Ges-y ‘kɩɩbsã’ yell ne nonglem
1 A Zeova yaa “kɩɩbs ba.” (Yɩɩl 68:6) D tõe n sɩd yãame tɩ kɩɩbsã yell sɩd paka Wẽnnaam, no-kãngã a sẽn da kõ tẽn-kʋdem wẽndẽ Israɛllã pʋgẽ: “Da nams pʋg-kõor ne kɩɩb ye. Fo sã n nams bãmb tɩ b kelem n bool maam, mam na n wʋma bãmb kɛlengã.” (Yik. 22:21, 22) Wẽnnaam Tõogã ra leb n maana segls sẽn na yɩl tɩ b sõng kɩɩbsã ne pʋg-kõapã ne b bõn-datmã. (Tõo. 24:19-21) Kiris-nebã wakat me, b sagla balemdb hakɩkã tɩ b “sõng kɩɩbs ne pʋg-kõapa bãmb toog pʋgẽ.” (Zak 1:27) Ne nonglem a Zeova geta kamb nins sẽn be zags sẽn tar roagd a yembr bɩ sẽn welg tũudmã wɛɛngẽ wã pʋgẽ yelle. Wãn to la d tõe n dɩk togs-n-taar ne a Zeova zĩ-kãngã wɛɛngẽ?
2 Zãmsgã kũun tẽebã wɛɛngẽ: Yãmb sã n yaa roagd sẽn wubd y kamb y yembre, bɩ y sã n tar kẽed-n-taag sẽn ka be sɩdã pʋgẽ, yirẽ Biibl zãmsg wakat fãa ne y kambã tõeeme n yɩ toogo. La y sã n dat tɩ kambã wa yɩ kãsemb sẽn yaa tags-tɩ-bɩ la maan-tɩ-zems rãmba, rɩllame tɩ y maan Biibl zãmsg sẽn ka vaand la sẽn pidsd b raabã. (Yel. 22:6) Tara yõod tɩ y sõsd ne-b daar fãa tẽebã yɛl zutu. (Tõo. 6:6-9) Tõeeme tɩ y wa koms raood wakat ninga, la ra bas-y ye. Pʋʋs-y a Zeova n paam pãng la sor-wilgri, y sã n wa ‘wubd [y kambã] ne Zusoaba saglg la a zãmsgo.’—Ef. 6:4.
3 Y sã n wa rat sõngr sẽn na yɩl n tʋk zɩɩb nins Gʋlsg Sõamyã sẽn wilg tɩ y segd n tʋkame wã, bɩ y wilg kãsem dãmbã. Tõeeme tɩ b kõ y sagls sẽn zemse, bɩ b sõng tɩ y lugl tẽeb yɛl maaneg na-kẽndr sẽn yaa sõma y zakã pʋgẽ.
4 Neb a taabã sẽn tõe n maan bũmb ning n sõnge: Pipi yʋʋm kob-gĩndẽ wã, baa ne b sẽn wub a Tɩmote zak sẽn welg tũudmã wɛɛngẽ pʋgẽ wã, a wa n lebga a Zeova sõgen yẽesenga. Yaa vẽeneg tɩ bũmb ning sẽn sõng-a wã yɩɩ a ma wã la a yaab-poakã sẽn zãms-a Gʋlsg Sõamyã a yãadmã wakatã. (Tʋʋ. 16:1, 2; 2 Tɩm. 1:5; 3:15) Sẽn paase, a leb n dɩɩ lagem-n-taar ning a sẽn tall ne kiris-neb a taabã yõodo. Tʋm-tʋmd a Poll sẽn zĩnd kiris-nin-kãens sʋkã yeelame t’a Tɩmote ya a “bi-nongr Zusoaba sora pʋgẽ, la a tũuda sɩda.”—1 Kor. 4:17.
5 Woto me, rũndã-rũndã ad sɩd yaa bũmb sẽn be nafr wʋsgo, saam-biis la saam-bi-pogs sẽn bɩ tẽebã pʋgẽ sẽn get kɩɩbsã sẽn be tigingã pʋgẽ wã yell ne nonglmã! Yãmb mii bãmb ned kam fãa yʋʋr bɩ? Yãmb sõsda ne-b kiris-neb tigissẽ wã la wakat a taab bɩ? Kos-y-b tɩ b wa naag-y n moone. Wakat-wakate, y tõe n mi n kosame tɩ bãmb ne b roagd a yembrã sẽn wubd-bã bɩ roagd ning sẽn be sɩdã pʋgẽ wã wa naag-y y zak pʋgẽ zãmsgã bɩ pemsem kokrã wakate. Kom-kãensã sã n get yãmb wa b zoa fãa, b na n sakame n tũ y makrã la y saglsã n yɩɩda.—Fil. 2:4.
6 A Zeova geta kɩɩbsã yell ne nonglem sõmb-sõmbo, la a barkda modgr ning d sẽn maand ne nonglem n sõngd-b sẽn na yɩl tɩ b sak la b tũ sɩdã b vɩɩmã pʋgẽ wã. Neb wʋsg sẽn bɩ zags sẽn tar roagd a yembr pʋgẽ bɩ sẽn welg tũudmã wɛɛngẽ pʋgẽ paama sagls a woto, la masã b yaa so-pakdba, kãsemb sõngdba, kãsem dãmba, kaagr yel-gɛtba, misioneer dãmba, bɩ Betɛllã zak neb sẽn tʋmd ne kɩs-sɩda. Bɩ tõnd fãa rɩk d saasẽ Ba wã togs-n-taare, n bao soay n ‘pak d sũurã yaleng’ n tall nonglem ne kɩɩbsã.—2 Kor. 6:11-13, Sebr Sõngo.