Tigissã nafda kom-bɩɩsã

¹ Bi-pugl sẽn yaa bi-bɩɩg yeelame: “Wakat ninga mam tagsdame tɩ kom-bɩɩsã vɩɩm yaa toog n yɩɩdã. Neb sẽn maand yoobo, sẽn dɩkd dorge, la sẽn yaa rã-yũudb n gũbg tõndo.” Yaa woto la yãmb tagsd bɩ? Sã n yaa woto, bõe la yãmb tagsd tɩ na n sõnga yãmb tɩ y mao ne pãn-tusd-wẽns kãensã? Y segd n talla tẽebo, tẽeb sẽn tar pãng t’a Zeova soayã yaa tɩrse, bala rẽ sã n ka be “ned ka tõe n ta Wẽnnaam yam ye.” (Heb. 11:6) Kiris-neb tigissã kẽnd na n sõng-y lame tɩ y paas y kiris-ned tẽebã la sard kãn-kãe ning y sẽn dɩk n na n gil wẽngã pãnga.

² Tigissã tõe n nafa yãmb wʋsgo: Bõe n kɩtd tɩ rɩ-noog ne zo-nongds be yamleoogo? Rẽ yĩnga ka rɩ-sõngã ne tũud-n-taar sẽn noogd sũurã sẽn lagem taab tɩ yaa yamleoogã sɩda? Be neere, tõnd tigissã noogda sũur woto me, la yaa tẽebã wɛɛngẽ.

³ Yɛl nins zut b sẽn sõsd tigissẽ wã kengda tẽebo. Yel-kãens kẽer tɩ loee ne daar fãa vɩɩmã zu-loeese, t’a taab yaa Biiblã bãngr-goam sẽn be yamleoog zãmsgo. B kõta noy sẽn zems sẽn zãmsd yãmb y sẽn tõe n tall vɩɩm manesem sẽn yaa sõma n yɩɩdã, la y sẽn tõe n mao ne zu-loeesã y sẽn segdã to-to. Tũud-n-taas nins d sẽn paamd tigissẽ wã yaa sõma n yɩɩd tũud-n-taas a taab buud fãa, sẽn paase, tẽebã wɛɛngẽ yɛlã sẽn yaa to-to wã bee yamleoog la bãane. (Yɩɩl 133:1) Ka lingr tɩ bi-bɩɩg a yembr yeel woto ye: “Daarã tõr fãa, mam bee lekollẽ wã, la rẽ yaada maam wʋsgo. La tigissã yaa wa koom zĩig rasempʋɩɩgẽ, zĩig ning m sẽn paamd yolsg sẽn na yɩl n mao n pasg lekoll raar a to n ta vẽk-n-beoogã.” Bi-bɩɩg a to yeelame: “Mam yãame tɩ lagem-n-taar sõma ne neb a taab sẽn nong a Zeova sõngda maam tɩ m kell n pa n pẽneg-a.”

⁴ Y sã n gʋls y yʋʋr Teokaratik Ministɛɛr Lekollẽ wã, y na n zãmsa tagsa sẽn tik Biiblã zug baoobo, n maneg-b tɩ yɩ sõasga, tɩ rẽ poor bɩ y gom n wilg-a kɛlgdb Rĩung Roog pʋgẽ. Tags-y n ges nafa nins y sẽn paamdã, b sã n forem yãmb tɩ y tõe n zãms neb sɩdã sẽn fãagd yõyã sẽn be Wẽnnaam Gomdã pʋgẽ wã ne minim! Yɛ yas la kom-bɩɩs tõe n paam zãmsg sẽn tar yõod woto?

⁵ D sẽn tõe n dɩ tigissã nafa wʋsg wa d sẽn tõe tɛk to-to: Yɛl a tãab sẽn tar yõod la d segd n maan sẽn na yɩl n dɩ tigissã nafa wʋsg n yɩɩda. Yel-kãens yaa seglgo, kẽes-m-mengã, la saglsã tũubu.

⁶ Segl-y-ba: Yãk-y sẽk wakat fãa tigissã seglg yĩnga. Da bas-y tɩ lekoll tʋʋmde, wakat pʋɩ-sʋk tʋʋmde, bɩ pemsem kokr yɛl kɩt tɩ y kong sẽk y sẽn datã sẽn na yɩl n deng n vaees tagsa nins b sẽn na n sõs b zut tigisg fãa wã ye. Geelg-n-tʋm sẽn yaa sõma tallg tara yõodo. Pipi la sẽn yɩɩd fãa y segd n tũuda semen fãa Biibl karengã geelg-n-tʋm Teokaratik Ministɛɛrã Lekoll yĩnga. Daar fãa minit a wãn bal seka sẽn na yɩl n karem la b bʋgs sags nins b sẽn yãk tɩ b karmã zutu. Yãk-y sẽk sẽn na yɩl n segl Tigingã Sebr zãmsg la Gũusg Gasgã zãmsgo. Kẽer maanda woto raar a ye bɩ rasem a yiib sẽn deng tigis-kãensã. Maan-y woto me ne sõss nins b sẽn geend n na n maan Tʋʋmdã tigisgẽ wã semen fãa, wa y sẽn tõe tɛka.

⁷ Kẽes-y y meng b pʋsẽ: Biiblã yetame t’a Zezi sẽn da wa n tar yʋʋm 12, b yã-a-la wẽn-doogẽ wã t’a ra kelgdẽ, n maand sʋgsgo, la a kõt leoore. (Luk 2:46, 47) Woto rat n yeelame t’a ra kẽesa a meng zãng-zãnga. Y na n dɩɩ tigissã yõod n yɩɩda, y sã n maan modgr n kẽes y mens b pʋsẽ.—Yel. 15:23.

⁸ Y segd n kelga zãmsg ning b sẽn kõt tigissẽ wã neere. Wakat ninga sõasg kelgr yaa toog n yɩɩd a kũuni. Bõe yĩnga? Ned a to sã n gomd ne-yã y yamã tõe n gõodame. Wãn to la y tõe n mao ne yel-kãngã? Gʋls-y tagsa wã. Gʋls-y tags-kãsems nins y sẽn dat n wa lebg n ges poorẽ wã. Tagsa wã gʋlsg na n sõng-y lame tɩ y yamã kell n tik sõssã zutu. Sẽn paase, gẽes-y verse rãmbã, la y pʋg b karengã sõasda sã n wa karemd-ba.

⁹ Sẽn paase, yãk-y bõn-datl n kẽes y meng sʋgsg la leoor sõasg buud fãa b sẽn maand tigissẽ wã. Na n le naf-y lame n paas menga, y sã n tags bũmb ning y sẽn dat n yeelã zug neere. Yelbũna 15:28 yetame: “Nin-sõng tagsdame n yaool n leokdẽ.”

¹⁰ Tũ-y bũmb nins y sẽn zãmsdã: Yaoolem bũmb y sẽn segd n maan yaa y modg tɩ bũmb nins y sẽn zãmsdã ‘tʋm yãmb pʋsẽ.’ (1 Tes. 2:13) Y sã n tũ tags-sõma nins yãmb sẽn zãmsd tigisg fãa pʋgẽ wã, y na n pẽnega Wẽnnaam a Zeova n paase. A Zeova na n yɩɩ vẽeneg ne yãmba, la y na n paama sũ-noog sẽn yaa kãsenga, y sẽn ‘kẽnd sɩda pʋgẽ’ sasa, la y meng sɩd vɩ-a wã.—3 Zã 4.

¹¹ Saam-biis la saam-bi-pogs sẽn yaa kom-bɩɩse, yãmb sã n segend tigissã, n kẽesd y meng b pʋsẽ, la y tũud bũmb nins y sẽn zãmsd be wã, y sũur na n yɩɩ noog zãng ne tigissã. Wakat kãng pʋgẽ, y na n dɩɩ b yõod zãng wa y sẽn tõe tɛka. Y tẽebã pãng na n paasame, la na n yɩɩ woto me ne sard ning y sẽn dɩk n na n yɩ sɩd soab ne y yĩngr Ba a Zeova wã.—Yɩɩl 145:18.