D gũus ne ẽntɛrnetã bẽdse—Pipi babgo
1 A Zeova nin-buiidã tara lagem-n-taar sẽn yaa sõma ne taaba. B nong n togsda taab yɛl b sẽn vɩɩmd b koe-moonegã pʋgẽ la b kelgd kibay sẽn yit dũniyã gill zug n tar loees ne bãmb la Rĩungã tʋʋmde. B tʋll n paama kiba-zẽng fãa b saam-biisã zutu. Wala makre, b tẽngã sã n gudgame, pa rẽ bɩ sabab rãmb a taab sã n paam-b lame, la b tʋll n bãng b sẽn tõe n sõng-b to-to. Woto fãa wilgdame tɩ d yaa saam-biis sẽn sɩd tar zems-n-taar tɩ nonglem be d sʋka.—Zã 13:34, 35.
2 Rũndã-rũndã, yɛl nins sẽn maand dũniyã zugã kibay tat-d-la tao-tao. Radio rãmbã la televiziõ wã taasda kibay toɛy-toɛy zĩig zãnga. Telefõnnã me kɩtame tɩ d sẽn beẽ fãa, d tõe n taas wall d paam neb sẽn be zĩis a taab kibay zĩig pʋgẽ. Kibayã taasg wɛɛngẽ, bõn-sãang sẽn piuugd dũniyã zug n debd yaa ẽntɛrnetã—Ges-y Réveillez-vous! yʋʋmd 1997, sẽoog kiuug rasem 22.
3 Telefõnnã yiib tɛka, ned kam fãa tõe n taasame bɩ a paam kibay dũniyã gill zug tao-tao. La baa ne telefõnnã sẽn tar yõodã, d segd n gũusa ne d sẽn tar-a n tʋmd to-to wã. Bala a tõe n kɩtame tɩ d tall tũud-n-ta-wẽnse, t’a tall-tʋm-tɩ-loogã me tõe n sãam ligdi. Radio wã la televiziõ wã yaa sõma nin-buiidã zãmsg yĩnga. La zu-bʋko, b zãmsg wʋsg yaa wẽnse, tɩ b kelgr sãamd sẽka. Woto yĩnga, yaa yam bũmb tɩ d tũusd bũmb nins d sẽn kelgd radio wã pʋgã bɩ d sẽn get televiziõ n wã.
4 Ẽntɛrnetã maasem yĩnga, f tõe n sõsa ne neb milyõ rãmb dũniyã gill zug n pa yiis ligd wʋsgo, la f paam kibay ka-tɛka. (Réveillez-vous! yʋʋmd 1998, yʋʋm-vẽkr kiuug rasem a 8.) La f sã n tʋm ne ẽntɛrnetã yaare, a tõe n sãama f tẽeb la f vɩɩm manesem. Wãn-wãna?
5 Neb wʋsg sũy sãamda b sẽn ne tɩ ẽntɛrnetã pʋgẽ, b sẽn wilgda nebã b sẽn tõe n maan bug-raad la bõmb rãmb to-to wã. Luzin dãmb taoor dãmb n yẽgemd ne b tʋm-tʋmdba, b sẽn sãamd sẽk wʋsg ne ẽntɛrnetã yĩnga. Tõnd sɛbã pʋsẽ, d zoe n wilga vẽeneg tɩ ẽntɛrnetã tõe n sãama ned tẽebo. Ẽntɛrnetã zĩis wʋsgo, b wilgda nen-kɛglem tʋʋm la yoob tɩ rẽ fãa pa zems ne kiris-ned ye. (Yɩɩl 119:37) Yel-kãens toor sẽn ka be, ẽntɛrnetã tara bẽdg a ye a Zeova Kaset rãmbã sẽn segd n gũus ne n yɩɩda. Yaa bʋgo?
6 Rẽ yĩnga y na n sakame n deeg sãan n yir n pa reng n bao n bãng a sẽn yaa ned ning sɩda? La y sã n pa tõog n bãng sãan-kãnga sẽn yaa ned ninga, y manesem yɩta wãna? Y na n sak n basa y kambã b yeyn-yeyn ne-a sɩda? Ẽntɛrnetã tõe n yɩɩ wa sãan y sẽn pa mi.
7 Ne ẽntɛrnetã maasem, d tõe n toola ned d sẽn pa mi lɛtre, bɩ ned tõnd sẽn pa mi tõe n tool-d-la lɛtre. Ne ẽntɛrnetã maasem d leb n tõe n sõsa ne neb d sẽn pa mi. D sõsd-n-taasã tõe n yeel-d lame tɩ b yaa a Zeova Kaset rãmba, la naoor wʋsgo, yaa ziri. Ned tõe n yeelame t’a yaa bi-bɩɩg tɩ yaool n pa sɩd ye. Nina me tõe n yagame t’a yaa pag wall raoa.
8 Kibar ning b sẽn taas-y-yã tõe n wõnda yɛl b sẽn vɩɩmde, wall a gomd tõnd sẽn tẽed bũmb ninsã yelle. Yaa kibar b sẽn taas neb tɩ b taas-a yãmb tɩ yãmb me na n taas-a neba. Naoor wʋsgo, b pa tõe n bãng a sẽn yiẽ wã takɩ ye, la a tõe n yaa ziri me. A goamã tõe n kɩɩsda sɩd ning sẽn be Biiblã pʋgẽ wã.—2 Tes. 2:1-3.
9 Y sẽn mi bẽd-kãngã tiirã, y sã n tʋmda ne ẽntɛrnetã bɩ y sok y meng sogs-kãensã: ‘Mam tara ẽntɛrnetã n maand bõe? Mam sẽn tʋmd ne-a to-to wã tõe n ninga m tẽebã yell pʋgẽ bɩ? M sẽn tar-a wã, tõe n yɩɩ sabab tɩ neb a taab tẽeb sãam bɩ?’
10 D tõe n maka ẽntɛrnetã tall-n-tʋmã ne sor f sẽn togd n debd tẽn-zẽnga, tɩ beenẽ f na n yã la f wʋm yel-sãams wʋsgo. F sã n wa togd sore, f segd n talla yel-manesem sẽn yaa sõma la f gũusd ne yɛl kẽere. Y segd n maana boto me y sã n wa yãk yam n na n tʋm ne ẽntɛrnetã sẽn yaa tʋʋm-teoog sẽn taasd kibayã tʋʋll-tʋʋllã.