D lub tagsa buud fãa sẽn gɩdgd nebã tɩ b ra bãng Wẽnnaamã!

1. Bõe la tʋm-tʋmd a Poll yeel sẽn da paam-b vʋʋsem sõngã zaeebã?

TƲM-TƲMD a Poll ra yeela pipi kiris-nebã yaa: “Bɩ y ra le bas tɩ dũni-kãngã neb kɩt tɩ y yɩ wa bãmb ye.” (Rom. 12:2) Bõe yĩng t’a yeel-b woto vẽeneg-vẽenega, tɩ yaool n da yaa neb sẽn dɩk b mens n kõ Wẽnnaam, la sẽn da paam a vʋʋsem sõngã zaeebo?—Rom. 1:7.

2-3. Wãn to la a Sʋɩtãan maand sẽn na yɩl tɩ d bas a Zeova, la wãn to la d tõe n lub bũmb nins “sẽn vigl kãn-kãe” tõnd yamẽ wã?

² A Poll ra maanda yɩɩre, bala, wõnda kiris-neb kẽer ra basame t’a Sʋɩtãan dũniyã nebã tagsa la b bãngrã belg-ba. (Efɛ. 4:17-19) A buud tõe n paama tõnd me. A Sʋɩtãan sẽn yaa dũni-kãnga wẽnnaamã tũnugda ne sɩlem buud toor-toore, n maand a sẽn tõe fãa n dat tɩ d bas a Zeova. Wala makre, sẽn pak tõndã sã n yaa d paam yʋʋre, a tõe n bẽda ne rẽ n kɩt tɩ d bas a Zeova. A leb n tõe n tũnuga ne d sẽn paam wubr ningã, d buudã neb minimdu, wall d sẽn zãms bũmb nins lekollẽ wã, n kɩt tɩ d wa tagsd wa yẽ.

³ Rẽ yĩnga, d tõe n luba baa bũmb nins “sẽn vigl kãn-kãe” tõnd yamẽ wã bɩ? (2 Kor. 10:4) Ad a Poll sẽn yeele: “Tõnd lubda tagsa la bũmb ning fãa sẽn gɩdgd nebã tɩ b ra bãng Wẽnnaamã, la d tõogdẽ tɩ tagsa buud fãa sakd Kiristã.” (2 Kor. 10:5) Hakɩɩka, ne a Zeova sõngre, d tõe n basa tags-kɛg buud fãa. Wa tɩɩm sẽn tõe n kʋ zẽnem tɩ pa le tõe n maan ned bũmbã, Wẽnnaam Gomdã tõeeme t’a Sʋɩtãan dũniyã yamã sẽn yaa wa zẽnemã ra tall pãng tõnd zug ye.

“BƖ Y MANEG Y YAMÔ

4. Neb wʋsg sẽn wa n bãng Biiblã sẽn yetã, yɩɩ tɩlɛ tɩ b maan bõe?

⁴ Tẽeg-y sẽn yɩ tɩlɛ tɩ y toeem y zʋg la y manesem ninsi, y sẽn wa n bãng Biiblã sẽn yetã, n yãk yam n na n tũ a Zeova wã. Wala makre, yɩɩ tɩlɛ tɩ wʋsg bas tʋʋm-wẽns b sẽn da tʋmde. (1 Kor. 6:9-11) D sũur nooma wʋsg ne a Zeova, a sẽn sõng-d tɩ d tõog n bas tʋʋm-wẽnsã.

5. Rom dãmb 12:2 wilgda bũmb a yiib d sẽn segd n maane. Yaa bõe ne bõe?

⁵ La d pa segd n tags tɩ masã wã, toeengã saame ye. Baa d sẽn tõog n bas yel-wẽn-kãsemsã d sẽn da maand nand tɩ d lebg a Zeova Kaset soabã, yaa tɩlɛ tɩ d ket n gũusdẽ, tɩ bũmb da wa kɩt tɩ d le maan wa pĩndã ye. Bõe n na n sõng-do? Ad a Poll sẽn yeele: “Bɩ y ra le bas tɩ dũni-kãngã neb kɩt tɩ y yɩ wa bãmb ye. Bɩ y maneg y yamã tɩ kɩt tɩ y toeeme.” (Rom. 12:2) Dẽnd bũmb a yiib la d segd n maane. Pipi, d pa segd n ‘le bas tɩ dũni-kãngã neb kɩt tɩ d yɩ wa bãmb’ ye. Yiib-n-soaba, d segd n manega d yamã, tɩ rẽ ‘kɩt tɩ d toeeme.’

6. A Zeezi goam nins sẽn be Matiye 12:43-45 wã wilgda tõnd bõe?

⁶ Pa f sẽn na n toeem zugẽ-zugẽ bala, tɩ nebã neẽ wã yell la a Poll sẽn gomdã ye. Toeengã segd n yɩɩ zãng-zãnga, rat n yeel tɩ d segd n toeema d sẽn yaa ned ning d sũurã pʋgẽ wã. (Ges-y zĩ-gũbrã gom-zug sẽn yet tɩ: “D sɩd toeemame bɩ, bɩ d maanda wa d toeemame?”) D segd n manega d yamã zãnga, rat n yeel tɩ d tagsa wã, d tʋlsmã, la d yel-manesmã. Rẽ n so tɩ d ned kam fãa segd n sok a meng yaa: ‘Mam toeengã yaa zugẽ-zugẽ bɩ, bɩ m sɩd toeemda m sẽn yaa ned ning m sũurã pʋgẽ wã?’ A Zeezi goam nins sẽn be Matiye 12:43-45 wã wilgda d sẽn segd n maanã. (Karm-y-yã.) Wilgda tõnd bũmb sẽn tar yõod wʋsgo: D sã n bas tags-kɛgã bala, pa sek ye. D segd n ledg-b-la ne tagsa sẽn zems ne Wẽnnaam raabã.

Y SEGD N “KET N MANEGDA Y TAGSA WÃ TƖ LEBGD PAALSE”

7. Wãn to la d tõe n toeem d sẽn yaa ned ning d sũurã pʋgẽ wã?

⁷ D tõe n toeema d sẽn yaa ned ning d sũurã pʋgẽ wã bɩ? N-ye! Ad Wẽnnaam Gomdã sẽn yete: “Yãmb segd n ket n manegda y tagsa wã tɩ lebgd paalse, la y segd n yeelga nin-paalgã sẽn naan tɩ zems Wẽnnaam daabã, tɩrlem la kɩs-sɩd meng-meng pʋgẽ.” (Efɛ. 4:23, 24) Vẽenega, d tõe n sɩd toeema d sẽn yaa ned ning d sũurã pʋgẽ wã! La pa nana ye. Bala, d segd n basa tags-kɛgã la tʋʋm-wẽnsã, la d modg me n manegd d “tagsa wã tɩ lebgd paalse,” rat n yeel tɩ n toeem d tagsa wã, d tʋlsmã, la d yel-manesmã. La woto pa vugr yell ye.

8-9. Wãn to la saam-biig a ye kibar wilgd tɩ yaa tɩlɛ tɩ d toeem d sẽn yaa ned ning d sũurã pʋgẽ wã?

⁸ D gom saam-biig a ye yelle. Nand t’a lebg a Zeova Kaset soabã, a ra yaa nen-kɛglem soaba. A ra yũuda rãam wʋsgo, la a nong zaba. La a wa n basa rẽ fãa n dɩk a meng n kõ a Zeova n deeg lisgu, hal t’a sakã neb pẽg a Zeova Kaset rãmbã tũudmã. La a lisgã poor bilfu, a paama makr a sẽn da pa tẽede. Daar a ye zaabre, rao sẽn yũ rãam n su n wa a zakẽ wã n bao-a zabre. Saam-biigã tõoga a meng sɩngrẽ wã. La raoã wa n gom n paooga a Zeova, tɩ saam-biigã sũurã puugi, t’a pa le tõog a meng ye. A yiime n yõk raoã n pãbe. Bõe yĩng t’a pa tõog a sũurã? Yaa sɩd tɩ Biiblã zãmsgã ra sõng-a lame t’a toeeme, n pa le yaa nen-kɛglem soab ye. La a ra nan pa tõog n maneg a tagsa wã, rat n yeel tɩ n toeem a sẽn yaa ned ning a sũurã pʋgẽ wã ye.

⁹ La saam-biigã pa koms raood ye. (Yel. 24:16) Ne kãsem-dãmbã sõngre, a kell n modgame n na n toeeme. A wa n tol n lebga kãsem-soaba. Daar a ye zaabre, Rĩungã roog noore, a paama makr ning buud a sẽn da paam yʋʋm a wãn sẽn loogã. Rao a ye n yũ rãam n su, n wa n na n pãb kãsem-soab a ye. D saam-biigã manesem yɩɩ wãna? A sika a menga, n maag a yĩng n gom ne raoã, n sigs a sũurã la a sõng-a t’a ta a zakẽ wã. Bõe yĩng tɩ saam-biigã tõog a meng so-kãnga? A toeema a sẽn yaa ned ning a sũurã pʋgẽ wã. A lebga sik-m-meng soaba, la ned sẽn sɩd nong laafɩ, tɩ rẽ waoogd a Zeova yʋʋrã.

10. Sẽn na yɩl n toeem d sẽn yaa ned ning d sũurã pʋgẽ wã, bõe n yaa tɩlɛ?

¹⁰ Pa zĩig pʋgẽ la ned tõe n toeem a woto ye. Tõe n yɩɩ tɩlɛ tɩ d ‘mao d pãng tɛk’ yʋʋm wʋsgo. (2 Pɩy. 1:5) Pa f sẽn tũ a Zeova n kaoos yĩng bal la f tõogd n toeem a woto ye. Yaa tɩlɛ tɩ d maan d sẽn tõe fãa n toeem d sẽn yaa ned ning d sũurã pʋgẽ wã. Bɩ d ges bũmb a wãn d sẽn tõe n maan tɩ sõng-do.

D MAANDA WÃN N MANEG D TAGSA WÃ?

11. Wãn to la pʋʋsgã sõngd tõnd tɩ d toeem d sẽn yaa ned ning d sũurã pʋgẽ wã?

¹¹ Ad bũmb ning d sẽn segd n maan pipi: Yaa pʋʋsgã. D segd n pʋʋsa wa yɩɩn-gʋlsdã. Ad a sẽn yeel a pʋʋsgã pʋgẽ: “Wẽnnaam, kõ-y maam sũur sẽn yaa yɩlemde, la y palem m yamã t’a zemse.” (Yɩɩn. 51:12) D tog n sak n deegame tɩ d segd n toeema d sẽn yaa ned ning d sũurã pʋgẽ wã, la tɩ d segd n kota a Zeova t’a sõng-do. Bõe yĩng tɩ d tõe n kɩs sɩd t’a Zeova na n sõng-d lame tɩ d toeeme? A sẽn pʋlem Israyɛll nebã sẽn da yaa sũ-kɛgems rãmbã bũmb ning a Ezekɩyɛll wakatẽ wã tõe n kenga d raoodo. A yeelame t’a na n kõ-b-la “sũur a yembre,” la a kõ-b “yam-paalga,” la a kõ-b “sũur sẽn yaa neongo,” rat n yeel tɩ sũur sẽn na n kɩt tɩ b sakd a noyã. (Eze. 11:19) A Zeova ra tʋll n sõnga Israyɛll nebã tɩ b toeeme. A tʋll n sõnga tõnd me woto.

12-13. a) Wa Yɩɩn-sõamyã 119:59 wã sẽn wilgdã, d segd n bʋgsa neere, n bao n bãng bõe? b) Bõe la d segd n sok d menga?

¹² Bʋgsgã yaa bũmb a yiib-n-soab sẽn yaa tɩlɛ. Daar fãa, d sã n wa karemd Wẽnnaam Gomdã, d segd n maaga d yĩng n bʋgs n ges d sã n pa tar tagsa la d yel-manesem d sẽn tog n toeeme. (Karm-y Yɩɩn-sõamyã 119:59; Ebre. 4:12; Zak 1:25) D segd n gũus n gesa d sã n pa tara tagsa bɩ yel-manesem sẽn wilgd tɩ d sakda dũniyã yamã. D sã n bãng d pãn-komsem ninga, d segd n sak n deegame, la d maan d sẽn tõe fãa n demse.

¹³ Wala makre, sok-y y meng yaa: ‘Rẽ yĩnga, m pa maand sũ-kiir baa yaa bilf sɩda?’ (1 Pɩy. 2:1) ‘M tagsdame tɩ m yɩɩda m taabã, m sẽn yit zĩig ningã yĩnga, m sẽn karem n ta zĩig ningã, wall m paoong yĩng bɩ?’ (Yel. 16:5) ‘M tagsdame tɩ m sãoo buud a taabã nebã, wall neb nins sẽn pa tar bũmb nins mam sẽn tarã bɩ?’ (Zak 2:2-4) ‘Mam yam bee bũmb nins sẽn be a Sʋɩtãan dũniyã pʋgẽ wã bɩ?’ (1 Zã 2:15-17) ‘Mam nonga filim-dãmb la reem a taab sẽn wilgd nen-kɛglem wall raglem tʋʋm bɩ?’ (Yɩɩn. 97:10; 101:3; Amoos 5:15) D sã n sok d meng woto, tõe n sõngame tɩ d bãng d pãn-komsem d sẽn segd n demse. D sã n tõog n bas tagsa la yel-manesem nins sẽn “vigl kãn-kãe” d sũurẽ wã, d na n nooga d saasẽ Ba wã sũuri.—Yɩɩn. 19:15.

14. Bõe yĩng tɩ yaa tɩlɛ tɩ d bao tũud-n-taar sẽn na n maneg-do?

¹⁴ Ad bũmb a tãab-n-soab sẽn yaa tɩlɛ me: D bao tũud-n-taar sẽn na n maneg-do. D mi tɩ d pa mi me, d wae n dɩkda d sẽn nong n be ne b rãmbã zʋgdo. (Yel. 13:20) Tʋʋmã zĩisẽ wall lekoll-dãmbẽ wã, d bee ne neb sẽn tar manesem sẽn pa sõngd tõnd tɩ d tall tagsa sẽn zems ne Wẽnnaam daabã. La d tigissã sasa, d paamd n bee ne neb sẽn tar manesem-sõngo, tɩ b tũud-n-taar nafd tõnd hal sõma. Yaa be la d paamd raood kengr la sõngre, n tõe n “bɩɩs nonglem la d tʋm tʋʋm-sõma.”—Ebre. 10:24, 25, notã.

YALS-Y “KÃN-KÃE TẼEBÃ PƲGẼ”

15-16. Wãn to la a Sʋɩtãan maand n dat tɩ d wa tagsd wa yẽ?

¹⁵ La d tẽeg t’a Sʋɩtãan maanda a sẽn tõe fãa, n dat tɩ d wa tagsd wa yẽ. A tũnugda ne zãmsg buud toor-toor n na n kɩt tɩ d tagsa wã ra zems ne Wẽnnaam Gomdã sẽn yetã ye.

¹⁶ Edɛn zẽedã zĩigẽ, a ra soka a Awa yaa: ‘Sɩd-sɩdã, rẽ yĩnga, Wẽnnaam yeela yãmb tɩ y . . . ?’ (Sɩng. 3:1) A ket n sokda sogsg a woto. Dũni-kãngã sẽn yaa a Sʋɩtãan n so wã pʋgẽ, d wae n wʋmda neb sẽn sokd tɩ: ‘Sɩd-sɩdã, Wẽnnaam gɩdgame tɩ pag ne pag wall rao ne rao ra kẽ kãadem sɩda? Sɩd-sɩdã, Wẽnnaam pa rat tɩ y maan Nowɛll la rogem tẽegr kibsa? Sɩd-sɩdã, yãmb Wẽnnaamã yeelame tɩ y ra sak tɩ b ning-y zɩɩm? Sɩd-sɩdã, Wẽnnaam sẽn yaa nonglem soab na sak n yeel tɩ y ra maan tũud-n-taar ne y neb nins b sẽn yiis tigingã pʋgẽ wã?’

17. Ned sã n sok tõnd bũmb d tũudmã wɛɛngẽ, n na n wa ne sãmbs d yamẽ, bõe la d segd n maane? Kolos rãmb 2:6, 7 wã wilgdame tɩ rẽ yõod yaa bõe?

¹⁷ Yaa tɩlɛ tɩ d kɩs sɩd ne bũmb nins d sẽn tẽedã. Sokr ning leoor sã n pa vẽeneg d yamẽ, tɩ d sĩnd n pa bao a vɩʋʋgo, tõe n wa kɩtame tɩ d maand sãmbs ne d sẽn tẽedã sã n yaa sɩda. Sãmbsã tõe n kɩtame tɩ d wa tar tags-kɛga, tɩ rẽ pʋd n sãam d tẽebã. Woto wã, bõe la d tog n maane? Wẽnnaam Gomdã sagenda tõnd tɩ d maneg d yamã, tɩ rẽ kɩt tɩ d tõog n kɩs sɩd tɩ “Wẽnnaam daabã yaa sõma, tɩ sakda ne bãmba, la tɩ zemsa zãnga.” (Rom. 12:2) D sã n zãmsd Biiblã wakat fãa, na n sõngame tɩ d kɩs sɩd t’a sẽn yetã yaa sɩda. D na n tõog n basa d yam zãng t’a Zeova noyã yaa tɩrse. Rẽ, wa tɩɩg sẽn kɩ yẽg sõma, tõnd me na n yɩɩ neb sẽn kɩ yẽg sõma, n ‘yas kãn-kãe tẽebã pʋgẽ.’—Karm-y Kolos rãmb 2:6, 7.

18. Bõe n na n sõng-do, t’a Sʋɩtãan dũniyã yamã sẽn yaa wa zẽnemã ra maan-d bũmbu?

¹⁸ Ned pa tõe n deeg yãmb zĩig n bɩɩs y tẽebã ye. Rẽ wã, ket-y n manegd-y y tagsa wã tɩ lebgd paalse. Pʋʋsd-y wakat fãa, n kot a Zeova a vʋʋsem sõngã sõngre. Bʋgsd-y neere, n baood wakat fãa n na n bãng y tagsa wã la y tʋlsmã sã n yaa sõma. Bao-y tũud-n-taar sẽn na n maneg-yã, neb sẽn na n sõng-y tɩ y manegd y tagsa wã. Y sã n maand woto fãa, y na n tõog n kogla y menga, t’a Sʋɩtãan dũniyã yamã sẽn yaa wa zẽnemã ra maan-y bũmb ye. Y na n tõogame me n lub “tagsa la bũmb ning fãa sẽn gɩdgd nebã tɩ b ra bãng Wẽnnaamã.”—2 Kor. 10:5.