Bɩ y yam da yo ne koɛɛgã mooneg ye!
1 Tõnd sã n segend n na n tɩ moon zak-zaka, sẽn yaa tʋʋmd n yɩɩdã yaa tõnd mengã tõog n yi d zakẽ wã n kẽng moonegã. Tõnd mengã tõeeme n tagsd tɩ d ka tõe tʋʋmdã, tɩ d yama yood ne yi n tɩ togs “neba fãa” sɩdã. (1 Tɩm. 2:4) La d ka segd n maan yam-yoog ne koe-noogã mooneg ye. Bõe yĩnga?
2 Ya a Zeova koɛɛga: A Zeova tũnuga ne Biiblã n taas a gomdã. D sã n wa taasd neb a taabã koe-kãngã, ya a Zeova tagsa la d taasda, ka d meng tagsg ye. (Rom 10:13-15) Neba sã n pa kelg Rĩungã koɛɛga, sɩd-sɩda, ya a Zeova la b pa kelgda. La rẽ pa komsd tõnd raood ye. Neb n be n dat tɩ dũniyã yɛl toeeme, tɩ tẽeb kom tar-ba. D tara bas-m-yam tɩ koe-kãngã na n kẽe nin-kãensã sũyẽ tɩ b sak-a.—Eze. 9:4; Mat. 5:3, 6.
3 Ya a Zeova n boond nebã: Nina tõeeme n pa kelg tõnd pĩnda, n yaool n sak n kelg masã. Tõeeme tɩ yaa yɛl sẽn toeem nin-kãngã vɩɩmã pʋgẽ wã n bʋk a sũurã. Tõe tɩ masã bɩ a Zeova maan nin-kãng soabã neere, n “bool-a.” (Zã 6:44, 65) Sã n wa yaa woto, d ratame n yaa neb sẽn segl t’a Zeova tõe n tũnug ne-do. La d sak malɛgsã sor-wilgr n bao nin-kãensã.—Wil. 14:6.
4 Wẽnnaam kõta tõnd a vʋʋsem sõngã: Vʋʋsem sõngã kɩtame tɩ d tõe n “dell Zusoabã n gom ne daoodo.” (Tʋʋ. 14:1-3) D sẽn mi tɩ d tara sõngr sẽn yaa kãseng a woto koe-moonegã pʋgẽ wã, d yama ka na n yo ne sɩdã togsg d yagse, d tʋmd-n-taase, d karen-bi-taase, d roagdba, bɩ neb sẽn karem n zãag zĩig bɩ ra-kãagb ye.
5 A Zezi zãmsa tõnd d sẽn segd n kõ zãmsgã to-to: A Zezi tũnuga ne sʋgsg sẽn kɩtd tɩ ned tagse, ne makr toɛ-toɛ sẽn yaa vẽenese, ne tagsg sẽn tik Gʋlsgã Sõamyã zutu. A togsa sɩdã nana-nana, ne goam sẽn be yamleoog la sẽn yit a sũurẽ. Rũndã-rũndã manesem kãensã n ket n yaa sõma n yɩɩda. (1 Kor. 4:17) Yɛlã sẽn yaa to-to tõnd wakatã tõeeme n ka yembr ne sasa kãng yɛlã ye, la Rĩungã koɛɛg sẽn tar pãngã ket n ka toeem ye.
6 Yaa zu-noog n kõ-do, d sẽn paam t’a Zeova tũnugd ne-d n sõngd nebã ne manesem sẽn ka wõnd a taabã. Bɩ d ra maan yam-yoog ye! Bɩ d tall daoodo, la d bas t’a Zeova “pak sor tɩ tõnd moon koɛɛg” n togs neb a taabã koe-noogã.—Kol. 4:2-4.