Yɩ-y yak sẽn kõt kaset sõngo
1 A Zezi yeelame tɩ d ‘nong d yak wa d menga.’ (Mat. 22:39) Yaa sɩd tɩ y maanda y tẽed-n-taasã ‘yel-sõmde’, la y tõeeme n maan tɩ y nonglmã ta y yagsã me bɩ? (Gal. 6:10) Wãn-wãn to?
2 Ne y sẽn na n wilg y sẽn ya a soaba: Yãmb yagsã miime tɩ y ya a Zeova Kaset soab bɩ? B sã n ka miẽ, bõe yĩng tɩ y ka na n kẽng b nengẽ koe-moonegã wakate? Yɛlã sẽn na n yɩ to-to wã tõeeme n ling-yã! Y leb n tõeeme me n tɩ kõ-b kasetã wakat a to, sã n mikame tɩ yaa rẽ n yaa nana ne-y n yɩɩda. Y tõeeme n wa be yɩng n ne-a t’a tʋmd a zakã sɛɛga, bɩ a yuugdẽ bala. Kolg-y n sõs ne-a zood sõasg bala. Modg-y n togs-a yãmb tẽebã sẽn ya a soaba, yãmb Rĩungã Roog zĩiga, la bũmb nins b sẽn maand be wã me. Sẽn paase, togs-y-yã-a yags nins sẽn wat tigissã me yʋya. Bool-y-yã-a t’a wa tigissã. Modg-y n kɩs kaset sẽn yaa sõma ne koe-noogã ned ning fãa y sẽn mi taoore.—Tʋʋ. 10:42; 28:23.
3 Ne y sẽn na n tar manesem sõngo: Yãmb zood manesmã na n kɩtame t’a soabã bãng-y sõma, la pak sor n kõ-y tɩ y kõ kasetã. Rẽ leb n ‘waoogda Wẽnnaam karengã.’ (Tɩt 2:7, 10) Wilg-y tɩ y yagsã yell sɩd pak-y lame. Tall-y zood manesem la y yɩ wʋmda. Da kẽnd-y b zagsẽ wã n ka satẽ, bɩ n maand bʋrg n tiisd-b ye. Yak sã n pa keeme, wilg-y y nonglem n tɩ kãab y sõngre. Yak sã n wa sakẽ wã paalem ne a zak rãmbã, bɩ y tʋg n pʋʋs-a. Yel-sõm tʋʋm a woto kɩtdame t’a soabã tall tagsg sẽn yaa sõma ne-yã, la leb n nooma a Zeova me.—Heb. 13:16.
4 Ne y sẽn na n zãad y zakã zĩig sõma: Yak-n-taar sẽn yaa sõma baoodame tɩ y zã y zakã sõma sẽn na yɩl t’a sak gesgo. Zakã pʋg la a sɛɛg sã n yaa yɩlemd la sakd gesgo, rẽ mengã kõta kaset sõngo. La zak sẽn yaa rẽgd tɩ teedã lagem n dʋr yaar ka waoogd Rĩungã koɛɛg ye. Rẽ n so tɩ tar yõod wʋsg tɩ y ges tɩ y zakã pʋg la a sɛɛga, la y bõn-zombdɩ wã yɩ yɩlem la maneg sõma.
5 Y sã n wilg tɩ neb nins sẽn ka be kiris-neb tigingã pʋgẽ yell pak-y lame, yaa nonglem wilgr ne y yagsã. Rẽ tõe n wa baasa ne bõe? Tõeeme tɩ bãmb kẽer wa “waoog Wẽnnaam,” “bãmb sẽn na n yã yãmb tʋʋm sõma wã yĩnga.”—1 Pɩɛ. 2:12.