Yeelg-y sik-m-meng wa fuugu
1 Pe-kɩɩm sẽn yaa bi-bɩɩg n teeg a Zeova n zab n tõog zabr gãndaoogo. (1 Sãm. 17:45-47) Rao sẽn yaa arzɛk soab n tall sũ-mar yel-beed taoore. (Zoob 1:20-22; 2:9, 10) Wẽnnaam Biriblã wilgame tɩ yẽ zãmsgã fãa yita a Ba nengẽ. (Zã 7:15-18; 8:28) Yel-kãensã fãa pʋsẽ, bõn-kãseng sẽn tall yõod wʋsg n puki: sik-m-menga. Rũndã-rũndã me, sik-m-mengã tara yõod wʋsg yɛl nins d sẽn maood ne wã pʋsẽ.—Kol. 3:12.
2 D sã n wa moond koe-noogã: Tõnd sẽn yaa kiris-neb n tʋmd Wẽnnaam tʋʋmdã, d moonda neb buud fãa koe-noogã, n pa yãgd n kao b bʋʋdo, b buudã, b rog-n-mikã, bɩ b sẽn yit zĩig ningã yĩng ye. (1 Kor. 9:22, 23) Neb kẽer sã n zãgs ne gom-kãs bɩ ne tɩtaam goam tɩ b kõn kelg Rĩungã koɛɛga, tõnd ka maand-b woto n lebs ye. D ket n baooda neb nins sẽn zemsã ne sũ-mare. (Mat. 10:11, 14) D ka baood n na n dɩ yʋʋr neb a taabã taoor ne d bãngrã ye, d wilgda nebã Wẽnnaam Gomdã sẽn yetã, n miẽ tɩ rẽ tara pãng n yɩɩd tõnd sẽn tõe n yeel fãa. (1 Kor. 2:1-5; Heb. 4:12) D na n dɩka a Zezi togs-n-taar n kõ a Zeova waoogrã fãa.—Mark 10:17, 18.
3 Tigingã pʋgẽ: Kiris-nebã leb n tog n ‘saka taab ne sik-m-menga.’ (1 Pɩɛ. 5:5) D sã n get tɩ neb a taabã yɩɩda tõndo, d ka na n gũudẽ tɩ d saam-biisã wa tʋm n sõng-d ye, d na n baoo soay n tʋm n sõng-ba. (Zã 13:12-17; Fil. 2:3, 4) D ka na n wa tagsdẽ tɩ tõnd sẽn be zĩig ninga, d yɩɩda tʋʋm kẽer maaneg wala Rĩungã Roog pɩɩsg ye.
4 Sik-m-mengã sõngda tõnd ‘tɩ d sak taab ne nonglem,’ tɩ rẽ wat ne bãan la zems-n-taar tigingã pʋgẽ. (Ef. 4:1-3) Rẽ sõngd-d lame tɩ d sak neb nins b sẽn yãk tɩ b yɩ taoor-lʋɩtbã. (Heb. 13:17) Rẽ na n kɩtame tɩ ned sã n sagl-d bɩ a sã n kibl-du, bɩ d sake. (Yɩɩl 141:5) Sẽn paase, sik-m-menga na n kɩtame tɩ b sã n kõ-d tʋʋm tigingã pʋgẽ tɩ d maane, bɩ d teeg a Zeova t’a sõng-do. (1 Pɩɛ. 4:11) Wala a Davɩɩde, d sakame tɩ sẽn na yɩl n tõog d sẽn maandã, rɩlla d teeg Wẽnnaam sõngre, pa ninsaal pãng ye.—1 Sãm. 17:37.
5 Tõnd Wẽnnaamã taoore: Sẽn tɩ yɩɩd fãa, d segd n ‘sika d mens Wẽnnaam sẽn yaa pãng soabã taoore.’ (1 Pɩɛ. 5:6) D sã n wa maood ne zu-loeese, d tõe n wa rata ne d sũur fãa tɩ Wẽnnaam Rĩungã wa ne yolsgo. La d gũuda ne sik-m-meng la ne sũ-mar t’a Zeova pids a kãabsã wakat ning a sẽn yãkã pʋgẽ. (Zak 5:7-11) Wala sẽn yɩ to-to ne a Zoob sẽn yɩ burkĩn Wẽnnaam nifẽ, bũmb ning sẽn pak tõnd n yɩɩd yaa a Zeova ‘yʋʋrã kell n paam pẽgre.’—Zoob 1:21.
6 No-rɛɛs a Daniɛll ‘sika a meng Wẽnnaam taoore,’ n paam lohorem la zu-nood tʋʋm wʋsgo. (Dan. 10:11, 12) Bɩ tõnd me tall sik-m-menga, n miẽ tɩ “sik-m-meng ne Zusoaba zoees biis yaa arzɛk ne waoogre la vɩɩm.”—Yel. 22:4.