D sõng neb a taabã tɩ b lebg neb sẽn ‘sakd ne b sũyã fãa’
1. Bõe la a Zeova baood a balemdbã nengẽ?
1 Sẽn na yɩl n balem a Zeova tɩ ta a yam, sakr yaa tɩlae. (Tõo. 12:28; 1 Pɩɛ. 1:14-16) Ka la bilfu Wẽnnaam na n kaoa “neb nins sẽn ka mi Wẽnnaam la sẽn ka sakd koe-noogã” bʋʋdo. (2 Tes. 1:8) Wãn-wãn la d tõe n sõng neb a taabã tɩ b lebg neb sẽn ‘sakd ne b sũyã fãa’?—Rom 6:17.
2. Bõe yĩng tɩ tar yõod tɩ d sõng neb a taabã tɩ b tall tẽeb sẽn tar pãnga?
2 D sõng-b tɩ b tall tẽeb la nonglem: Gʋlsg Sõamyã pʋgẽ, sakr tara loees wʋsg ne tẽebo. Tʋm-tʋmd a Poll goma ‘Wẽnnaam sẽn ka sɛɛbã sẽn kõ noor tɩ b sak tẽeb’ yelle. (Rom 16:26) Hebre rãmb sak 11 sõdgda tẽeb mak-sõma toor-toore, tɩ b wʋsg wilgd tʋʋm b sẽn tʋm tɩ zems ne a Zeova raabã a sẽn wilgã. (Heb. 11:7, 8, 17) La kɩɩsg yẽ tɩ loee ne tẽeb kaalem. (Zã 3:36; Heb. 3:18, 19) D segd n bao n tʋma ne Wẽnnaam Gomdã sõma sẽn na yɩl n sõng neb a taabã tɩ b bɩɩs tẽeb buud ning sẽn wat ne sakrã.—2 Tɩm. 2:15; Zak 2:14, 17.
3. a) Wãn-wãn la sakr tar loees ne nonglem? b) Wãn-wãn la d tõe n sõng Biiblã karen-biis tɩ b tall nonglem ne a Zeova?
3 Sakr tara loees me ne Wẽnnaam nonglem. (Tõo. 5:10; 11:1, 22; 30:16) Pipi Zã 5:3 yeelame ‘tɩ Wẽnnaam nonglem yaa tɩ tõnd sak bãmb tõogo. La bãmb tõog ka toog ye.’ Wãn-wãn la d tõe n sõng Biiblã karen-biis tɩ b kɩt tɩ nonglem ning b sẽn tar ne a Zeova wã paase? Bao-y soay b zãmsgã sasa n kɩt tɩ b tall mi-beoog wʋsg ne a Zeova a zʋg-kãsemsã yĩnga. Kɩt-y tɩ b bãng mi-beoog ning yãmb meng sẽn tar ne Wẽnnaamã. Sõng-y karen-biigã t’a bao a Zeova zoodo. Sẽn yɩɩd fãa, a Zeova nonglem na n kɩtame tɩ neb a taabã la tõnd me sakd-a ne d sũy fãa.—Mat. 22:37.
4. a) Bõe yĩng tɩ tõnd mak-sõngã tar yõodo? b) Wãn-wãn la d tõe n maan n yɩ ned sẽn sakd ne a sũur fãa?
4 D kõ-b mak-sõngo: Bũmb sẽn tar pãng sẽn tõe n sõng nebã tɩ b sak koe-noogã n yɩɩd yaa tõnd mak-sõngã. La rẽ baoodame tɩ d mao wʋsg n yɩ ned sẽn sakd ne a sũur fãa. (1 Rĩm 3:9; Yel. 4:23) Woto baooda bõe maanego? Rẽ baoodame tɩ d tũnug ne Biiblã zãmsg wakat fãa wã la ne tigissã kẽnd maasem n dɩlg d sũurã ne tẽebã rɩɩbo, (Yɩɩl 1:1, 2; Heb. 10:24, 25) tɩ d tũud-n-taas yɩ neb nins sẽn teend baleng hakɩkã ne b sũy fãa wã, (Yel. 13:20) tɩ d naagd n moond koe-noogã wakat fãa la d tʋll ne d sũur fãa n sõng nebã d moonegã zĩigẽ. Leb n baoodame tɩ d kos a Zeova pʋʋsg pʋgẽ t’a sõng-d tɩ d paam sũ-sõngo, (Yɩɩl 86:11) tɩ d zãag d mens ne yɛl wala yoobã la nen-kɛglmã sẽn tõe n dẽgem d sũurã, la d pʋg bũmb nins sẽn tõe n pẽneg-d ne Wẽnnaam la paas zood ning d sẽn tar ne-a wã pãngã.—Zak 4:7, 8.
5. Wãn-wãn la sakdba paamd barka?
5 A Zeova ra kõo a pĩnd wẽndẽ nin-buiidã bas-m-yam tɩ b sã n kelg a koɛɛgã a na n ning-b-la barka. (Tõo. 28:1, 2) Woto me, rũndã-rũndã, a Zeova ningda ‘neb nins sẽn sakd-a wã’ bark wʋsgo. (Tʋʋ. 5:32) Bɩ d sõng nebã ne d zãmsgã la d mak-sõngã tɩ b yɩ neb sẽn sakd ne b sũy fãa.