D moon koe-noogã ne kɩs-sɩd sẽn tar pãnga

¹ Yʋʋm kob-yendẽ wã pĩnd-pĩnda, a Zezi tʋma a karen-biisã tɩ b tɩ moon Rĩungã koe-noog la b “maan buudã fãa neb tɩ b yɩ karen-biisi.” (Mat. 24:14; 28:19, 20, NW ) A Zeova Kaset rãmbã ka rɩk no-kãngã n maan deem yell ye. Rẽ n so tɩ yʋʋm kob-gĩnd 20 soabã baasgẽ tɩ tõnd saam-biisã fɩɩge, n tar sẽn yɩɩd karen-biis 5 900 000 sẽn be tẽns 234 pʋsẽ wã. Ad wã sɩd yaa pẽgr sẽn yaa kãseng n kõ tõnd yĩngr Ba wã!

² Masã tõnd sɩnga yʋʋm kob-gĩnd 21 soabã. Ne sɩlem, tõnd Bɛ wã makdame n na n gɩdg tʋʋmd ning tõnd sẽn maand n yɩɩdã sẽn yaa Rĩungã mooneg la karen-biisã maanegã. A tũnugda ne yɛl siglg kãngã weoogr sẽn na yɩl n yuus tõnd yam, n dɩ tõnd sẽkã, la a sãam tõnd pãngã ne zɩɩb la tʋʋm sẽn ka tɩlae. Walla tɩ d bas tɩ yɛl siglg kãngã wilg tõnd bũmb ning sẽn tar yõod n yɩɩd vɩɩmã pʋgẽ wã, d tikda Wẽnnaam Gomdã zug n paam kaset ne bũmb ning sẽn tar yõod n yɩɩdã d meng yĩnga, sẽn yaa a Zeova raabã maanegã. (Rom 12:2) Rẽ rat n yeelame tɩ d sak Gʋlsg Sõamyã sẽn sagl tõnd tɩ d ‘moon koɛɛgã, nana walla toog pʋgẽ la d maan d tʋʋmd neerã.’​—2 Tɩm. 4:​2, 5.

³ D tall kɩs-sɩd sẽn pa vigsdi: Kiris-nebã segd n yaa “neb sẽn bɩ n ta la b tar kɩs-sɩd sẽn pa vigsd ne Wẽnnaam daabã fãa.” (Kol. 4:12, NW ) B bilga gom-biig ning sẽn yaa “kɩs-sɩdã” võor wala “tagsg bɩ tẽeb f sẽn sak n deeg sõma-sõma, bɩ f sẽn kɩs sɩd tɩ yell yaa waaziba.” D sẽn yaa kiris-nebã, d tog n kɩsa sɩd tɩ Wẽnnaam bãngr-goamã pidsg yaa waaziba, la tɩ saabã wakat ta n saame la bala. D tẽebã pãng tog n taa tʋm-tʋmd a Poll rẽndã. Yẽ ra yeelame tɩ koe-noogã, “togs sɩda, a yaa Wẽnnaam pãng fãagr ned ning fãa sẽn tar tẽeb yĩnga.”​—Rom 1:16, NW.

⁴ Sʋɩtãana tũnugda ne nin-wẽnsã la zãmb dãmbã sẽn paam belgrã, sẽn na yɩl tɩ b tall pãn-tusdg neb a taabã zut la b belg-ba. (2 Tɩm. 3:13) B sẽn deng n keoog tõnd ne woto wã, d rɩkda segls sẽn na yɩl n keng kɩs-sɩd ning d sẽn tar tɩ d tara sɩdã. Walla tɩ d bas tɩ vɩɩmã yɩɩr boog tõnd yẽesmã, d ket n ningda Rĩungã yɛl pipi zĩigẽ. (Mat. 6:33, 34) D leb n ka rat me n yĩm tɩ tõnd wakatã yaa yãgb wakate, n tõe n tagsdẽ tɩ yɛl siglg kãngã saabã ket n zãrãme ye. A kolga wʋsg n yɩɩd pĩndã. (1 Pɩɛ. 4:7) Baa d sẽn tõe n tagsdẽ tɩ koe-noogã yelgr ka le tar tʋʋmd wʋsg tẽns kẽer pʋsẽ, b sẽn zoe n kõ kasetã to-to wã yĩngã, d segd n kẽngda taoor ne keoogrã tʋʋmde.​—Eze. 33:​7-9.

⁵ Sʋk-kãseng ning d sẽn segd n maan wakat kãngã sẽn kẽ n bõogã la woto: ‘Mam dɩkda noor ning a Zezi sẽn kõ tɩ d maan karen-biisã n ning m sũurẽ bɩ? Mam sã n wa moond koe-noogã, m wilgda kɩs-sɩd sẽn tar pãng tɩ Rĩungã yaa sɩd bɩ? Mam dɩka sard kãn-kãe n na n kẽes m meng wʋsg wa m sẽn tõe tɛk yõe fãagr tʋʋm kãngã pʋgẽ bɩ?’ D sẽn mi tɩ saabã wakat taa a tɛk la balã, d segd n gũus n gesa d mens la mooneg ne zãmsg kũun tʋʋmdã b sẽn kõ-dã yell neere. Rẽ maaneg n na n fãag tõnd la b rãmb nins sẽn kelgd tõndã. (1 Tɩm. 4:16) Wãn-wãn la tõnd fãa sẽn yaa ministr dãmbã tõe n paas d kɩs-sɩdã pãnga?

⁶ Rɩk-y togs-n-taar ne Tesalonik rãmbã: Tʋm-tʋmd a Poll tẽega tʋʋm toog ning Tesalonik saam-biisã sẽn maanã, n yeel-ba: “Tõnd Koe-noog ka ta yãmb nengẽ ne goam bal ye, la a taa ne pãnga la ne Sɩɩg Sõngo la ne tẽeb wʋsgo [kɩs-sɩd sẽn tar pãnga, NW ]; tɩ bõe, yãmb bãnga tõnd yel-manesem yãmb sʋka, yãmb sõngr yĩnga. La yãmb mens yɩɩ mam togs-n-taase la Zusoaba rẽnda, yãmb deega Wẽnnaam goama tood wʋsg pʋgẽ ne Sɩɩg Sõng sũ-noogo.” (1 Tes. 1:​5, 6) N-ye, a Poll pẽga Tesalonik rãmbã tigingã, bala baa ne b sẽn paam tood wʋsgã b moona ne yẽesem la ne kɩs-sɩd sẽn tar pãnga. Bõe n sõng-b tɩ b tõog n maan dẽ? Zĩis wʋsg wɛɛngẽ, yaa yẽesmã la kɩs-sɩdã b sẽn yã tʋm-tʋmd a Poll la a tʋmd-n-taasã nengẽ wã n tall pãn-tusd-sõng b zutu. Wãn to?

⁷ Tʋm-tʋmd a Poll la a so-togd-n-taasã vɩɩm meng kõta kaset tɩ b ra tara Wẽnnaam vʋʋsmã, la tɩ b sɩd ra tẽeda bũmb ning b sẽn da moondã ne b sũur fãa. Sẽn deng t’a Poll la a Sɩlas wa Tesaloniki, b nams-b-la ne paoogr Filipi. B pãb-b lame n sui roogo, la b balg-b ra-bãongo tɩ ka tũ ne bʋʋd ye. Baa yel-kãngã sẽn yɩ makr n kõ-bã, a ka boog b yẽesmã ne koe-noogã ye. Wẽnnaam kẽesa a toog tɩ b yiis-ba, tɩ rẽ wa ne bãens-roog gũudã ne a zak rãmb tuubgu, la pak sor tɩ saam-bi-kãensã kẽng taoor ne b ministɛɛrã.​—Tʋʋ. 16:19-34.

⁸ Yaa ne Wẽnnaam vʋʋsmã pãng la a Poll wa Tesaloniki. Beenẽ a tʋma sõma sẽn na yɩl n paam a noor dɩɩbo, la a maana a sẽn tõe fãa sẽn na yɩl n zãms Tesalonik rãmbã sɩdã. A ka kong ne tũnug ne segb buud fãa n togs koe-noogã ye. (1 Tes. 2:9) A Poll sẽn moon ne kɩs-sɩd sẽn tar pãngã talla pãn-tusdg sẽn yaa kãseng tẽngã neb zut hal tɩ bãmb kẽer bas b pĩnd wẽn-naands balengã n lebg sɩd Wẽnnaam a Zeova sõgen dãmba.​—1 Tes. 1:​8-10.

⁹ B sẽn nams tẽedb paalsã b tẽebã yĩngã ka gɩdg-b tɩ b ka moon koe-noogã ye. B tẽebã b sẽn nan paam paalmã la b sẽn kɩs sɩd zãng tɩ b ra na n paama bark sẽn kaoosd wakat sẽn-kõn-sa wã tusa Tesalonik rãmbã tɩ b moon sɩdã b sẽn da sak ne yẽesmã. Tiging kãng ra yɩɩ tiging tʋmdg wʋsg hal tɩ b tẽebã la b yẽesmã kɩbar ra yelg n ta Masedoan babs a taab la Akai menga. Woto yĩnga, wakat ning a Poll sẽn da gʋls a pipi lɛtrã n tool Tesalonik rãmbã, neba ra zoe n mii b tʋʋm sõma wã sõma. (1 Tes. 1:7) Ad yaa mak-sõng sẽn yaa kãseng menga!

¹⁰ Nonglmã ne Wẽnnaamã la ne nebã n tusd-du: Wala Tesalonik rãmbã, wãn-wãn la d mengã tõe n tall kɩs-sɩd sẽn tar pãng d sã n wa moond koe-noogã rũndã-rũndã? Tesalonik rãmbã wɛɛngẽ, tʋm-tʋmd a Poll gʋlsame: “Wakat fãa tõnd ningda d yamẽ yãmb sẽn tʋmd ne kɩs-sɩd la y modgd wʋsg nonglem yĩngã.” (1 Tes. 1:3, NW, tẽngr notã) Yaa vẽeneg tɩ b ra nonga a Zeova Wẽnnaam la neb nins b sẽn moonã sõma-sõma la ne b sũy fãa. Ra yaa nonglem kãng n tus a Poll ne a tũud-n-taasã tɩ b pa kõ Tesalonik rãmbã “Wẽnnaam Koe-nooga bal ye, [b] kõo [bãmb] mens me n paase.”​—1 Tes. 2:8.

¹¹ Woto me, tõnd sẽn nong a Zeova la neb a taabã sõma-sõma wã tusda tõnd tɩ d tʋll n kẽes d mens zãng moonegã tʋʋmd Wẽnnaam sẽn kõ-d tɩ d maanã pʋgẽ. Ne nonglem a woto, d sak n deegame tɩ koe-noogã yelgr yaa zɩɩb Wẽnnaam sẽn kõ tõnd mengã tɩ d tʋke. D sã n bʋgs bũmb nins fãa a Zeova sẽn maan n kõ-d sẽn na yɩl n tees-d “vɩɩm sẽn yaa sɩda” zĩigẽ wã ne yam-sõng la ne nanebã zugu, rẽ na n tusa tõnd tɩ d togs neb a taabã sɩd kãngã sẽn be yamleoogã tõnd sẽn tẽed ne d sũyã fãa wã.​—1 Tɩm. 6:19.

¹² D sã n tʋʋmd wʋsg moonegã pʋgẽ, tõnd nonglmã ne a Zeova la ne nebã tog n ket n paasdame. Sã n yaa woto, rẽ na n tusa tõnd tɩ d wɩng ne zak-zak moonegã la kaset kũun buud a taabã d sẽn tõe n maanã n paase. D na n tũnuga ne segb toɛ-toɛ n kõ roagdba, yagse, la mitb kaset ne manesem sẽn ka yãk wakate. D tara sũ-noog d mensã sũy pʋsẽ, baa neb wʋsg sẽn yɩɩd sẽn zãgsd koe-noogã d sẽn togsdã tɩ neb kẽer na n mao n gɩdg Rĩungã moonegã. Bõe yĩnga? Bala d miimi tɩ d maana d fãa-fãa sẽn na yɩl n kõ kaset Rĩungã wɛɛngẽ la d sõng neb a taabã tɩ b paam fãagrã. Sẽn paase a Zeova na n barka modgr nins d sẽn maand sẽn na yɩl n yã sũ-tɩrs rãmba. Baa ne vɩɩmã yɩɩr sẽn weoogd tõnd t’a Sʋɩtãan baoodẽ n na n boog d sũ-noogã, d tõe n talla d kɩs-sɩd sẽn tar pãngã la d yẽesmã neb a taabã kaset kũun pʋgẽ. Tõnd fãa sã n kẽes d mense, rẽ na n baasame n wa ne tigims sẽn tar pãng la yẽesem wala a soab ning sẽn da be Tesalonikã.

¹³ Ra tol-y n koms-y raood n base, makr taoor ye: Kɩs-sɩdã me yaa tɩlae, d sã n wa segd makr toɛ-toɛya. (1 Pɩɛ. 1:​6, 7) A Zezi togsa a karen-biisã vẽeneg tɩ b sã n tũ-a, “buud fãa na n kisga” bãmba. (Mat. 24:9) A Poll ne a Sɩlas vɩɩmda yel-kãnga Filipi. Tʋʋma sak 16 kɩbarã yetame tɩ b ninga a Poll ne a Sɩlas pʋgẽ bãens-roogã pʋgẽ n balg-b ra-bãongo. Naoor wʋsgo, bãens-ro-kãsengã meng ra yaa ro-yaleng buud sẽn tar ro-kɩds goabg la rɩtg bi-beesã yĩnga, tɩ ro-kãens da tõe n paam vẽenem la pemsem sõma. La pʋgẽ bãens-roogã ra ka tar vẽenem ye, sẽn paase pemsmã me ra paoodame. A Poll ne a Sɩlas ra segd n maoo ne likã, tʋʋlgã, la yũugã sẽn da be zĩ-wɛɛg a woto pʋgẽ wã. Yãmb wee n tags toog ning pʋgẽ b sẽn da tog n beẽ wã, b sẽn da balg-b na ta lɛɛr dãmb tɩ b poɛyã ra yur la sĩind zɩɩm pãbrã yĩngã!

¹⁴ Baa ne makr kãensã, a Poll ne a Sɩlas kell n yɩɩ kɩs-sɩd dãmba. B wilga kɩs-sɩd ne b sũy fãa, tɩ rẽ keng-b tɩ b sõgen a Zeova baa ne makrã. B wilga kɩs-sɩd kãng vẽeneg verse 25 wã sẽn be sak 16 pʋgẽ, zĩig ning b sẽn yeel t’a Poll ne a Sɩlas ra “pʋʋsdame la b yɩɩndẽ n pẽgd Wẽnnaam[ã].” Sɩda, baa ne b sẽn da be pʋgẽ bãens-roogẽ wã, b ra kɩsa sɩd wʋsg tɩ b tara Wẽnnaam lohorem hal tɩ b yɩɩl tɩ yi wʋsgo, tɩ sek neb a taabã sẽn da be bãens roogẽ wã na wʋme! Rũndã-rũndã d tog n talla kɩs-sɩd a woto, d sã n wa maood ne yɛl sẽn makd tõnd tẽebã.

¹⁵ Makr nins Munaafɩɩkã sẽn ningd tõnd taoorã sõor waoogame. Ne neb kẽere, rẽ tõe n yaa namsg b tẽebã yĩng sẽn yit roagdb nengẽ. Tõnd saam-biis wʋsg maooda ne yɛl sẽn pa nana laloa wã wɛɛngẽ. D tõe n segda kɩɩsg sẽn yit sɩdã kɩɩsdb nengẽ. Ligd zu-loees la yɩɩr sẽn tɩ loe ne d sẽn na n maan to-to n paam n kõ noorã me bee be. Kambã me maooda ne kom-taasã weoogr lekollẽ wã. Wãn to la d tõe n mao ne makr kãensã n tõoge? Bõe n yaa tɩlae sẽn na yɩl n puk kɩs-sɩdã?

¹⁶ Nananda, yaa tɩlae tɩ tõnd mengã tall zems-n-taar ne a Zeova. A Poll ne a Sɩlas sẽn da be pʋgẽ bãens-roogẽ wã, b ra ka rɩk b sẽkã n yẽgemd yell ning pʋgẽ b sẽn be wã wɛɛngẽ, bɩ b kʋmd b meng ninbãaneg ye. Tao-tao bala, b kedg n teesa a Zeova pʋʋsg pʋgẽ la b pẽg-a ne yɩɩla. Bõe yĩnga? Bala b mensã ra tara zems-n-taar ne b yĩngr Ba wã. B ra miimi tɩ b ra namsda tɩrlmã yĩnga, la tɩ b fãagrã ra bee a Zeova nugẽ.​—Yɩɩl 3:9.

¹⁷ Rũndã-rũndã me tõnd sã n wa segd makre, d tog n kedg n teesa a Zeova. A Poll sagla kiris-nebã tɩ b ‘wilg Wẽnnaam bãmb sẽn dat bũmb ninsi. La Wẽnnaam laafɩ sẽn yɩɩd neba bãngr fãa na gũ bãmb sũyã la b tagsgo.’ (Fil. 4:​6, 7) Ad kõta belsgo, d sẽn mi t’a Zeova ka na n bas-d tɩ d mao ne makrã d yembrã! (Ezai 41:10) Wakat fãa a bee ne tõndo, d sã n sõgend-a ne kɩs-sɩd hakɩka.​—Yɩɩl 46:8.

¹⁸ Manesem-kãseng a to sẽn na yɩl n sõng tõnd tɩ d wilg d kɩs-sɩdã yaa d sẽn na n tʋmd wʋsg a Zeova tʋʋmdã pʋgẽ. (1 Kor. 15:58) B ra ninga a Poll ne a Sɩlas bãens-roogẽ b sẽn da moond koe-noogã yĩnga. B yalsa koe-noogã mooneg b makrã yĩng bɩ? Ayo, baa b sẽn da wa n be bãens-roogẽ wã b kẽnga taoor ne moonegã. La b sẽn yiis-b be rẽ poorã, b kẽnga Tesaloniki, n tɩ kẽng Zʋɩf rãmbã sɩnagoogẽ ‘n sõs ne bãmb Gʋlsg Sõamyã koɛɛga.’ (Tʋʋ. 17:​1-3) Tõnd sã n sak n deegame bɩ d sã n tara tẽeb sẽn tar pãng ne a Zeova la d kɩs sɩd tɩ d tara sɩdã, bũmb ba a ye “kõn tõog n welg tõnd ne Wẽnnaam nonglem sẽn be tõnd Zusoaba Kirist Zezi pʋgẽ wã ye.”​—Rom 8:35-39.

¹⁹ Rũndã-rũndã makr ne neb sẽn tall kɩs-sɩd sẽn tar pãnga: D tara mak-kãsems wʋsg ne neb sẽn wilg kɩs-sɩd sẽn tar pãng wala a Poll la a Sɩlas tõnd wakatã. Saam-bi-poak a yembr sẽn da zĩnd Auschwitz nams-toaag kãẽ wã n põs togsame tɩ saam-biisã la saam-bi-pogsã wilga tẽeb la kɩs-sɩd sẽn ka vigsd be. A togsa woto: “Vugri sʋgs-toog wakate, soda-naab a yembr fõo ne sũur n wa mam nengẽ n tãs n yeele: ‘Bõe la tõnd na n maan ne yãmba? Tõnd yõg-yã, y toog kae. Tõnd tɩ sui-y bãens-roto, rẽ ka pak-yã. D tɩ ning-y nams-toaag kã rãmbẽ me, rẽ ka yell ne-yã. D kao-y bʋʋd tɩ b segd kʋ-y me, yãmb ka sʋkda. Bõe la tõnd na n maan ne yãmbã?’ ” Ad sɩd kengda tẽeb tɩ d yã tẽeb ning d saam-biisã sẽn tall yel-tood a woto pʋsẽ wã! Wakat fãa b teegda a Zeova t’a sõng-b tɩ b tõog toogo.

²⁰ Sãmbg sẽn ka be, d tẽra kɩs-sɩd ning tõnd saam-biisã wʋsg sẽn tall buud kisgrã sẽn puk yʋʋm sẽn nan pa kaoos pʋgẽ wã taoorã. Baa b mens sẽn da wa n tɩ be yell pʋgẽ wã, saam-biis sẽn tar taoor-sobend gesame tɩ b saam-biisã la b saam-bi-pogsã paam dɩlgr tẽebã wɛɛngẽ. Bãmb fãa ket n tara tẽeb la kɩs-sɩd sẽn tar pãng tɩ ‘zab-teed nins fãa neb sẽn maand n na n zab ne bãmbã ka na n tõog ye.’​—Ezai 54:17.

²¹ Tõnd saam-biis la d saam-bi-pogs wʋsg sẽn tar kẽed-n-taas sẽn ka tẽedb me wilgda tẽeb sẽn tar pãng la tõog-toogo. Saam-biig a yembr sẽn be Guadelup pag sẽn ka tẽed kɩɩs-a-la kɩɩs-kãseng menga. Sẽn na yɩl n koms a raood la a gɩdg a kiris-neb tigissa kẽnde, a rag n ka segend rɩɩbo, a ka paasd futu, bɩ a maneg-b ye. A ra mii n kaoosame n ka gom ne sɩdã ye. La a sẽn wilg kɩs-sɩd ne a sũur fãa a Zeova sõgenegã pʋgẽ la a bao a sõngr pʋʋsg pʋgẽ wã, saam-bi-kãngã tõog n tõoga toog ne yel-kãensã fãa. Wakat a wãna? Yʋʋm 20 tõr la bala. La rẽ poore, bilf-bilfã a pãgã sũur toeemame. Sẽn wa n na n baase, a ra tõe n sɩd kɩdmame, bala a pagã saka Wẽnnaam Rĩungã saagre.

²² Sẽn na n baase, d ka tog n yĩm d saam-biisã la d saam-bi-pogsã sẽn debd lekollã kɩs-sɩd sẽn tar pãngã ye. Bãmb maooda ne b kom-taasã weoogre la ne yel-tood a taaba. Weoogr ning sẽn dat tɩ b maan wa neb a taabã lekollẽ wã wɛɛngẽ, Kaset soab sẽn yaa bi-pugl yeelame: “F sã n be lekollẽ wã, wakat fãa neba raoond-f lame tɩ f yɩ tõat bilfu. Kambã waoogd-f lame n yɩɩda, f sã n maan tɩ sãag bilfu.” Ad sɩd yaa weoogr tɛkẽ la d kom-bɩɩsã paamda! B tog n dɩka sard kãn-kãe b yamẽ wã la b sũyẽ wã n kɩɩs kʋɩɩbg a woto.

²³ Tõnd kom-bɩɩsã wʋsg maanda neere, b sẽn talld burkĩndlem makrã taoorã. Ad tõnd saam-bi-poak sẽn yaa bi-bɩɩg sẽn be Farãns makre. Daar a yembre, midi rɩɩbã poore komdibli n mak n na n modg-a t’a mogs-ba. La a pʋʋsame la a kɩɩs ne manesem sẽn ka vigsdi, dẽ komdibli wã bas-a-la sɩɩɩ. Kaoosg poore, komdibli wã sʋka a ye n lebg n wa yeel-a t’a nand-a-la a raoodã yĩnga. Saam-bi-poakã tõogame n kõ-a kaset Rĩungã wɛɛngẽ, la a togs-a vɩɩm manesem noy sẽn yaa sõma wʋsg nins a Zeova sẽn kõ tɩ b rãmb nins fãa sẽn dat n paam Rĩungã barkã tũ wã. Yʋʋmdã pʋgẽ me, a wilga a tẽebã zãmsg karen-doogã tõr me.

²⁴ Ad yaa zu-no-kãseng tɛkẽ la d tara, d sẽn paam n be b rãmb nins a Zeova sũur sẽn noom t’a tũnug ne, sẽn na yɩl tɩ b togs a raabã ne kɩs-sɩd sẽn pa vigsdã! (Kol. 4:12) Sẽn paase, d tara segb sẽn yaa kãseng n na n wilg d burkĩndlmã, tõnd Bɛ sẽn wõnd gɩgemdã sẽn yaa a Sʋɩtãan Munaafɩɩkã sã n wa zabd ne-do. (1 Pɩɛ. 5:​8, 9) Ra tol-y n yĩm t’a Zeova tũnugda ne Rĩungã koɛɛg sẽn na yɩl n fãag tõnd a moondbã la b rãmb nins sẽn kelgd-a wã ye. Bɩ sard nins d sẽn dɩkdã la d daar fãa vɩɩmã wilg tɩ d ningda Rĩungã pipi zĩigẽ. Bɩ d ket n moond koe-noogã ne kɩs-sɩd sẽn tar pãnga!