D moon koe-noogã kibs rãmbã sasa
1 Baa ne Nowɛllã la yʋʋm-paalgã kibs rãmbã sẽn yit ziri tũudmã pʋgẽ wã, neb milyaar la zak sẽn yet tɩ b yaa kiris-neb n maand kibs kãensã yʋʋmd fãa. Neb wʋsg sɩd tẽedame tɩ kibs kãensã tata Wẽnnaam yam. Wãn to la d tõe n moon koe-noogã tɩ kẽ nin-kãensã sũy sõma Nowɛllã la yʋʋm-paalgã sasa?
2 D waoogd nebã: Kibs rãmbã yĩngã, saam-biis wʋsg pa kẽnd tʋʋm ye. Rẽ n so tɩ tigingã kãsem dãmbã sigl koɛɛgã mooneg kibs rãmbã sasa. Sẽn mik tɩ nebã pa kẽed gãag pĩnd kibs rãmbã sasa wã yĩnga, d segd n yãka wakat ning d sẽn na n sɩng zak-zak moonegã tɩ zemse.
3 D sã n wa moond koɛɛgã, d tõe n mika nebã sẽn be ne sãamba, wall b be rɩɩb seglg zugu. D sẽn mi tɩ yaa sasa sẽn tar yõod wʋsg ne-bã yĩnga, yɩta sõma tɩ d togs-b koɛɛg ning d sẽn dat n taasã koɛɛg-koɛɛga, la vẽenega. D sã n wilgdẽ tɩ d waoogd-b lame, na n kɩtame tɩ nindaar bɩ b sak n kelg-d sõma n paase.
4 D pa maand dũniyã tũudum toɛy-toɛyã kibs rãmba, d pa pʋʋsd nebã ne b taab me ye. Woto yĩnga, d segd n gũusa ne d sẽn deegd b pʋʋsmã to-to wã. D pa segd n wẽ no-koɛɛm ne-b pʋʋsgã zug ye. D tõe n pʋʋs-b-la bark bala. Nebã sã n dat n bãng bũmb ning sẽn kɩt tɩ d pa maand Nowɛllã, d tõe n wilg-b lame tɩ d waoogda a Zezi Kirist, bala yaa woto la b rat tɩ neb nins sẽn waoogd Wẽnnaamã maane. (Zã 5:23) La kibs wʋsg n be n pa waoogd Kiristã, tɩ pa sokd Wẽnnaam. Nebã sã n dat kibay a taab n paase, d tõe n sõsa ne-b Comment raisonner sebrã neng 162-64 la 166 zugu.
5 D sẽn na n sɩng to-to: Sẽn mik tɩ Nowɛllã yaa tũudum yellã yĩngã, yʋʋmdã fãa pʋgẽ, yaa sasa kãng la nebã wʋsg nong n gomd Wẽnnaam yell n yɩɩda. D tõe n tũnuga ne rẽ n sɩng d goamã. Wala makre, d tõe n yeela woto: “Dũniyã gill zugu, neb wʋsg n maand Nowɛllã la yʋʋm-paalgã kibs rãmbã. La yãmb tagsdame tɩ kibs kãensã pẽnegda nebã ne Wẽnnaam bɩ?” A sã n yeel tɩ kibsã maaneg yaa sõma bɩ tɩ pa sõma, d tõe n yeela woto: “Neb wʋsg rat n paama zems-n-taar ne Wẽnnaam, la tõe tɩ b tagsdame tɩ Wẽnnaam zãra ne-b wʋsgo. La Wẽnnaam yaool n datame tɩ d bao-a.” Karm-y Ezai 55:6, 7; Tʋʋma 17:26, 27; bɩ verse a to sẽn zemse. Rẽ poore, wilg-y sɛb nins d sẽn na n kãab nebã kiuugã pʋgẽ wã, (Zãmaan fãa nin-kãseng sẽn ka to, bɩ Approchez-vous de Jéhovah), la seb-kãensã sã n ka be, y tõe n wilga Biiblã yetame sebrã.
6 D le tõe n yeela woto: “Nowɛllã sasa, d nong n wʋmda nebã sẽn pʋʋsd taab ne b taab n pʋlemd taab sũ-noog la laafɩ. Yãmb tagsdame tɩ Wẽnnaam na n kɩtame tɩ laafɩ zĩnd tẽng zug tõnd wakatã sɩda?” Rẽ poore d tõe n kell n wilga a soabã tɩ Wẽnnaam Gomdã sẽn togs tɩ “Laafɩ-naab” n watã yaa a Zezi Kirist. (Ezai 9:5, 6) A sẽn yaa Wẽnnaam Rĩungã naabã, ka la bilfu, a na n tʋma tʋʋm-kãseng n kɩt tɩ laafɩ zĩnd tẽngã zugu.—Dan. 2:44; Wil. 21:3-5.
7 Baa ne neb wʋsg sẽn noogd b yõy Nowɛllã la yʋʋm-paalgã kibs sasa n pa rat n kelg Rĩungã koe-noogã, a Zeova na n ninga d modgrã bark tɩ d yã neb nins sẽn baood sɩdã ne b sũy fãa wã. Bala “yaa neb a woto la Wẽnnaam baood tɩ b waoog [yẽ],” la a na n sõng-b lame tɩ b wa a siglgã pʋgẽ.—Zã 4:23, 24.