Tẽeg-y kɩs-sɩd dãmb nins sẽn kʋʋlã yelle
1 Baa ne pʋgkõor a Ann sẽn kʋʋl n tar yʋʋm 84, a “ra pa viigd wẽnd doogẽ [wã] ye.” A sẽn yɩ sakda yĩng kɩtame t’a Zeova kõ-a bark sẽn ka wõnd a taaba. (Luk 2:36-38, Sebr Sõngo) Rũndã-rũndã me, saam-biis la saam-bi-pogs wʋsg maanda wala a Anne, baa ne b sẽn maood ne zu-loeesã. Kʋʋlmã sã n kɩt tɩ nin-kãensã sẽn yaa kɩs-sɩd dãmbã segd n mao ne bãas la pãn-komslem a taabã, wakat ninga sãamda b sũuri. Bɩ d ges d sẽn tõe n maan bũmb nins vẽeneg n keng nin-kãensã pels la d sõng-b tɩ b maand tẽebã tʋʋm wakat fãa.
2 Tigissã la koe-moonegã: Neb kẽer sã n sak ne nonglem n na n tɩ rɩk sẽn kʋʋl-bã ne b bõn-zoambdga, bãmb wʋsg tõee nana-nana n wat kiris-neb tigissã n ka vaandẽ ye. Woto kengda nin-kãensã sẽn balem a Zeova n kaoos wʋsgã tẽebo, la leb n nafd tigingã neb me. Yãmb zoe n sõngame n maan tʋʋm kãngã sẽn yaa sõma wã bɩ?—Heb. 13:16.
3 Kiris-neb hakɩkã sã n moond koe-noogã n ka vaandẽ, b paamda sũ-noogo. La rẽ maaneg tõe n yɩɩ toog ne sẽn kʋʋl-bã la koms rãmbã. Rẽ yĩngã nin-kãensã tõnd sẽn nongã tõe n yi n moonã ne yãmb n yɩ y ‘tʋmd-n-taag’ kasetã kũun neng a yembr pʋgẽ bɩ? (Rom 16:3, 9, 21) Y tõeeme n kos-a t’a wa naag-y n kõ kaset ne telefõn bɩ a yãag-y tɩ y tɩ maan lebg-n-tɩ-ges bɩ Biibl zãmsgo. Sẽn kʋʋl-a wã sã n bee zakẽ n ka tõe n yi, rẽ yĩnga Biibl zãmsdã tõe n kẽnga a zakẽ wã tɩ b tɩ maan zãmsgã be bɩ?
4 Zãmsgã la tũud-n-taarã: Wakat-wakate, neb kẽer boonda ned sẽn kʋʋl bɩ sẽn yaa koams t’a wa naag-b n maan b zak pʋgẽ Biibl zãmsgã, bɩ b tolg n tɩ maan zãmsgã meng nin-kãng zakẽ. Ma a yembr n kẽng ne a kamb a yiib saam-bi-poak sẽn kʋʋl zakẽ tɩ b tɩ zãms Mam Biibl kɩbay sebrã be, la tũud-n-taar a woto sɩd kenga b fãa pelse. Leb n noogda nin-kãensã sũuri, tõnd sã n bool-b tɩ b wa rɩ ne-do, bɩ tɩ b wa zĩnd ne-d wakat a taaba. Koms-rãmbã pãng sã n booga wʋsg tɩ y ka tõe n zĩnd ne-b n kaoose, y tõe n telefõname, bɩ y tũ-b yirã koɛɛg-koɛɛg bal n karem bũmb tɩ b kelge, n pʋʋs ne-ba, wall y togs-b kɩbar sẽn kengd tẽebo.—Rom 1:11, 12.
5 A Zeova nanda kɩs-sɩd dãmb nins sẽn kʋʋlã. (Heb. 6:10, 11) D tõe n dɩka togs-n-taar ne a Zeova, n nand-b la d sõngd-b tɩ b maand tẽebã tʋʋm wakat fãa.