Yãmb sogsgã leoore

◼ Wãn-wãn la d segd n maan tʋʋm b sẽn kõ-d tigingã pʋgẽ?

Sẽn na yɩl tɩ bũmba fãa maan sõma tɩ ra yɩ yaar a Zeova Kaset rãmbã tiging pʋgẽ, rẽndame tɩ d fãa lagem taab n maan modgre. (1 Kor. 14:33, 40, Sebr Sõngo) Tags-y bũmb nins fãa d sẽn segd n maan tigisg a ye bal wakate. Tigisgã meng sõss sẽn yãk b toogo, saam-biis la saam-bi-pogs n segd n maan tʋʋm toɛy-toɛy sẽn deng tigisgã sasa la a poore. Tʋʋm a taab b sẽn maand tɩ neb a taabã ka neẽ wã me tara yõod wʋsgo. Bõe la tõnd ned kam fãa tõe n maan n sõng zĩ-kãngã wɛɛngẽ?

Sak-y n kãab-y y sõngre. Neb nins sẽn kõt b sõngr ne yamleoogã pa kongd tʋʋm wʋsg n na n maan ye. (Yɩɩl 110:3) Ges-y bãad dãmbã la sẽn kʋʋl-bã yelle. Sõng-y ne Rĩungã Roog pɩɩsgo. D tõe n maana yɛl wʋsg n sõng tɩ ka yɩ tɩlae tɩ b kos-d tɩ d yaool n maan dẽ ye. B sẽn baood yaa d wee n tʋlg n kõ d sõngr bala.

Tʋm-y ne sik-m-menga. Sik-m-mens rãmbã sõngda b taabã ne sũ-noogo. (Luk 9:48) Sik-m-mengã na n sõng-d lame tɩ d ra sak zɩɩb sẽn yɩɩd d tʋkr ye. Leb n yaa sik-m-mengã n na n sõng tõnd tɩ d ra maan tɩ zʋʋg d zu-sobendã sẽn kõt-d sor tɩ d maan tɩ ta zĩig ningã ye.—Yel. 11:2.

Yɩ-y ned sẽn zems ne bas-yardo. Tẽn-kʋdem wẽndẽ Israɛllã pʋgẽ, b ra sagla a Moiiz t’a yãk neb sẽn yaa ‘sɩd dãmb’ n kõ taoor-sobendo. (Yik. 18:21) Rũndã-rũndã me b ratame tɩ d yɩ sɩd rãmb woto. B sã n kõ-y tʋʋmd fãa bɩ y maan-a ne y sũur fãa. (Luk 16:10) Yãmb sã n ka tõe n maan tʋʋmd b sẽn kõ-y bɩ y ges tɩ ned a to maan y tʋʋmdã y sẽn ka na n zĩndã sasa.

Modg-y wa y sẽn tõe tɛka. Baa nug-tʋʋmdã wɛɛngẽ, b sagenda kiris-nebã tɩ b tʋm ne b sũyã fãa. (Kol. 3:22-24) D tara bʋʋm sõma n na n maan woto n yɩɩda, d sã n wa tʋmd sẽn na yɩl tɩ sɩd balengã yɛl kẽng taoore. Baa tʋʋmd sã n wõnd a yaa tʋʋm-yaalga, d sã n maan-a neere nafda tigingã.

D tõe n tũnuga ne tʋʋmd fãa b sẽn kõ-d n wilg d nonglem ne a Zeova la ne d saam-biisã. (Mat. 22:37-39) Bɩ d pelg d pʋg n maan tʋʋmd buud fãa b sẽn kõ-d tɩ d maane.