Yam ning sẽn yit Wẽnnaam nengẽ wã yõod ka mak-n-taag ye
1 Neb kẽer tagsdame tɩ rũndã-rũndã a Zeova Kaset rãmbã sẽn segd n maand bũmb ning n yɩɩd yaa sõng ãdem-biisã tɩ b tɩlg ne b zu-loeesã. Nin-kãens pa tagsd tɩ tõnd sẽn zãmsd neba Biiblã yaa tʋʋmd yõod sẽn ka mak-n-taag ye. Yaa wala tʋm-tʋmd a Poll sẽn gʋlsã: “Kũum dapɩka koe-mooneg yaa yalemd ne neb nins sẽn na n sãamã, la ne tõnd sẽn paam fãagre, a yaa Wẽnnaam pãnga.” (1 Kor. 1:18) Sɩda, d miimi tɩ tʋʋm nins fãa tõnd sẽn maand rũndã-rũndã wã sʋka, koe-moonegã n tar yõod n yɩɩda.
2 Vɩɩm sẽn yaa sõma masã menga: Modgr ning ãdem-biisã sẽn maan sẽn na yɩl n welg b zu-loeesã ka yãk neng zãng ye. Laloa rãmbã b sẽn yiis sẽn na yɩl n gɩdg bi-beelmã pa tõog n gɩdg bi-be-tʋʋma paasg ye. Laafɩ kaool dãmb la b maan-yã, la b tʋm sodaas tɩ b tɩ gũ tɩ zĩis gãand bãane, la rẽ ka tõog tɩ zabrã sa ye. Gɛɛl nins sõngr siglsã sẽn maan ãdem-biisã neer yĩngã ka tõog tɩ naongã sa ye. (Yɩɩl 146:3, 4; Zer. 8:9) La Rĩungã koɛɛg toeema neb milyõ rãmb vɩɩm, n sõng-b tɩ b tall nin-paalgã zʋg-sõma sẽn tat Wẽnnaam yamã. (Rom 12:2; Kol. 3:9, 10) Nin-kãens sẽn maan dẽ wã, b paama vɩɩm sẽn yaa sõma n yɩɩd masã menga.—1 Tɩm. 4:8.
3 Beoog-daar sẽn be sũ-noogo: Yam ning sẽn yit Wẽnnaam nengẽ wã sõngda tõnd tɩ d mao ne zu-loeesã masã menga, la rẽ sẽn yãk a toogo, a leb n sõngda tõnd tɩ d maan gɛɛla sẽn yaa sõma beoog-daar yĩnga. (Yɩɩl 119:105) Rẽ leb n sõngda tõnd tɩ d ra wa modgd zaalem n baoodẽ n na n toeem masã zãmaanã ye. (Koɛ. 1:15; Rom 8:20) Ad d sɩd tara mi-beoogo, d sẽn ka sãamd d vɩɩmã ne bõn-datɩ sẽn yaa belgr bal pʋgbã ye! La d sẽn pʋgd ya a Zeova sẽn kãab bũmb ning tɩ yaa waazibã, sẽn yaa “yĩngr paalg la tẽn-paalga,” zĩis nins tɩrlem sẽn na n zĩnd b pʋsẽ wã. Dẽ a Zeova bʋ-kaoorã raar sã n wa ta, yɩta vẽeneg tɩ neb nins sẽn tall bas-yard ne yam ning sẽn yit Wẽnnaam nengẽ wã rɩka sard sẽn yaa sõma.—2 Pɩɛ. 3:10-13; Yɩɩl 37:34.
4 Baa neb nins ‘dũni kãngã yam’ sẽn kẽ sõma wã sẽn tõe n getẽ tɩ yam ning sẽn yit Wẽnnaam nengẽ wã ka zemsã, sɩd-sɩda, la yaa rẽ bal la sor ning sẽn zems n yɩɩd d sẽn segd n tũ wã. (1 Kor. 1:21; 2:6-8) Woto yĩnga, d na n ket n moonda Wẽnnaam sẽn yaa ‘yam soab n ka to’ wã koɛɛg tẽngã gill zugu.—Rom 16:27.