Kaset kũun sẽn pa tũ ne goama
1 Bũmb nins a Zeova sẽn naanã kõta kaset a zʋg-kãsemsã zug vẽeneg tɩ pa tũ ne goam ye. (Yɩɩl 19:2-4; Rom 1:20) Woto me, tõnd yel-manesmã sẽn yaa sõma wã, d zʋgã sẽn wilgd tɩ d yaa kiris-nebã la d sẽn manegd d mens tɩ zemsdẽ wã kõta kaset mugr-mugri. (1 Pɩɛ. 2:12; 3:1-4) Tõnd ned kam fãa segd n datame t’a yel-manesmã kɩt tɩ “Wẽnnaam sẽn yaa tõnd Fãagda kareng paam waoogr ne bũmb fãa.”—Tɩt 2:10.
2 Wãn-wãn la ninsaalb sẽn pa zems zãng tõe n kɩt tɩ zãmsg ning sẽn yit Biiblã pʋgẽ wã paam waoogre? Yaa ne Wẽnnaam Gomdã sor-wilgr la ne vʋʋsem sõngã pãng bal la b tõe n maan dẽ. (Yɩɩl 119:105; 143:10) Wẽnnaam Gomdã “vɩɩme la a tara pãnga, la a rɩtame n yɩɩd sʋʋg sẽn tar noy a yiibu.” (Heb. 4:12) A kẽed-d-la hal sõma n kɩt tɩ d lebg nin-paalga. (Kol. 3:9, 10) Vʋʋsem sõngã kɩtdame tɩ d paamd zʋg-sõma wala maan-neere, sũ-bʋgsem la yõk-m-menga. (Gal. 5:22, 23) Rẽ yĩnga tõnd ned kam fãa basdame tɩ Wẽnnaam Gomdã la a vʋʋsem sõngã tʋmd a zug bɩ?—Ef. 4:30; 1 Tes. 2:13.
3 Nebã geta tõndo: D sã n tũud a Zeova noyã la d maood n na n puk a zʋgã, nebã neeme. Wala makre, rao a yembr tʋmd-n-taas n da yaand-a a sẽn yaa koɛɛgã yĩnga, la saam-bi-poak sẽn da tʋmd ne-ba, n yaool n da waoogd-a sõma-sõma. Rẽ kɩtame t’a wa sok saam-bi-poakã bũmb ning sẽn kɩt t’a yaa toor ne a taabã. Saam-bi-poakã wilg-a lame tɩ yaa yẽ sẽn tũud Biiblã noyã yĩng n kɩt t’a waoogd nebã. A goma ne-a Rĩungã saagr sẽn kõt sũ-noogã yell me. Rao wã sɩnga Biiblã zãmsgo, n wa baas n deeg lisgu. A sẽn wa n lebg n kul a ba-yirã, a manesem-sõngã linga a roagdbã tɩ noog b sũyã, tɩ kẽer sak sɩdã.
4 Rẽnd d sã n wa be tʋʋm zĩigẽ, lekollẽ, wall d roagdbã la d yagsã sʋka, d tõeyã ne d manesem sõngã la kasetã d sẽn kõtã n kɩt tɩ nebã waoog Wẽnnaam.—Mat. 5:16.