D sõng neb a taabã tɩ b pẽg a Zeova
1 Koɛɛg sẽn tar yõod wʋsg la b moond nebã tẽngã gill zugu, sẽn yeta: “Bɩ y zoe Wẽnnaam la y waoog bãmba; tɩ bõe, bãmb bʋʋd kaoob wakat taame. Bɩ y waoog sẽn naan-a yĩngri la tẽnga ne ko-kãsenga la ko-bundsã.” (Wil. 14:6, 7) Yaa waoogr ne-do, d sẽn tõe n naag n moon koe-kãngã wã. Bõe la nebã segd n bãng a Zeova wɛɛngẽ n tõog n zoe-a la b balm-a?
2 A yʋʋrã: Neba segd n tõog n boola sɩd Wẽnnaam yɛngã ne a yʋʋr n welg-a toor ne ziri wẽnnaam dãmb wʋsg nins b sẽn balemd rũndã-rũndã wã. (Tõo. 4:35; 1 Kor. 8:5, 6) Sɩda, Biiblã gʋlsdb tũnuga ne Wẽnnaam yʋʋrã sẽn tar ziir wʋsgã sẽn yɩɩd naoor 7 000. Yaa sɩd tɩ wa sẽn zemse, d tagsdame tɩ bɩ la d yaool n tũnug ne Wẽnnaam yʋʋrã, la d ka segd abada n solg-a bɩ n bas n da tũnug ne-a ye. Wẽnnaam datame tɩ ãdem-biisã fãa wa bãng a yʋʋrã.—Yɩɩl 83:18, NW.
3 A zʋgã: Neba segd n bãngã a Zeova sẽn yaa Wẽnnaam ning buudã n tõog n pẽg-a. D tog n kɩtame tɩ neba bãng a nonglmã sẽn ka to wã, a yama sẽn yɩɩd fãa wã, a tɩrlmã sẽn pid zãngã, a pãngã sẽn tõe fãa wã, n paas a nimbãan-zoeerã, a sõmblmã sẽn naag ne nonglmã, la a zʋg-kãsems a taabã. (Yik. 34:6, 7) B leb n tog n zãms n zoee Wẽnnaam ne zoe-sõngã buudu, n waoog-a ne waoog-kãsenga, la b sak tɩ b sã n dat n vɩɩmde, rẽnda b ta a Zeova yam.—Yɩɩl 89:8.
4 D pẽneg Wẽnnaam n paase: Sẽn na yɩl n põs a Zeova bʋ-kaoorã sẽn watã sasa, dẽnda nebã pʋʋs ne a Zeova yʋʋr ne tẽebo. (Rom 10:13, 14; 2 Tes. 1:8) Woto yɩɩda Wẽnnaam yʋʋrã la a zʋg-sõma wã bal bãngre. D tog n sõnga nebã tɩ b bao zems-n-taar ne a Zeova, la b teeg-a ne b sũyã fãa. (Yel. 3:5, 6) B sã n tũ bũmb ning b sẽn zãmsdã, n pʋʋsd a Zeova ne pʋ-peelem n kot sõngre, n sɩd yã b vɩɩmã pʋgẽ t’a sõngd-b lame, b tẽebã na n bɩɩme, tɩ rẽ na n sõng-b tɩ b pẽneg a Zeova n paase.—Yɩɩl 34:9.
5 Bɩ d moon Wẽnnaam yʋʋrã ne yẽesem la d sõng neb a taabã tɩ b tall bas-yard zãng ne a Zeova la b zoe-a. Tõeeme tɩ d tõog n ket n sõngd neb wʋsg a taab n paasdẽ tɩ b wa bãng a Zeova la b pẽg-a wa b ‘Wẽnnaam sẽn fãagd-ba.’—Yɩɩl 25:5.