Wed-rʋʋdb sẽn na n zab zabr tɩ pak yãmba
1, 2. Wãn-wãn la yãabã sẽn be Wilgr 9:13-19 pʋgẽ wã pidsg pak Wẽnnaam sõgen dãmbã rũndã-rũndã?
1 “Malɛk a yoob soaba peeba baorgo.” Rẽ poore tãb-biis sẽn yaa “wed-rʋʋdb” sõor sẽn yaa “tus-kẽema kobs-yi” n da zoete, tɩ b zoeesã rãamd wõnd sa-kɛlenga. Tãb-bi-kãensã ka wõnd wala raasenkam tãb-biisã ye. “Wiida zut yaa wa gɩgma zutu.” Bugum ne bug-zõos la kidbr n da yit b noyẽ wã, tɩ b “zʋɩya yaa wa wiisi.” Makr wɛɛngẽ wed-rʋʋdb kãensã zabrã waa ne sãoongo. (Wil. 9:13-19) Yãmb mii yãab kãngã sẽn yaa bãngr-gomdã pidsg sẽn pak yãmb to-to bɩ?
2 Sẽn zae-b ne vʋʋsem sõngã kell ne b tũud-n-taasã, sẽn yaa piis a taabã, lagma taab n moond Wẽnnaam bʋ-kao wã. Rẽ sõngame tɩ b puk kiris-neb ne yʋʋr siglsã bãong zãnga, n wilg tɩ b kii tẽebã wɛɛngẽ. Bɩ d vaees yãab kãnga nens a yiib sẽn wilgd Wẽnnaam sõgen dãmbã tʋʋmd sẽn womd biis wʋsgã võore.
3. Zãms-bʋg la yãmb paam sẽn na yɩl n togs Wẽnnaam koɛɛgã tɩ wom biisi?
3 D paama zãmsg la tʋʋm-teed sẽn na yɩl n taas Wẽnnaam koɛɛgã: Wẽnnaam sõgen dãmbã paama zãmsg sẽn na yɩl n togs Wẽnnaam koɛɛgã ne tõogo, ne Wẽnnaam tʋʋmdã lekoll la tigingã tigiss a taab maasem. B rɩkda a Zezi ne a karen-biisã togs-n-taare, n yit n baood neb nins sẽn zemsã, n moond zĩig ning fãa b sẽn tõe n yãẽ nebã. (Mat. 10:11; Mark 1:16; Luk 4:15; Tʋʋ. 20:18-20) Mooneg manesem kãnga sẽn tik Biiblã zugã sɩd woma biis wʋsgo!
4. Seb-bʋs la koe-moondb wʋsg tara, tɩ sõngd-b tɩ b tõe n maan b tʋʋmdã?
4 Kiris-nebã pʋɩɩ Biibl dãmba, sɛba, seb-bi la zʋrno rãmb milyaar dãmba n pids Wẽnnaam moonegã tʋʋmde. B yiisa seb-kãensã ne buud-goam sõor sẽn kolg 400. B tara gom-zut buud toɛy-toɛya, la b tũnugd ne manesem toɛy-toɛy sẽn na yɩl tɩ koɛɛgã zĩnd yamleoog ne neb buud toor-toore. Rẽ yĩnga yãmb tʋmda ne seb-kãensã sõma bɩ?
5, 6. Bõe n wilgd t’a Zeova bee ne a nin-buiidã?
5 Sor-wilgr la sõngr sẽn yit Wẽnnaam nengẽ: Yãabã sẽn yaa bãngr-gomdã wilgda vẽeneg tɩ Wẽnnaam teenda tʋʋmd ning makr wɛɛngẽ wed-rʋʋdbã sẽn makdã. (Wil. 9:13-15) Moonegã tʋʋmd sẽn maand dũniyã gill zugã yaa ne Wẽnnaam vʋʋsem sõngã maasem, ka ne ninsaal yam bɩ a pãng ye. (Zak. 4:6) A Zeova tũnugda ne malɛgs n wilgd tʋʋmdã na-kẽndre. (Wil. 14:6) Woto, ne a Kaset rãmb nins sẽn yaa ninsaalbã modgr la yẽ meng sõngre, a Zeova kɩtdame tɩ sik-m-mens rãmbã wat a nengẽ.—Zã 6:45, 65.
6 A Zeova nin-buiidã sẽn paam zãmsgo, n segl sõma, la b tʋmd ne malɛgsã sor-wilgr sẽn na yɩl n taas Wẽnnaam koɛɛgã yĩng kɩtame tɩ ned ba a ye ka tõe n gɩdg b tʋʋmdã ye. Bɩ d ket n maand d tʋʋmd sẽn na yɩl n sõng tɩ yãab kãngã sẽn yaa bãngr-gomdã paam pidsgu.