Rɩk-y togs-n-taar ne a Zeova sõmblmã
1 Tõnd sã n yã wĩndg lʋɩɩs sẽn be rasãnd bɩ d sã n dɩ rɩ-noogo, kɩtdame tɩ d rat n pʋʋs a Zeova sẽn yaa sõmblem fãa yẽgrã barka. A sõmblmã kɩtdame tɩ d rat n dɩk a togs-n-taare. (Yɩɩl 119:66, 68; Ef. 5:1) Wãn to la d tõe n wilg sõmblem?
2 Ne sẽn ka-b tẽedbã: Bũmb a yembr d sẽn tõe n maan n dɩk togs-n-taar ne a Zeova sõmblmã yaa d sẽn na n wilg tɩ neb nins sẽn ka d tẽed-n-taasã yell pak-d lame. (Gal. 6:10) Tõnd sã n tall sõmblem ne-ba, tõe n kɩtame tɩ b tall tagsg sẽn yaa sõma a Zeova Kaset rãmbã la koɛɛg ning b sẽn moondã zutu.
3 Wala makre, saam-biig sẽn yaa bi-bɩɩg n yaa so-pakd n da wa n zĩ logtor yir n gũudẽ. A zĩnd n kɛgla pʋg-yãang sẽn da wõnd a bãagã keelem yɩɩda neb a taabã fãa la bal sẽn da be be wã rẽnda. Sẽn wa n ta saam-biigã t’a segd n kẽ n yã logtorã, a basame tɩ pʋg-yãangã reeg yẽ zĩig n kẽ. Kaoosg zugẽ, saam-biigã leb n sega pʋg-yãangã, la so-kãngã ra yaa raagẽ. La pʋg-yãangã sũur da yaa noog wʋsg a sẽn yã-a wã. Ba a sẽn da ka sak n kelg koe-noogã pĩndã, pagã yeelame tɩ masã yẽ miimi t’a Zeova Kaset rãmbã sɩd nonga neb a taabã. Saam-biisã sɩnga Biibl zãmsg ne pagã n maand-a n ka vaandẽ ye.
4 Ne d saam-biisã: Tõnd sã n modgd n sõngd d tẽed-n-taasã me, d rɩkda togs-n-taar ne a Zeova sõmblmã. Sabaab wakate, tõnd bee neb nins sẽn tʋgd pipi n sõngd d saam-biisã sʋka. D leb n maanda woto me, d sã n sõngd neb nins sẽn dat tɩ b rɩk-b n kẽng tigissã, d sã n tʋgd n get bãad dãmbã, la d wilgd d nonglem me ne tigingã neb nins d sẽn nan ka mi sõma wã.—2 Kor. 6:11-13; Heb. 13:16.
5 Bũmb a to me a Zeova sẽn maand n wilgd a sõmblmã ya a sẽn ‘kõt sugrã.’ (Yɩɩl 86:5) D tõe n dɩka togs-n-taar ne a Zeova n wilg tɩ d nonga sõmblmã, n kõt neb a taabã sugri. (Ef. 4:32) Rẽ sõngdame tɩ tõnd ne d tẽed-n-taasã zĩnd-n-taar yaa ‘neere, la noogo.’—Yɩɩl 133:1-3.
6 Bɩ a Zeova sõmblmã sẽn waoogã kɩt tɩ d pẽg-a la d tall sũ-noog wʋsgo. Sẽn paase, bɩ rẽ kɩt tɩ bũmb ning d sẽn maand fãa pʋgẽ bɩ d modg n dɩk togs-n-taar ne a sõmblmã.—Yɩɩl 145:7; Zer. 31:12.