“Pak-y y sũurã yalengo”
1. Bõe la tõnd ned kam fãa segd n maane?
1 Kiris-neb saam-biirã pʋgẽ, tõnd ned kam fãa segd n sõng n kɩtame tɩ tigingã tall yamleoogo. (1 Pɩɛ. 1:22; 2:17) Bũmb ning sẽn wat ne yamleoog a woto yaa d sẽn na n ‘pak d sũurã yalengo,’ n nong taaba. (2 Kor. 6:12, 13, Sebr Sõngo) Bõe yĩng tɩ tar yõod wʋsg tɩ d bao n bãng d saam-biisã la d saam-bi-pogsã sõma?
2. Bõe yĩng tɩ tar yõod tɩ d yõg zood ne d tẽed-n-taasã?
2 D zoodã noom paasdame: D sã n bãng d tẽed-n-taasã sõma n paase, d wat n talla naneb wʋsg n paas ne b sũ-marã, b sẽn tar tẽebã, la b zʋg-sõma a taabã. D na n yãame tɩ b pãn-komsmã ka leb n namsd-d ye, sẽn paase, zood ning d sẽn tar ne-bã noom na n paasame. D sã n mi taab sõma, rẽ sõngd-d lame tɩ d tõog n keng taab raood la d bels taaba. (1 Tes. 5:11) D tõe n yɩɩ ‘neb sẽn paasd taab raoodo,’ sẽn na yɩl tɩ d tõog n kɩɩs a Sʋɩtãan pãn-tusd-wẽnsã. (Kol. 4:11, Kãab-paalgã Koe-noogo) Yaoolem day kãensã sẽn pid ne zu-loeesã yĩnga, sãmbg kae tɩ d sũur nooma d sẽn tar zo-rãmb sẽn yaa sõma woto a Zeova nin-buiidã sʋkã ye.—Yel. 18:24.
3. Wãn to la d tõe n yɩ neb sẽn kengd d taabã raoodo?
3 Tõnd sã n wa be mak-toos taoore, zo-nongds tõe n paasa tõnd pãng la b keng d raood wʋsgo. (Yel. 17:17, NW ) Kiris-ned sẽn da tagsd t’a ka yõodo, n da maood ne tags-kãng tẽega woto: “Mam da tara zo-rãmb sẽn pẽgd maam, sẽn na yɩl n sõng-m tɩ m mao ne m tags-wẽnsã.” Zo-rãmb a woto yaa kũun sẽn yit a Zeova nengẽ.—Yel. 27:9.
4. Wãn to la d tõe n bao n bãng tigingã neb sõma n paase?
4 Bao-y neb a taabã zĩigẽ: Wãn to la d tõe n pak d sũurã yaleng n nong d tẽed-n-taasã? Tigissẽ wã d na n pʋʋsa neb a taabã. D na n modgame me n sõs ne-b sõma. D tõe n baoo neb a taabã zĩigẽ, la ka rat n yeel tɩ d na n bao n kẽe b yɛlẽ ye. (Fil. 2:4; 1 Pɩɛ. 4:15) Bũmb a to d sẽn tõe n maan n bao neb a taabã zĩigẽ yaa d sẽn na n bool-b tɩ b wa rɩ rɩɩb d yiri. (Luk 14:12-14) Y leb n tõeeme n segl n moon ne-ba. (Luk 10:1) D sã n yãk yam n na n bãng d saam-biisã sõma n paase, d sõngdame tɩ zems-n-taar zĩnd tigingã pʋgẽ.—Kol. 3:14.
5. Bõe la d tõe n maan n paas d zo-rãmbã sõore?
5 Rẽ yĩnga tõnd nong n yãkda d zo-nongdsã tõnd reem-n-taasã bɩ sẽn nong-b bũmb nins tõnd me sẽn nongã sʋk bal bɩ? D ka segd n bas tɩ manesem a woto kɩt tɩ d ka tall zo-rãmb wʋsg tigingã pʋgẽ ye. Baa ne b yʋʋma sẽn da ka yembr la b ra leb n ka yit zĩ-yɛngã, a Davɩɩd ne a Zonatã, la a Rut ne a Naomi yõga zood sẽn tall pãnga. (Rut 4:15; 1 Sãm. 18:1) Y tõe n paasa y zo-rãmbã sõor bɩ? Y sã n maan woto, y tõe n wa paama bark y sẽn da ka tẽeda.
6. D sã n pak d sũurã yaleng n nong neb a taabã, nafa nins d sẽn na n paama kẽer la bʋse?
6 D sã n pakd d sũurã yaleng n nong neb a taabã, d kengda taab pãng la d sõngd n wat ne laafɩ tigingã pʋgẽ. Sẽn paase, a Zeova mengã na n ninga tõnd bark d sẽn nong d saam-biisã yĩnga. (Yɩɩl 41:2, 3; Heb. 6:10) Bɩ d bao n bãng neb wʋsg wa d sẽn tõe tɛka.