Zakã neb tẽeb tʋʋm na-kẽndre—Tigingã tigissi
1 Yãmb sã n yaa kiris-ned sẽn yaa roagda, y ratame tɩ y kamba sã n wa bɩ bɩ b ket n nong a Zeova la b maand a raabã, la b wa paam vɩɩm sẽn pa satã dũni paalg ning Wẽnnaam sẽn kãabã pʋgẽ. Wãn-wãn la y tõe n sõng-b tɩ b lʋɩɩs a Zeova balengã taoor b vɩɩmã pʋgẽ? Sẽn tɩ yɩɩd fãa yaa ne y mak-sõngã. (Yel. 20:7) Saam-bi-poak a ye tẽega a ma sẽn yaa Kaset soabã mak-sõng yell n yeele: “Ne tõndo, tigissã kẽngr da pa be sãmbs ye.” Rẽ kɩtame t’a kell n tall yam kãnga.
2 Rẽ yĩnga yãmb zaka neb mii tigingã tigiss yõod bɩ? Zãmsg ning d sẽn paamd beenẽ wã kɩtdame tɩ d ket n maand Wẽnnaam daabã ne yẽesem, tɩ tũud-n-taar ning d sẽn paamd be wã kengd pɛlg hal wʋsgo. (Ezai 54:13; Rom 1:11, 12) La sẽn tɩ yɩɩd fãa, tigiss kãensã yaa sẽn na yɩl n pẽg a Zeova a ‘nebã tiging pʋgẽ.’ (Yɩɩl 26:12) Kiris-neb tigissã kõt-d-la segb tɩ d balem a Zeova la d wilg tɩ d nong-a lame.
3 ‘Bɩ y gũus neere’: D sã n miẽ tɩ tõnd sẽn tigimd taabã yaa sẽn na yɩl n balem Wẽnnaam, na n kɩtame tɩ d ‘gũus neer’ n da wa minim n vaand tigissã yel-yaals yĩng ye. (Ef. 5:15, 16; Heb. 10:24, 25) Y sã n wa maand zakã neb tẽeb tʋʋm na-kẽndre, y tõe n deng n gʋlsa tigissã lɛɛr dãmba. La y gũus tɩ tʋʋm a taab ra wa tiis-b ye. Kɩt-y tɩ y zakã neb bãng tɩ tigissã kẽngr lʋɩta taoore.
4 D sã n karemd kibay sẽn wilgd d saam-biisã sẽn maood ne zu-loees nins n kẽnd tigissã la tigis-kãsemsã, pa kengd d raood sɩda? La baa y yɛlã sẽn tõe n pa ta bãmb dẽndã, y me tara zu-loeese. A Sʋɩtãan kɩtame tɩ Wẽnnaam a Zeova balengã lebgd toog ne a nin-buiidã n paasdẽ. La ne rẽ fãa, tall-y bas-m-yam tɩ modgr ning y sẽn maand n kẽngd tigingã tigiss ne y zakã rãmbã na n paa y kambã yamẽ. Hakɩka, y sã n maand woto, tõe n kɩtame tɩ tẽebã yɛl y sẽn taas-bã pa b yamẽ wakat fãa.