Tall-y tagsg sẽn kɩls tɩ zems ordinatɛɛr dãmbã rɩk n tʋm wɛɛngẽ

¹ Tʋm-tʋmd a Poll sagla pipi yʋʋm kob-gĩndẽ kiris-nebã tɩ b ra bas tɩ b yam yuus ye, tɩ bala “wakat [sẽn ketã, NW ] lebga bilfu.” (1 Kor. 7:29) Zamaan kãngã saab sẽn kolgã yĩnga, segdame tɩ d ‘reng n bao Wẽnnaam soolem la a tɩrlem,’ la d ‘ra bas tɩ weerã sãam zaalem ye’! Sẽkã tara yõod wʋsgo.—Mat. 6:33; Ef. 5:15, 16, Kãab-paalgã Koe-noogo.

² B pẽgda tɛknolozi wã a sẽn sõngd tɩ d ra sãam sẽkã yĩnga. Wala makre, f sã n dĩ ordinatɛɛr butõ a ye bala, zĩig pʋgẽ f tõe n paama kɩbay sõor sẽn pa tõe n bãng n bilgi. Naoor wʋsgo ordinatɛɛr dãmbã tõeeme n maan bũmb segõnd a wãn pʋgẽ, tɩ sã n yaa ne manesem a taab bɩ na n dɩk lɛɛr dãmb bɩ semen dãmb menga. B sã n dɩk-b n tʋm sõma, b yaa tʋʋm-teed sẽn tar yõod wʋsgo.

³ Rẽ yĩnga a sɩd kɩtdame tɩ f ra sãam sẽk bɩ?: Ned ka tõe n paam ordinatɛɛr t’a pa reng n yiis ligd la a rɩk sẽk ye. Rɩllame tɩ f rɩk sẽk wʋsg n zãms f sẽn na n tũnug ne ordinatɛɛrã to-to n maan tʋʋm kẽere. Sẽn paase, ned ning sẽn lebg ordinatɛɛr yamb na n sãama sẽk a sẽn da tõe n dɩk n tʋm zĩig a to tɩ tall yõod n yɩɩge. D segd n talla tagsg sẽn kɩls tɩ zemse, n gãd tʋm-tʋmd a Poll keoogrã d yamẽ n kẽn ‘wa yam dãmba, n da bas tɩ weerã sãamd zaalem ye.’—Ges-y 1 Korẽnt dãmba 7:31.

⁴ Neb kẽer sẽn dat n maan neer yĩnga, b maana porgarm rãmb sẽn na yɩl n ningd kɩbay sẽn be tigingã dosie rãmb pʋsẽ masĩna pʋgẽ. Yaa sɩd tɩ bee ne ned kam fãa t’a yãk a sẽn na n tʋm ne a ordinatɛɛrã to-to. Baasg zãnga, b pa segd n gʋls tigingã yɛl ordinatɛɛr pʋgẽ, tɩ mik b yaool n da kõo formilɛɛr dãmb rẽ yĩng ye, bala kamb bɩ ned a to sẽn da pa tar sor n na n yã rẽ tõe n paam n gesame. Tigingã dosie gilli (ligdã gɛɛla sɛba, koe-moondbã kart dãmba, la sẽn paase) segd n bee formilɛɛr nins Sosiete wã sẽn kɩsã pʋsẽ, la pa ordinatɛɛr pʋgẽ ye. B sã n maan woto tigingã yɛl nins sẽn yaa yel-solgdsã paamda koglgo.

⁵ Yel-gɛtb nins sẽn yãkd neb tɩ b kõ sõss Wẽnnaam tʋʋmdã lekollẽ la Tʋʋmdã Tigisgẽ wã segd n yɩɩ tags-tɩ-bɩ rãmba. B segd n ninga gom-zugã sẽn ya a soab b yamẽ. Wala makre sã n yaa ne lekollã, pa neba fãa n tõe n wɛgs gom-zut kẽer ye. B segd n gesa sõsgã bõn-datla, la karen-biigã tõog sẽn taẽ zĩig ningã, la sõsgã halhaal meng sẽn yaa to-to n yaool n kõ sõasgã. B ka segd n bas ordinatɛɛr t’a yãk sõsdbã ye.

⁶ Saam-biig sẽn na n kõ sõasg tigingã tigissẽ pa segd n tik sõsg ned a to sẽn zoe n segl zugu, sẽn yɩɩd fãa sã n yaa ned a sẽn ka mi, tɩ bala zoe n bee ordinatɛɛr pʋgẽ tɩ na n sõng-a t’a ra sãam a sẽk ye. Kiris-ned sẽn bɩ pa na n sak n segl Biibl sõasg n ning ordinatɛɛr pʋgẽ tɩ neb a taab tõe n paam ye. Baasgo, saam-biig tõe n tũnuga ne Watchtower Library CD-ROM ne ordinatɛɛr n maan vaeesg sẽn tar yõod wakat koɛɛg pʋgẽ.

⁷ Sã n yaa ne maan ordinatɛɛr porgarm, n gʋls sɛb yʋy bɩ n segl sõss Tʋʋmdã Tigisg yĩng bɩ Wẽnnaam Tʋʋmdã Lekoll yĩng ne ordinatɛɛr teed bɩ yɛl a taab n pʋɩt saam-biisã, yaa sõma n yɩɩd tɩ ned fãa segl a sõasg tɩ yɛl nins sẽn pak tigingã bee a yamẽ. (1 Tɩm. 4:13, 15) D ka segd abada n tũnug ne d sẽn tar lagem-n-taar ne tigingã n bao ligd ye.

⁸ La yaa wãn to yẽ ne yiis verse rãmb nins b sẽn tũnug ne Gũusg Gasgã bɩ Sebrã Zãmsgẽ wã ordinatɛɛrẽ seb-vãad zut n pʋɩ nebã? Be neere, yaa sõma n yɩɩd tɩ koe-moond fãa gʋls a meng not rãmb Biiblã la sɛb nins b sẽn vaeesdã pʋgẽ. Neb nins sẽn tũnugd ne sɛb a woto buudã tigissẽ wã pa na n ye rat n lak Biiblã n gẽes verse rãmb yɛs ye. La verse rãmbã gẽesg Biiblã pʋgẽ Biibl zãmsg sasa bɩ tigingã tigissẽ yaool n yaa zãmsg b sẽn kõt tõnd sẽn na yɩl tɩ d tõog n tʋm ne Biiblã sõama koe-moonegã sasa. Naoor wʋsgo, sã n yaa verse wok la b na n karme, b sã n kell n karm-a Biiblã pʋgẽ karengã tallda pãng n yɩɩda, sẽn yɩɩd fãa b sã n yeela kɛlgdbã tɩ b tũ karengã b mens Biibl dãmbẽ.

⁹ Bẽd-kãsems a taaba: Wala b sẽn wilg yʋʋmd 1993, sa-sik kiuug pipi raar Gũusg Gasgã (ne farende), seb-neng 17 pʋgẽ wã, f sã n tar ordinatɛɛr sẽn tɩ tõk ne ordinatɛɛr dãmb a taab sẽn kõt kɩbaya, tõe n sɩd waa ne zu-loees tẽebã wɛɛngẽ. Wala nin-wẽng sẽn tõe n kẽes viris sẽn na yɩl n sãam kɩbay f sẽn ning ordinatɛɛr pʋgẽ wã, woto me, sɩdã-kɩɩsdba, tũudum taoor dãmb bɩ neb sẽn dat n sãam b taab vɩɩm tõeeme n tũnug ne manesem kãngã n yelg tags-wẽnse. Sã n pa b gũusd n geta masĩn dãmb sẽn tõk ne taab kɩbay sõma, (baa b sã n yeelame tɩ ya “A Zeova Kaset rãmbã yĩng bala”), tɩ ya a Zeova sõgen dãmb sẽn bɩ tẽebã wɛɛngẽ wã bal n tõe n tʋm ne, kiris-ned tõeeme n wa tɩ kẽ “tũud-n-ta-wẽns” sʋka. (1 Kor. 15:33) Sosiete wã paama kɩbay sẽn wilgd tɩ b tũnuga ne ordinatɛɛr dãmb sẽn tõk ne taab a woto n wẽ no-koɛɛm tẽebã yɛl zutu, n kõt sagl-wẽnse, n yelgd gom-zaal la ziri, n ningd tags-kɛg neb yamẽ, n maand sʋgsg sẽn kẽesd neb sãmb-sãmb pʋgẽ la sẽn sãamd neb kẽer tẽebo, la b yelgd b mens tagsg Biiblã võor wʋmb zugu. F sã n ges kɩbay kẽer zugẽ-zugẽ yaa wa b tara yamleoog la b kõt zãmsgo, la b yaool n tara zẽnem tẽngre. Kiris-nebã teega ‘tʋm-tʋmd sẽn tũud sɩd la sẽn tar yamã’ t’a kõ-b tẽeba rɩɩb la vẽnegr wakat sẽn zems pʋgẽ. (Ges-y yʋʋmd 1994, sẽoog kiuug pipi raar Gũusg Gasgã (farende), seb-neng a 9-11 pʋgẽ.) Kiris-ned fãa tara zɩɩb kãseng sẽn ya a kogl a tẽebã ne bũmb ning fãa sẽn tõe n sãam-a wã. Rẽnd a segd n bãnga neb nins a sẽn maand tũud-n-taar ne wã wakat fãa.—Mat. 24:45-47; 2 Zã 10, 11.

¹⁰ Gũusg Gasgã sõs-kãngã leb n wilgame tɩ b segd n tũu noy nins sẽn tɩ loe ne porgarm dãmbã yiisdb dʋrwa rãmba. Ãnterpiriiz rãmbã wʋsg sẽn yɩɩd sẽn yiisd ordinatɛɛr porgarm dãmb n koosdẽ wã maandame tɩ laloa wã taoor bɩ yaa bãmb n so dʋrwa rãmbã, la b kõt rɩk-n-tʋm dʋrwa rãmb sɛb sẽn wilgd b sẽn tõe n tʋm ne b porgarm dãmbã tɩ zems ne noyã. Rɩk-n-tʋm dʋrwa seb-kãens nong n wilgdame tɩ sor pa kõ tɩ b lebg porgarmã n kõ ned a to ye. Baa zĩig fãa laloa sẽn tɩ loe ne sɛb yiisgã gɩdga rẽ maanego. Neb wʋsg sẽn yaa rat-tɩ-loog rãmb ka zoet yãnd ne noyã kɩɩsg ye. La kiris-nebã ka reemd ne laloa yɛl tũub ye, n kõt bũmb nins a Sezaar sẽn so wã a Sezaare. (Mat. 22:21; Rom 13:1)— Ges-y Yãmb sʋgsgã leoorã sẽn be yʋʋmd 2001, wao-fugdg kiuug rasem 15 Gũusg Gasgã (ne farende), seb-neng 28-29 pʋgẽ.

¹¹ Ãnterpiriiz-bɛd kẽer koosda ordinatɛɛr dãmb sẽn zoe n tar porgarm dãmb b sẽn tar rɩk-n-tʋm dʋrwa rãmba. Baasgo, ãnterpiriiz kẽer pa kõt rɩk-n-tʋm dʋrwa rãmb ye, tɩ bala porgarm dãmb nins b sẽn ning ordinatɛɛrã pʋgẽ wã yaa sẽn zu. Rẽnd neb nins sẽn daad te-kãensã buudã kɩɩsda laloa wã. Rẽ wɛɛngẽ kiris-nebã pa segd n ning bɩ b yãk kɩbay sẽn tar rɩk-n-tʋm dʋrwa rãmba (wala makre Sosiete wã sɛbã) ordinatɛɛr dãmb sẽn tõk ne taab pʋsẽ, tɩ yaool n yaa kɩbay b sẽn yiis b rãmbã nengẽ n ka paam sor sẽn zems ne laloa wã ye.—Heb. 13:18.

¹² D segd n maka tɛknolozi wã rɩk-n-tʋm yõod sẽn ta zĩig ningã ne a sẽn tõe n wa ne yɛl ninsã. Wala makre, d tõe n dɩɩ televiziõ wã yõodo, la zu-loe-kãsems nins a sẽn wat ne ninsaalbã zutã kɩtame tɩ dũniyã neb kẽer wilg tɩ yaa bũmb sẽn lebg yel-pakre. Ordinatɛɛr dãmb sẽn tõk ne taabã piuugda dũniyã gill zugu, la b tõe n talla kɩbay sẽn tar yõod wʋsg n wa ne y yir bɩ y tʋʋm zĩisẽ. Zamaan kãngã pʋgẽ yɛlã sẽn kẽngd tʋʋll-tʋʋll woto wã, b sõngda ãnterpiriiz rãmb la sigls ne neb wʋsgo, tɩ b tõe n tũ b afɛɛr dãmb naoa. La sasa kãng me, ordinatɛɛr rãmbã sẽn tõk ne taabã leb n pida ne yɛl wala yoob yɛla, goam sẽn wat ne kisgr la welsgo, la b tar kɩbay wʋsg sẽn wilgd tʋʋm-dẽgd la tʋʋm-wẽns sẽn maand to-to.

¹³ Yel-kãsems wʋsg n be tɩ rẽ yĩng bɩ kiris-ned segd n tall tagsg sẽn kɩls tɩ zems ordinatɛɛr dãmbã rɩk-n-tʋm zugu. Neb kẽer paama Watchtower Library CD-ROM, sẽn tar yɛl a taab sẽn tõe n sõng ned t’a maan vaeesgo. Ned ning sẽn dat n tũnug ne masã tɛknolozi wã teed n pids tʋʋm-sõng na n sak n deegame t’a sɩd tara yõodo, la baasg zãnga a segd n maana gũusg n kogl a meng la neb a taabã ne zĩig ning a sẽn yaẽ wẽngã. D segd n talla kɩls-tɩ-zemse, tɩ baa tɛknolozi rɩk-n-tʋm ning sẽn yaa sõma wã ra wa rɩ sẽk ning d sẽn dɩk n kõ Wẽnnaamã wʋsg tɩ looge, bɩ a ra wa tiis tõnd d tʋʋma la d pipi bõn-datɩ wã pidsg pʋsẽ ye.—Mat. 6:22; 28:19, 20.