A Zeova kõta pãnga
1 Yãmb tagsda wãn-wãn ne tʋm-tʋmd a Polle? Tõnd sã n karem Tʋʋma sebrã, d bãngdame t’a Poll yɩɩ ned sẽn tʋm wʋsg a Zeova sõgenegã pʋgẽ. A Poll maana wãn n tõog n tʋm wʋsg woto? A yeelame: “Mam tõee fãa ne ned ning sẽn kõta maam pãnga.” (Fil. 4:13, Sebr Sõngo) Tõnd me tõe n paama pãng ning a Zeova sẽn kõtã. Wãn-wãn to? Yaa d sẽn na n tũnug ne segls a yoobã a sẽn dɩk d yĩngã. Segl-kãens maana sẽn na yɩl n kõ tõnd pãng tẽebã wɛɛngẽ.
2 Wẽnnaam Gomdã: Tõnd tog n dɩɩ rɩɩb tɩ d yĩngã tõog n tall keelem. Woto me, d tog n dɩlga d mens ne Wẽnnaam Gomdã sẽn na yɩl n ket n vɩ tẽebã wɛɛngẽ. (Mat. 4:4) Biiblã kõta tõnd pãn-kãnga. Sã n tõe fãa, d togame n zãmsdẽ la d bʋgsd sõma daar fãa. Woto, d na n kell n talla yẽesem sɩdã pʋgẽ.—Yɩɩl 1:2, 3.
3 Pʋʋsgã: Tara yõod tɩ d pẽneg a Zeova wakat fãa, la sẽn yɩɩd fãa, yell sã n wa pak-do. Ned sã n pʋʋs a Zeova n kos t’a kõ-a keelem, a tũnugda ne a vʋʋsem sõngã n kõt rẽ. (Luk 11:13; Ef. 3:16) Biiblã raoonda tõnd tɩ d “pʋʋse n da bas ye.” (Rom 12:12) Yãmb maanda woto bɩ?
4 Tigingã: Tigingã tigiss kõta tõnd pãng la raoolgo. Tũud-n-taar sẽn be yamleoogã d sẽn tar ne d saam-biisã la d saam-bi-pogsã be wã me kõta pãng la raoolgo. (Heb. 10:24, 25) Yell sã n pak-do, b raoonda tõnd la b sõngd tõnd ne nonglem.—Yel. 17:17, NW; Koɛ. 4:10.
5 Koe-moonegã: D sã n moond koe-noogã n ka vaandẽ, rẽ na n sõng n kɩtame tɩ Rĩungã la a sẽn na n wa ne bark ninsã be d yamẽ wakat fãa. Tõnd sã n sõng neb a taabã tɩ b bãng a Zeova, kõta tõnd sũ-noogo. (Tʋʋ. 20:35) Ka tõnd fãa n tõe n yik n kẽng n tɩ moon koe-noogã zĩig ning raab sẽn beẽ n yɩɩdã, bɩ n kẽ wakat fãa sõgenegã pʋgẽ ye. La d fãa tõe n moona koe-noogã sõma-sõma ne manesem a taaba.—Heb. 6:10-12.
6 Kiris-neb yel-gɛtbã: Sõngr la raoolg nins kẽem dãmbã sẽn kõtã nafda tõndo. A Zeova kõ-b-la noor tɩ b kɩɩm bãgrã sẽn be b nugẽ wã. (1 Pɩɛ. 5:2) Wala a Poll sẽn maan yẽ wakatã, so-toak yel-gɛtbã kengda tigims nins b sẽn tʋgd n kaagdẽ wã tẽebo.—Rom 1:11, 12.
7 Kɩs-sɩd dãmbã makre: Tõnd pĩnd la masã wakatã tʋmd-n-taas kõo mak-sõma sẽn kengd raoodo. D sã n ges mak-kãense, kõta tõnd pãnga. (Heb. 12:1) Y sã n wa rat n lebs n paam keelem, y tõe n maana sẽn pʋgdã. Karm-y ned vɩɩm kɩbar sẽn kõt raoolg sẽn be tõnd periodik rãmbẽ wã. Karm-y kɩbar sẽn kengd tẽeb Annuaire pʋgẽ. Y leb n tõe n karma kɩbay kẽer sẽn paasd yẽesem Prédicateurs sebrã pʋgẽ, sẽn tɩ loe ne a Zeova Kaset rãmbã.
8 Saam-biig sẽn tar sẽn zems yʋʋm 95 masã saka sɩdã t’a ra nan ket n yaa biiga. A tẽebã paama makr a bi-bɩɩlmã wakate. Pipi, neb kẽer sẽn da be tigingã pʋgẽ basa a Zeova siglgã. Sẽn paase, zak-zak moonegã ra yaa toog ne-a. La wakat fãa, a teega a Zeova. Pa kaoos la a sɩng n moond koe-noogã ne sũ-noog ye. La yaa wãn to rũndã yẽ? Masã, a laafɩ wã pa wʋsg ye. Baa ne rẽ, a ket n yaa Bruklin Betɛllã zak neda, la Siglgã zug sull neda. A ka maand m-bãngẽ, a sẽn kell n tall kɩs-sɩd ne a Zeova siglgã ye.
9 Saam-bi-poak sẽn yaa Gãrãnd Bertayn Betɛllã zak ned reega lisg a yʋʋm 13. A lisgã reegr tɩ rɩẽ, a sɩnga so-pakrã tʋʋmd ne a ba-biiga. Yʋʋmd ning sẽn pʋglã, b kẽesa a ba wã roogo, bala a ka sak n kẽes a toog Dũni Gill Zabr a Yiibẽ wã ye. Saam-bi-poakã kell n teega a Zeova n paam pãnga, la a kell n sõgen sɩd Wẽnnaamã. A wa n kẽe kãadem ne saam-biig sẽn tar kɩs-sɩda, tɩ b yiibã fãa ra maand a Zeova raabã. Rẽ poore, b kãadmã yʋʋm 35 zugẽ, a sɩdã kii kũ-lingdem. Yel-kãngã pʋgẽ yɛsa, a paama pãng a Zeova nengẽ, la hal tɩ ta rũndã a ket n sõgend-a lame. A tʋlla ne yãgb n ket n sõgend a Zeova tẽng zug zakã pʋgẽ wakat fãa.
10 A Zeova sõngdame la a kõt a sõgen dãmb sẽn yaa kɩs-sɩd dãmbã pãnga. “Ned sã n yɛ, bãmb kõt-a-la pãnga. Ned pãng sã n booge, bãmb paasd-a-la pãnga.” Tõnd tõe n paama pãnga, pãn-kãngã sẽn ka tar tɛkã pʋgẽ. La rẽ yaa d sẽn na n tũnug ne segls a yoobã yell b sẽn gom zugẽ wã. Tẽeg-y-yã: “Neb nins sẽn teegd Zusoaba pãng paasda wakat fãa. . . . Bãmb na n zoeeme la b pãng ka na n sɛ ye. Bãmb na n kẽname n ka yɛ ye.” (Ezai 40:29-31) A Poll teega a Zeova sõma-sõma n paam pãnga. Tõnd me tõe n maana woto.