Paas-y y sũ-noogã koe-moonegã pʋgẽ
1 Rẽ yĩnga yãmb sã n moond koe-noogã, y paamda sũ-noog a pʋgẽ bɩ? D sã n ka gũusi dũni wẽngã sẽn gũbg tõndã tõe n kɩtame tɩ tõnd yɛɛs moonegã, tɩ rẽ kɩt tɩ d ka le tar sũ-noog ye. D sã n moond zĩig neb sẽn pa kelgdẽ me, tõe n komsa tõnd raoodo. Bõe ne bõe la d tõe n maan n paas d sũ-noogã moonegã pʋgẽ?
2 Tall-y yam-sõngo: Yam-sõng tallg sɩd tara yõodo. Bũmb a yembr d sẽn na n maan n tall yam-sõng yaa d sẽn na n bʋgs zu-no-kãseng ning d sẽn tarã zugu, d sẽn yaa ‘tʋmd-n-taas ne Wẽnnaamã.’ (1 Kor. 3:9) A Zezi me bee ne tõnd n sõngd-d tʋʋm kãngã pʋgẽ. (Mat. 28:20) Sẽn paase, a leb n tũnugda ne malɛgs wʋsg n sõngd tõndo. (Mat. 13:41, 49) Dẽ d tõe n talla bas-yard tɩ Wẽnnaam wilgda tõnd sor d sẽn modgd n maand bũmb ningã pʋgẽ. (Wil. 14:6, 7) Woto, baa ninsaalb kẽer sã n ka sak tõnd moonegã me, saasẽ yaa sũ-no-kãsenga!
3 Segl-y y meng neere: D sã n segl d mens sõma, paasda tõnd sũ-noogã. D sã n wa segend n na n yi koe-moonegã, ka tɩlae tɩ d maan yɛl wʋsg ye. Minit a wãn bal seka sẽn na yɩl n ges gom-zug sẽn yit yaoolem zʋrno rãmbã bɩ sɛb nins d sẽn kãabd ki-kãngã pʋsẽ. Yãk-y sɛb kãabg goam sõasg ning gom-zug sẽn yaa “Bũmb ning d sẽn na n yeel n wilg zʋrno rãmbã” pʋgẽ, sẽn be Rĩungã Tʋʋmd pʋgẽ wã. Ges-y yʋʋmd 2002 wã seb-paasdem, sõasg ning gom-zug sẽn yaa “Sagls koe-moonegã yĩnga” pʋgẽ. Y tõeeme n ges Comment raisonner sebrã pʋgẽ n yãk sɩngr goam sẽn yaa sõma. Nebã sã n nong n togsda kɩɩsg goam sẽn gɩdgd yãmb moonegã, bɩ y segl leokr sẽn na n maan tɩ gom-kãens ra gɩdg-yã, la sẽn na n tees a soabã yam gom-zut sẽn na n kɩt t’a tʋlg n bãng n paas zutu. Comment raisonner sebrã tõe n sõnga tõnd sõma tɩ d maan dẽ. D sã n tʋm ne seb-kãensã, d na n paama bas-m-yam ning d sẽn datã n moon ne sũ-noogo.
4 Pʋʋs-y ne y sũur fãa: Pʋʋsgã yaa tɩlae sẽn na yɩl n paam sũ-noog sẽn kaoosde. Sẽn ya a Zeova tʋʋmd la d maandã yĩngã d segd n bõos-a-la a vʋʋsem sõngã, tɩ sũ-noogã yaa vʋʋsem sõngã bil a yembre. (Gal. 5:22) A Zeova na n kõo tõnd pãng tɩ d tõog n ket n moondẽ. (Fil. 4:13, Sebr Sõngo) Pʋʋsgã koe-moonegã wɛɛngẽ tõe n sõnga tõnd tɩ d tall yam-sõng d sã n segd yɛl sẽn ka noom-do. (Tʋʋ. 13:52; 1 Pɩɛ. 4:13, 14) D sã n yɛɛsdẽ, pʋʋsgã tõe n sõnga tõnd tɩ d pẽdg ne raood la ne sũ-noogo.—Tʋʋ. 4:31.
5 Bao-y soay n moone: D sã n tõogd n yãt nebã n kõt kasetã, d koe-moonegã kõt-d-la sũ-noog n paasdẽ. Tõe tɩ d na n tõog n yãa neb wʋsg n yɩɩda, d sã n toeem wakat ning d sẽn minim n moond zak-zakã, n kẽng neba nengẽ wĩnd-kaoor bɩ zaabre. Y sã n wa kẽnd sor zugu, n daad teedo, n kẽ biis pʋgẽ, bɩ n yuugd pemsem kokr zĩigẽ y segda neba. Bõe yĩng tɩ y ka na n segl sɩngr goam sẽn yaa koɛɛg n deng n tɩ gom ne b rãmb nins sẽn wõnd b sakda sõasg nana-nana wã? Daar fãa y sõsda ne neb tʋʋma zĩigẽ bɩ lekollẽ, tɩ y leb n tõe n moon be me. Tõe tɩ y sã n sɩng sõasg gom-zug sẽn tik Biiblã zugu, sẽn kɩtd tɩ neb kẽer rat n bãng n paase, y na n tõog n kõo kasetã. B kõo sagl-sõma yʋʋmd 2002 yʋʋm-vẽkr kiuug Rĩungã Tʋʋmd seb-paasdem pipi seb-neng zugu. Y sẽn tõog n maan a soab fãa bõn-kãensã b sẽn wilgã sʋka, paasda y sũ-noogã koe-moonegã pʋgẽ.
6 Sẽn mik tɩ sũ-noog sõngda tõnd tɩ d kell n tall sũ-mar toog taoorã, ad sɩd tara yõod wʋsg tɩ d kell n tall-a! D sã n maan woto, tʋʋm kãngã d sẽn ka na n leb n maan n yɩlmã sã n wa baase, d na n paama bark wʋsgo. Bark kãngã d sẽn saagd n na n paama meng paasda tõnd sũ-noog koe-moonegã pʋgẽ—Mat. 25:21.