame tɩ rao tõe n dɩk pagb a yiib bɩ sẽn yɩɩd rẽ. Yaa bũmb sẽn sɩng nand tɩ Wẽnnaam kõ-b tõogã. La tõogã pʋgẽ, Wẽnnaam ra kõo noy sẽn kɩt tɩ b pa tõe n wẽg pagbã la kambã bɩ n maan-b pãng ye. Wala makre, rao sã n da kẽ kãadem ne yem-poaka, tɩ rẽ poor t’a rɩk pag a to, a pa segd n boog rɩɩbã bɩ futã a sẽn da kõt pipi pagã, a segd n ket n kẽeda ne-a me wa pĩndã. Wẽnnaam ratame t’a kell n ges pipi pagã yelle, t’a paam koglgo, la sẽn yaa tɩlɛ ne-a wã. (Yik. 21:9, 10) Rũndã-rũndã, tõnd pa tũud tõogã ye. La sõngda tõnd tɩ d bãng t’a Zeova nanda kãadem. Woto pa kɩt tɩ yãmb me rat n waoogd kãadem sɩda?

7, 8. a) Tõod 24:1 wã pʋgẽ, bõe la tõogã ra yet kãadmã kaoob wɛɛngẽ? b) A Zeova tagsg yaa wãn ne kãadem kaoobo?

⁷ La bõe la tõogã ra yeel kãadmã kaoob wɛɛngẽ? Baa sɩngrẽ wã a Zeova sẽn da pa rat tɩ rao ne a pag kao b kãadmã, a kõo sor tõogã pʋgẽ tɩ rao tõe n bas a paga, a sã n ‘wa mik t’a maana yãnde.’ (Karm-y Tõod 24:1.) Tõogã pa wilg “yãndã” sẽn tõe n yɩ bũmb ning ye. La yaa vẽeneg tɩ pa kong-bõoneg ye. Tõe tɩ yaa manesem sẽn ningd yãnde, wall sẽn yaa wẽng wʋsgo. (Tõo. 23:15) Bʋko, a Zeezi wakatẽ wã tɩ zʋɩf-rãmb wʋsg ra basda b pagba, “beegr buud fãa yĩnga.” (Mat. 19:3) Tõnd pa rat n maan wa bãmb a bada!

⁸ No-rɛɛs a Malaki wakatẽ wã, kãadmã kaoob ra lebga bũmb sẽn wae. Tõe tɩ rapã ra basda ‘pag ning b sẽn peeg b bi-bɩɩlem wakatã,’ n dɩk pʋg-bɩɩg sẽn pa tũud a Zeova. La Wẽnnaam kɩtame t’a Malaki yeel-b vẽeneg yaa: “Mam kisa ned sẽn digd a paga.” (Mal. 2:14-16) Wẽnnaam tagsgã kãadmã zugã pa toeem ye. Wa a sẽn da yeel hal sɩngrẽ wã, a ket n datame tɩ rao “loe a meng ne a paga,” tɩ b yiibã ‘lebg yĩng a yembre.’ (Sɩng. 2:24) A Zeezi me tagsg yaa wa a Ba wã bal kɛpɩ. Yaa rẽ yĩng la a sẽn yeel tɩ “ninsaal da welg bũmb nins Wẽnnaam sẽn lagem ne taabã.”—Mat. 19:6.

BŨMB NING BAL SẼN TÕE N WA NE KÃADEM KAOOBO

9. A Zeezi goam nins sẽn be Mark 10:11, 12 võor yaa bõe?

⁹ Tõe tɩ kẽer sokda b meng yaa: ‘Bʋʋm bee sẽn kõt kiris-ned sor t’a tõe n kao a kãadem, n lebg n kẽ kãadem ne ned a to bɩ?’ Ad a Zeezi sẽn yeele: “Ned sã n dig a pag n dɩk pag a to, a yaa yoaad a pipi pagã nifẽ. La pag sã n bas a sɩd n dɩk a to, a maanda yoobo.” (Mark 10:11, 12; Luk 16:18) Dẽnd yaa vẽeneg t’a Zeezi waoogda kãadmã, n dat tɩ neb a taabã me maan woto. Ned sã n bas a pag wall a sɩd n tɩ rɩk ned a to, yaa yoobo. Sɩd me, a sẽn bas-a wã pa rat n yeel tɩ kãadmã kaool saame ye. Wẽnnaam nifẽ, b ket n yaa “yĩng a yembre.” Sẽn paas menga, a Zeezi yeelame tɩ ned sẽn basd a paga, t’a yaool n pa maan sẽn yaa wẽnga, a kɩtdame t’a kẽ yoobo. Wãn to? Wakat kãngã, rao sã n bas a paga, pagã tõe n getame tɩ yaa tɩlɛ t’a lebg n kẽ kãadem, n paam ned t’a get a yelle. A sã n yaool n kẽ kãadem ne ned a to, yaa yoobo.

10. Bõe bal n kõt kiris-ned sor t’a tõe n kao a kãadem, n lebg n kẽ ne ned a to?

¹⁰ A Zeezi yeelame tɩ yaa bũmb a ye tãa n tõe n kõ ned sor t’a kao a kãadem. Ad a sẽn yeelã: ‘Mam yeta yãmb tɩ ned sã n dig a paga, tɩ sã n ka yoob yĩnga, n dɩk a to, a maanda yoobo.’ (Mat. 19:9) A sẽn na n sõs ne nebã tãngã zugã me, a yeela woto. (Mat. 5:31, 32) Naoor a yiibã fãa, a goma yoob yelle. Biiblã pʋgẽ, yoob võor yalmame. Neb sẽn pa kẽ kãadem ne taab sã n kẽ ne taaba, ned sẽn kẽ kãadem sã n zãmb a to wã, ned sã n koosd a menga, pag ne pag wall rao ne rao sã n kẽ ne taaba, ned sã n kẽ ne rũnga, fãa yaa yoobo. Rao sã n yo, bee ne a pagã t’a yãk a sã n na n kaoo kãadmã bɩ a pa na n kao. A sã n kao kãadmã, Wẽnnaam nifẽ, b pa le yaa pag ne a sɩd ye.

11. Baa kiris-ned tar sor n tõe n kao a kãadem, bõe yĩng t’a tõe yãk yam n pa na n kao?

¹¹ La d tẽeg t’a Zeezi pa yeel tɩ ned pag wall a sɩd sã n yo, yaa tɩlɛ t’a kao kãadmã ye. Wala makre, rao tõe n yoome, t’a pagã yãk yam n na n kell n zĩnd ne-a. Bõe yĩnga? Tõe t’a ket n nonga raoã, n sak n na n kõ-a sugri, la a rat tɩ b mao tɩ b kãadmã yɩ sõma. Sẽn paas me, a sã n kao kãadmã, n pa lebg n kẽ ne ned a to, yɛl kẽer n pa na n yɩ nana ne-a. Ãnd n na n get a yelle? Pag ne rao lagengã tʋlsem wɛɛngẽ, a na n maana wãna? A sã n na n zĩnd a ye, pa na n nams-a? La b sã n tara kamba? Kãadmã kaoob pa na n kɩt tɩ yɩl n kell n wub kambã a Zeova tũudmã pʋgẽ yɩ toog wʋsg sɩda? (1 Kor. 7:14) Sɩd-sɩdã, sẽn tar-a sor n kao kãadmã sã n yãk yam n kao, yɛl kẽer n tõe n yɩ toog wʋsg ne-a.

12, 13. a) Togs-y a Ooze kãadmã sẽn yɩ to-to. b) Bõe yĩng t’a Ooze le tɩ peeg a Gomeere, la yam-bʋg la d tõe n dɩk kibarã pʋgẽ?

¹² No-rɛɛs a Ooze vɩɩmã kibar sõngda tõnd tɩ d bãng Wẽnnaam tagsg sẽn yaa a soab ne kãadmã. Wẽnnaam yeela a Ooze t’a kẽ kãadem ne a Gomeer sẽn na n wa yɩ pʋg-yoodr n ‘dog yoodem kambã.’ A Ooze ne a Gomeer wa n paama bi-ribla. (Ooze 1:2, 3) La a Gomeer wa n doga bi-pugl ne bi-ribl a to. Wõnda bãmb yaa rao a to kamba. Baa ne sẽn pa vugr bal la a Gomeer zãmb a Ooze wã, a Ooze kell n pa kao b kãadmã ye. A wa n pʋd n basa a Ooze, n tɩ lebg yamba. Baa ne rẽ, a Ooze tɩ yaoome n deeg-a. (Ooze 3:1, 2) A Zeova tũnuga ne a Ooze vɩɩmã, n na n wilg tɩ baa Israyɛll nebã sẽn bas yẽ naoor wʋsgo, n tɩ pʋʋs wẽn-naandsã, a kõ-b-la sugri. Yam-bʋg la d tõe n dɩk a Ooze kibarã pʋgẽ?

¹³ Kiris-ned pag bɩ a sɩd sã n yo, a tog n yãka a sẽn na n maanega. A Zeezi yeelame t’a tara sor n na n kao kãadmã, n leb n kẽ ne ned a to. La a tõe n yãka yam me n na n kõ sugr tɩ sa. Woto pa wẽng ye. A Ooze me lebg n tɩ peega a Gomeere. A sẽn tɩ peeg-a wã, a yeel-a lame t’a pa segd n le tɩ kẽ ne rao a to, la tɩ yẽ me ‘na n maana a woto ne-a.’ La a Ooze wa n le kẽeda ne-a, tɩ woto ra bilgd Wẽnnaam sẽn kõ Israyɛll nebã sugri, n sak tɩ b le yaa a nin-buiidã. (Ooze 2:2; 3:3-5) Woto wilgda tõnd bõe? Ned pag wall a sɩd sã n yo, a sã n le sak n kẽ ne-a, wilgdame t’a kõ-a-la sugri, n na n kell n zĩnd ne-a. (1 Kor. 7:3, 5) Rẽ tɛka, a pa le tar bʋʋm n na n kao b kãadmã ye. La pagã ne a sɩdã fãa segd n maana b sẽn tõe fãa tɩ b kãadmã yɩ sõma, tɩ wilgdẽ tɩ b waoogda kãadmã wa Wẽnnaam sẽn datã.

WAOOG-Y KÃADMÃ, BAA Y ZĨID-N-TAARÃ YAA TOOGO

14. Pipi Korẽnt-rãmb 7:10, 11 wã wilgdame tɩ yel-bʋg n tõe n wa zĩnd kãadem pʋgẽ?

¹⁴ Kiris-nebã fãa segd n waooga kãadmã, wa a Zeova ne a Zeezi. La d sẽn pa zems zãngã, kẽer mi n pa waoogd kãadmã ye. (Rom. 7:18-23) Dẽnd pipi kiris-neb kẽer sẽn da tar zu-loe-kɛgems b kãadmã pʋgẽ wã pa lingd tõnd ye. A Poll yeelame tɩ “pag ra yi n bas a sɩd ye.” La kẽer maana woto.—Karm-y 1 Korẽnt-rãmb 7:10, 11.

15, 16. a) Pag ne a sɩd sã n tar zu-loees b kãadmã pʋgẽ, bõe la b segd n maane, la bõe yĩnga? b) La b nin-yendã sã n pa tũud a Zeova?

¹⁵ A Poll pa togs bũmb nins sẽn tõe n wa kɩt tɩ pag yi n bas a sɩda, tɩ b yiibã pa le be ne taabã ye. La yaa vẽeneg tɩ pa raoã sẽn yo yĩng ye. Bala sã n da yaa rẽ, pagã tara sor n na n kao kãadmã, n lebg n kẽ ne ned a to. A Poll yeelame tɩ pag sã n yi n bas a sɩda, segdame t’a ‘kell n zĩnd a yembre, wall a maneg a yellã ne-a.’ Woto wilgdame tɩ Wẽnnaam nifẽ, b ket n yaa pag ne a sɩda. A Poll sagenda sẽn kẽ-b kãadmã tɩ baa sẽn wa n yaa yell ning fãa la b tara, sã n mik tɩ pa b nin-yend n yo, segdame tɩ b modg n maneg yellã, rat n yeel tɩ b welg yellã la b kell n zĩnd ne taaba. B tõe n kosa kãsem-dãmbã sõngre. Kãsem-dãmbã tõe n kõ-b-la sagls sẽn yit Biiblã pʋgẽ, la b na n gũusame n da wa yãk nin-yend n teel ye.

¹⁶ La nin-yendã sã n pa tũud a Zeova? Woto kõta sẽn tũud-a a Zeova wã sor tɩ yell sã n wa beẽ bɩ a yi n bas-a bɩ? Wa d sẽn zoe n togsã, Biiblã yetame tɩ yaa yoob bal n kõt ned sor t’a kao a kãadem, la a pa wilgd bũmb nins sẽn tõe n wa kɩt tɩ b welg taabã ye. Ad a Poll sẽn yeele: “Pag sã n tar sɩd sẽn ka tẽeda, la a sã n noom a sɩdã t’a rat n tall-a, bɩ a ra yi ye.” (1 Kor. 7:12, 13) Segd n yɩɩ woto rũndã-rũndã me.

17, 18. Bõe yĩng tɩ kiris-neb kẽer kell n zĩnd ne b sɩd wall b paga, baa ne b sẽn da tar zu-loe-kɛgems b kãadmã pʋgẽ wã?

¹⁷ La rap kẽer sẽn pa tũud a Zeova tara manesem sẽn wilgd tɩ b pa rat n kell n zĩnd ne b pagã sẽn tũud a Zeova wã ye. Wala makre, tõe t’a tara pagã n pãbda, hal t’a getẽ tɩ tõe n pogl-a lame wall tũ ne a yõore. Tõe me t’a pa get a yelle, la zakã meng yelle, pa rẽ bɩ a pa rat n sak t’a tũ a Zeova wa sẽn segdã ye. Saam-bi-poak ning sɩd sã n maand woto, a tõeeme n wa getẽ tɩ baa raoã sẽn yet a soab fãa, a manesmã wilgdame t’a pa rat n kell n zĩnd ne yẽ, la tɩ welgrã lebga tɩlɛ, n yãk a yam n na n looge. La saam-bi-poak a to sẽn be yel-kãng me pʋgẽ tõe n yãka yam n na n kell n zĩnd ne a sɩdã, n sak n na n tõog toog la a maan a sẽn tõe fãa tɩ b zĩid-n-taarã manege. Bõe yĩnga?

¹⁸ Baa pag ne a sɩd sã n pa le be ne taaba, b ket n yaa yĩng a yembre, bala kãadmã pa kao ye. Ned fãa na n maoo ne zu-loees wa d sẽn zoe n togsã. Tʋm-tʋmd a Poll wilga bũmb a to me sẽn kɩt tɩ b tõe n yãk yam n na n kell n zĩnd ne taabã. Ad a sẽn yeele: “Bala, pagã kɩtame t’a sɩdã sẽn ka tẽedã lebg nin-sõngo, la d ba-bi-raoogã kɩtdame t’a pagã sẽn ka tẽedã lebg nin-sõngo. Sã n ka rẽ, yãmb kambã na n yɩɩ bõn-dẽgdo, tɩ b yaool n yaa nin-sõamyã.” (1 Kor. 7:14) Kiris-neb sẽn kell n zĩnd ne b pag wall b sɩd sẽn da pa tũud a Zeova, baa sẽn da yaa toog wʋsgã sõor waoogame. B tõe n kõo kaset tɩ b sẽn wõr b mens woto wã pa yɩ zaalem, bala b to wã wa n lebga a Zeova Kaset soaba.—Karm-y 1 Korẽnt-rãmb 7:16; 1 Pɩy. 3:1, 2.

19. A Zeova Kaset rãmbã tigimsã pida ne neb sẽn tar sũ-noog b kãadmã pʋgẽ. Yaa bõe yĩnga?

¹⁹ A Zeezi goma kãadmã kaoob yelle, n kõ saglse, tɩ tʋm-tʋmd a Poll kõ sagls welg-taabã wɛɛngẽ me. A Zeezi ne a Poll fãa raabã yaa Wẽnnaam nin-buiidã na waoog kãadmã. Kiris-nebã tigimsã sẽn be dũniyã gill zugã pida ne neb sẽn tar sũ-noog b kãadmã pʋgẽ. Yãmb tigingã pʋgẽ menga, y tog n mii neb wʋsg kãadem sẽn tar barka, n kõt sũ-noogo. Yaa pʋg-sɩdb sẽn maand sɩda, n nong b pagbã, tɩ pagbã me nong b sɩdbã, n waoogd-ba. Woto yaa kaset tɩ kãadmã waoogrã yaa bũmb sẽn tõe. D sũy yaa noogo, d sẽn ne tɩ rap milyõ-rãmb ne b pagb vɩɩm kõta kaset tɩ Wẽnnaam sẽn yeel sɩngrẽ wã yaa sɩdã. Ad a sẽn da yeelã: “Yaa rẽ yĩng la rao tog n yi n bas a ba ne a ma n zĩnd ne a paga, la b yiibã na n lebga yĩng a yembre.”—Efɛ. 5:31, 33.