Rɩk-y togs-n-taar ne a Zeova, tɩrlmã wɛɛngẽ
1 “Zusoaba nonga tɩrlem.” (Yɩɩl 37:28) Rẽ n so tɩ ba a sẽn yãk yam t’a na n sãama dũni wẽng kãngã wã, a kɩt tɩ b reng n keoog nebã. (Mark 13:10) Rẽ kɩtdame tɩ nebã paam n tek yam n paam fãagre. (2 Pɩɛ. 3:9) Tõnd modgdame n dɩkd togs-n-taar ne a Zeova tɩrlmã wɛɛngẽ bɩ? Rẽ yĩnga nebã nimbãaneg la b namsg kɩtdame tɩ d rat n taas neb a taabã Rĩungã saagr bɩ? (Yel. 3:27) Tõnd sã n nong tɩrlem, rẽ na n kɩtame tɩ d moon koɛɛgã.
2 Moon-y n da bak ned n bas ye: Tõnd ‘maanda sẽn yaa tɩrga,’ d sã n wilgd neba fãa Wẽnnaam raabã n ka bakdẽ ye. (Mii. 6:8) D ka tog n maan wala ninsaal sẽn ka zems zãng sẽn nong n tikd a nin sẽn ne zugu, n bakd neb n sõngdẽ wã ye. (Zak 2:1-4, 9) A Zeova “ratame tɩ neba fãa paam fãagre la b bãng sẽn yaa sɩda.” (1 Tɩm. 2:4) Wẽnnaam Gomdã sẽn yaa sɩdã tõe n toeema neba yel-manesem hal wʋsgo. (Heb. 4:12) D sẽn mi rẽ wã, na n kɩtame tɩ d tall bas-m-yam d sã n wa moond nebã, baa b rãmb nins sẽn pa kelg tõnd pĩndã.
3 Saam-bi-poak n da tʋmd butik pʋgẽ. B ra tara raadeng t’a yalẽ wã sẽn yaa to-to wã kɩt t’a zoet-a bilfu. Baasg zãnga, a wa n paama segb sẽn zems n mak n na n kõ nin-kãngã kasetã arzãna Wẽnnaam sẽn kãabã wɛɛngẽ. Nedã leok-a-la vẽeneg bal tɩ yẽ ka tẽed soalma, la tɩ yẽ toor kae ne zãmaanã neb sẽn vɩ to-to wã ye, sẽn paase a rɩkda dorge. La saam-bi-poakã pa koms raood n bas ye. Vugri a soka saam-bi-poakã n na n bãng a sẽn tagsd ne yẽ zoobdã sẽn yaa wogdã. Ne yam, saam-bi-poakã wilg-a-la Biiblã sẽn yet bũmb ning zoobdã wɛɛngẽ. (1 Kor. 11:14) Vẽk-n-beoogã a lebg n waa ne zug la toɛɛng sẽn wõrs n maneg sõma, la woto sɩd yɩɩ saam-bi-poakã noogo. A kosa Biibl zãmsgo, tɩ saam-biig sak ne sũ-noog n na n maane. Raoã bɩɩ tẽebã pʋgẽ n wa rɩk a meng n kõ Wẽnnaam n deeg lisgu. Wala ra-kãngã, neb wʋsg sẽn balemd a Zeova rũndã-rũndã tara mi-beoog ne b rãmb nins sẽn modg wakat fãa n taas-b Rĩungã koɛɛg n ka maan bakrã.
4 Ka la bilfu, a Zeova na n yiisa wẽng buud fãa tẽngã gill zugu. (2 Pɩɛ. 3:10, 13) Wakat bilfã sẽn ketã pʋgẽ, bɩ d rɩk togs-n-taar ne a Zeova tɩrlmã wɛɛngẽ, n sõng neba fãa tɩ b põs a Sʋɩtãan dũni wẽngã sãoong sẽn watã sasa.—1 Zã 2:17.