Y tõe n tɩ tʋma zĩig ning raab sẽn beẽ n yɩɩdã bɩ?
1 Zĩig ning Rĩungã koe-moondb raab sẽn beẽ n yɩɩd kẽngr zoe n waa y yamẽ bɩ? B sã n bool-y tɩ y ‘wa sõnge,’ y na n sakame n maan wala tʋm-tʋmd a Poll bɩ? (Tʋʋ. 16:9, 10) Tigims wʋsg pʋsẽ, zags neb sẽn bɩ tẽebã wɛɛngẽ la so-pakdb sẽn na yɩl n moon moonegã zĩig raab n be. Leb n tõeeme tɩ yaa kãsem dãmb bɩ kãsemb sõngdb sẽn tar tõog la b rat sẽn na yɩl n lʋɩ taoor tigingã tʋʋm pʋsẽ. Moonegã zĩig tõeeme n yaa tẽn-bõones sẽn sãeeg n be babg sẽn yaa yaleng pʋgẽ. Tõeeme tɩ Rĩung Roog ning sẽn pẽ-a n yɩɩdã zĩig zãrame. Tõeeme tɩ tʋʋm me kae ye. Zĩigã me maasem bɩ a tʋʋlem tõeeme n ka wala d sẽn datã ye. Yãmb na n saka yel-tood a woto bɩ? Wãn to la y na n mao n tõog yel-kãensã?
2 D segd n talla tẽeb la bas-yardo: Wẽnnaam kõo a Abrahaam noor t’a yi a ba-yirã Ur n kẽng Harã sẽn da zãr ne Ur kɩlometr 1000. A kẽnga be ne a pagã, a ba-biig biiga, la ne a ba a Teera sẽn da kʋʋlã. (Sɩng. 11:31, 32; Neh. 9:7) A Teera kũum poore, a Zeova kõo a Abrahaam sẽn da tar yʋʋm 75 masã wã noor t’a yik ne a zaka rãmb Harã n kẽng tẽng ning a sẽn na n wilg-a t’a kẽngã. Dẽ a Abram, a Sarai, la a Lot “rɩka sore.” (Sɩng. 12:1, 4, 5) Yaa sɩd t’a Abrahaam sẽn yikã, ra ka sẽn na yɩl n tɩ tʋm zĩig ning koe-moondb raab sẽn beẽ n yɩɩd ye. La a yikrã ra baoodame t’a maan bũmbu. Bõe la rẽ?
3 Ra baoodame t’a Abram tall tẽeb la bas-yard n tõog n mak n maan tʋʋmd a woto. Ra yaa tɩlae t’a tagsgã la vɩɩmã toeeme. A ra segd n basa bãan ning a sẽn da tara, a sẽn da wa n be a roagdb sʋkã. La a teega a Zeova t’a ges yẽ ne a zaka rãmb yelle. Rũndã-rũndã me neb wʋsg teega a Zeova woto.
4 Wakat bilf tʋʋma: Yãmb zoe n paama bark ning ned sẽn paamd a sã n moon mooneg zĩig tiging sẽn ka beẽ bɩ? Ne koe-moondb kẽere, yɩɩ tɩlae tɩ b tog sor n kẽng zĩ-zãrsẽ. Ra seka b na maan modgr a woto bɩ?
5 Togo, saam-biig a yembr n yãk yam n na n lebg n kẽng a ba-yir n tɩ moon koe-noogã, bala ned ba a yembr ra zɩ n moon koe-noogã be ye. Tẽn-kãng ra ka be tiging ba a yembr mooneg zĩigẽ ye. Hal tɩ ta wakat kãnga a roagdba sʋka yẽ a yembr bal n da sak sɩdã. A sẽn ta a tẽngẽ wã pipi wã ya a mengã zak neb la a reng n kãab t’a na n zãmsa ne-ba. Rẽ poore a moona b yagsã. A kell n talla mooneg tẽn-bõoneg nins sẽn gũbgã pʋsẽ me. Kiis a wɛ poor a sẽn wa n yit be wã, neb 18 n da wat tigissã n ka vaandẽ ye. Rẽ tɛka, tiging la b lugl zĩ-kãnga. Masã woto Rĩung Roog la b met tẽn-kãnga. A leb n paama sũ-noog me, a sẽn yã t’a roagdb 12 wa sɩdã pʋgẽ wã. A mengã ma ra bee b sʋka. A sẽn leb n tags yel-kãngã a sẽn vɩɩmdã yellã, a yeelame: ‘M sẽn yã a Zeova sẽn ning tõnd tʋʋmdã m ba-yirẽ wã bark to-to wã, yɩɩ zu-noog n kõ maam. Maam ne m pagã yãame tɩ f sã n moon koe-noogã neb sẽn da zɩ n wʋm sɩdã pĩnd t’a sɩd kẽ-b sũyã, bee yamleoog wʋsgo. Wakat fãa d tẽegdã yel-kãngã d sẽn vɩɩmdã ne sũ-noogo, la m sã n le paam sor n tõe n leb n tɩ moon zĩigẽ tiging sẽn ka moond fãa, zĩig pʋgẽ bala m debdame.’ Kamerun saam-bi-poak a yembr n tɩ moon babgẽ tiging sẽn ka moonda. A gʋlsa woto: “Sɩd rag n yɩɩ ne sũ-noog la m sẽn mao ne m pãng tɛk n taas neba sẽn be bab-kãngã wã koe-noogã, n tũnug ne koe-moonegã soay toɛ-toɛyã . . . M sã n ges Biibl zãmsg nins m sẽn bas be wã sõore, la neb wʋsg a taabã sẽn ket n sakd tõnd koɛɛgã to-to wã, . . . M sũur yɩtẽ-la noog tɩ y tʋm saam-biig be t’a tɩ sõng nin-kãensã sẽn yaa pʋ-peelem dãmbã.”
6 Sak n tɩ tʋm zĩig ning raab sẽn beẽ n yɩɩd wakat bilf yĩngã tõe n sõnga zĩig a to wɛɛngẽ. Neb nins sẽn maand woto wã tõe n paama kɩbay sẽn tar yõod sẽn na n sõng-ba, tɩ b “geelg” n bãng tẽngã babg a to pʋgẽ kẽngr sẽn baood tɩ b maan bũmb ninga.—Luk 14:28, Sebr Sõngo.
7 A Zeova ratame tɩ b moon koe-noogã “dũniyã tɛk fãa” tɩ saabã yaool n wa. (Mat. 24:14) Y sẽn mi rẽ wã, y na n sakame n yik n kẽng zĩig raab sẽn beẽ n yɩɩdã tɩ sã n tõe bɩ? Raab n be zĩis wʋsgo.
8 Zĩig ning raab sẽn beẽ n yɩɩdã kẽngre: Yãmb rɩka retrɛt bɩ? Kiuug fãa yãmb tara yaood bɩ? Sã n ka woto, y tõe n dɩka segls n tʋm y meng yĩng bɩ? Zĩig ning fãa y sẽn tɩ beẽ, y tõe n zĩnda be n paam y noor dɩɩb ne telefõn la ordinatɛɛr tũnugr bɩ? Yãmb mengã sã n ka tõe n yik n kẽng zĩig a to, y tõe n sõnga y zakã ned a yembr t’a tɩ tʋm zĩig a to bɩ?
9 Y sã n tags yellã zug pʋʋsg pʋgẽ n mik tɩ y tara y sẽn na maan n tõog n yik n tɩ tʋm zĩig raab sẽn beẽ n yɩɩdã yel-toodo, bɩ y sõs yellã zug ne y zakã rãmb la tigingã kãsem dãmba. Rẽ poore bɩ y gʋls lɛtr n kɩs-a kãsem dãmbã tɩ bãmb me tõog n paas b tagsa la b sagls n yaool n tool-a tʋʋmdã willẽ.
10 Bõe n segd n zĩnd y lɛtrã pʋgẽ? Yãmb yʋʋma, y lisgã yʋʋmde, zɩɩb nins y sẽn tar tigingã pʋgẽ, y sã n kẽe kãadem bɩ y pa kẽ, la y sã n tara kom-bõonego. Togs-y tẽn-bilã, bɩ galʋ-tẽng ning y sẽn dat n tɩ tʋmẽ wã, tɩ zems ne y mengã raabo. Wala makre, y na tõog n vɩɩmd babg ning zĩigã sẽn yaa tʋʋlg la maasrã? Y na tõog n vɩɩmd babg ning zĩigã sẽn yaẽ waood bɩ? Y tõe n tɩ vɩɩmda tãng zĩigẽ bɩ? Yãmb wʋmda buud-gomd a to bɩ?
11 Yãmb tara yẽesem ne tʋʋmdã la y rat n yãk yam n maan dẽ bɩ? Yãmb yɛlã sẽn yaa to-to wã kõt-y-la sor tɩ y tõe n tɩ tʋm zĩig ning raab sẽn beẽ n yɩɩdã bɩ? Sã n yaa woto, bɩ y bãng bark kãseng ning a Zeova sẽn kiigd wakat fãa b rãmb nins sẽn teegd yẽ, n wilg modgr la mong-m-meng yamã zutu!—Yɩɩl 34:9; Mal. 3:10.