“Yɛ la m na n yã sẽkã?”
1 Yaa woto la tõnd wʋsg sẽn yɩɩda sidgd tɩ b ka tar sẽk ye, d vɩɩmã sẽn pid ne tʋʋma yĩnga. B yeelame tɩ sẽk yaa tõnd laog ning sẽn tar-a yõod n yɩɩd la sẽn sat-a tao-tao n yɩɩdã me. Dẽ, yɛ la d tõe n yã sẽk n maan yɛl nins sẽn sɩd tar yõodã, wala Wẽnnaam Gomdã kareng la a zãmsgo?—Fil. 1:10.
2 Yellã tɩɩm ka sẽk bao n paas ye, la yaa yãk d sẽn dat n maan bũmb ningã sẽk ning d sẽn tarã pʋgẽ. Rasem a yopoe pʋgẽ, d tara lɛɛr 168. Lɛɛr kãens sʋka, lɛɛr 100 la d rɩkd n gõe la d tʋmdẽ. Woto, wãn-wãn to la d tõe n dɩk wakat ning sẽn kellã n tʋm tɩ naf-d n yɩɩge? Efɛɛz rãmba 5:15-17 (NW) sagenda tõnd tɩ d ra kẽn “wa yalemb ye, la a yɩ wa yam dãmba, n baood sẽk ning sẽn zemsã . . . , n bãngd a Zeova raabã sẽn ya a soab n welge.” Woto wilgdame tɩ d segd n tũnuga sõma-sõma ne sor d sẽn paam fãa n maan yɛl nins a Zeova sẽn yet tɩ tara yõodã.
3 A Zezi maka tõnd wakatã ne a Nowe wakatã. (Luk 17:26, 27) Neb nins sẽn da be wakat kãngã vɩɩm ra pida ne daar fãa vɩɩmã yɛl maanego. Ne rẽ fãa, a Nowe yãa sẽk n ka kogl-kãseng la a moone. (Heb. 11:7; 2 Pɩɛ. 2:5) A maana wãn n yã sẽka? Ya a sẽn ning Wẽnnaam raabã maaneg pipi zĩigẽ la a sak-a, n maan yɛlã “kɛpɩ” wã.—Sɩng. 6:22, NW.
4 Bõe n segd n zĩnd pipi zĩigẽ? A Zezi yeelame: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Mat. 4:4) Rasem a yopoe fãa, d paamda “[tẽeb] moende wakat ninga sẽn zemse.” (Luk 12:42, Sebr Sõngo) Tõnd sã n dat tɩ zãmsgã fãa kẽ-d sõma n sɩd naf-do, dẽnda d tall kareng la zãmsg na-kẽndr n tũud-a wakat fãa. Tõnd tara mi-beoog tẽebã rɩɩb yĩnga. Rẽ n so tɩ d ka segd n karemd sɛbã zug-zugẽ bal wala rɩ-yãgdem, tɩ yaa wa ned sẽn na n dɩt rɩɩb wa b rigd-a lame ye. Sẽn yaa lebend ne rẽ, d mi-beoogã segd n tus-d lame tɩ d bao sẽk n zãms tẽebã yɛl la d maan sũ-noog ne-ba.
5 Tẽebã rɩɩb tõe n talla tõnd n kẽng vɩɩm sẽn-kõn-sa zĩigẽ. (Zã 17:3) Rẽ segd n zĩnda pipi zĩigẽ tõnd daar fãa tʋʋmã pʋsẽ. D tõe n yãa sẽk n maan weer daar fãa Biiblã kareng la kiris-neb tigissã seglg yĩng bɩ? Sɩda, d tõeeme. Dẽ d na n paama ‘yõod wʋsg’ ning Wẽnnaam daabã bãngr la a tũub sẽn wat ne wã.—Yɩɩl 19:8-12.